ଇରାନ ଅଶାନ୍ତ, ସରକାରୀ କୋଠାରେ ଭଙ୍ଗାରୁଜା କଲେ ପ୍ରଦର୍ଶନକାରୀ, ଜାଣନ୍ତୁ କାହିଁକି ଏତେ ବଡ ଆନ୍ଦୋଳନ ?

ତେହରାନ, ୦୧/୦୧ : ଇରାନ ଅଶାନ୍ତ । ସରକାରୀ କାର୍ଯ୍ୟାଳୟରେ ଭଙ୍ଗାରୁଜା କଲେ ପ୍ରଦର୍ଶନକାରୀ । ପାଚେରୀ ଭାଙ୍ଗି ପଶିବାକୁ ଉଦ୍ୟମ କଲେ । ଡଲାର ତୁଳନାରେ ଇରାନର ରିଆଲ ଦୁର୍ବଳ ହେବାରୁ ଦେଶରେ ବିକ୍ଷୋଭ ପ୍ରଦର୍ଶନ କରାଯାଉଛି । ଯାହା ଏବେ ଅଧିକ ଉଗ୍ର ରୂପ ଧାରଣ କଲାଣି ।

ଦେଶର ଆଇନ ମନ୍ତ୍ରାଳୟ କହିଛି ଯେ, ବୁଧବାର ରାଜ୍ୟର କିଛି ରାଜ୍ୟପାଳଙ୍କ କାର୍ଯ୍ୟାଳୟରେ ଭଙ୍ଗାରୁଜା ହୋଇଛି । ଗୁରୁବାର ଆଉ ଏକ ସରକାରୀ କୋଠାରେ ସେମାନେ ଭଙ୍ଗାରୁଜା କରିଛନ୍ତି । ଯେଉଁଥିରେ ଜଣେ ଯବାନ ପ୍ରାଣ ହରାଇଛନ୍ତି । ତେବେ ରାଜ୍ୟପାଳଙ୍କ କାର୍ଯ୍ୟାଳୟରେ ତୁମୂଳକାଣ୍ଡ ଭିଆଇଥିବା ୪ ଜଣଙ୍କୁ ଚିହ୍ନଟ କରାଯାଇଛି । ଆକ୍ରମଣକାରୀମାନେ ଆସବାବପତ୍ର ଭାଙ୍ଗି ଦେବା ସହ ଝରକା କବାଟ ମଧ୍ୟ ତାଡି ଦେଇଛନ୍ତି । ଏଥିରେ ତିନି ଜଣ ପୋଲିସ କର୍ମୀ ଗୁରୁତର ହୋଇଛନ୍ତି ।

ଆହୁରି ମଧ୍ୟ ମନ୍ତ୍ରାଳୟ କହିଛି ଯେ, କୋଉଦସତ୍ ସହରରେ ଜଣେ ୨୧ ବର୍ଷ ଯୁବକ ପୋଲିସ ଗୁଳିରେ ପ୍ରାଣ ହରାଇଛନ୍ତି । ସେ ଆଇନ ଭାଙ୍ଗିବାକୁ ଚେଷ୍ଟା କରୁଥିଲେ । ତେଣୁ ତାଙ୍କୁ ଗୁଳି କରାଯାଇଥିଲା ।

କ'ଣ ପାଇଁ ଆନ୍ଦୋଳନ

ଇରାନର ଆର୍ଥିକ ଅବସ୍ଥା ଭଲ ନାହିଁ । ଅର୍ଥନୈତିକ ଦୃଷ୍ଟିକୋଣରୁ ଏହା ଦୁର୍ବଳ ହେବାରେ ଲାଗିଛି । କିଛି ଦିନ ତଳେ ଦେଶର ମୁଦ୍ରା ଡଲାର ତୁଳନାରେ ୧.୪୫ରେ ପହଁଚିଥିଲା । ଯାହା ସର୍ବକାଳୀନ ନିମ୍ନ ସ୍ତରରେ ପହଁଚିଥିଲା । ଖାଲି ଏତିକି ନୁହେଁ ଦରଦାମ ବୃଦ୍ଧିରେ ଲୋକ ଅସ୍ତବ୍ୟସ୍ତ ହୋଇ ପଡିଛନ୍ତି । ବିଭିନ୍ନ ଖାଦ୍ୟର ଦରଦାମରେ ୭୨ ପ୍ରତିଶତ ବୃଦ୍ଧି ଘଟିଥିବା ବେଳେ ଔଷଧ ସାମଗ୍ରୀର ଦାମ୍ ପ୍ରାୟ ୫୦ ପ୍ରତିଶତ ଯାଏଁ ବୃଦ୍ଧି ପାଇଛି ।

ତେବେ ସରକାର ନିକଟରେ ଜନତାଙ୍କ ଟିକସ ହାରକୁ ବଢାଇଥିଲେ । ଯାହା ଆନ୍ଦୋଳନକୁ ଇନ୍ଧନ ଯୋଗାଇଥିଲା । ଅଭଜ, ହମାଦାନ, କ୍ୱେସମ୍ ଏବଂ ମସାଦ ସହରରେ ବ୍ୟବସାୟୀ ଟିକସ ବୃଦ୍ଧିକୁ ବିରୋଧ କରି ରାସ୍ତାକୁ ଓହ୍ଲାଇବା ସହ ନାରାବାଜି କରିଥିଲେ । ଯାହାର ଭିଡିଓ ଭାଇରାଲ ହୋଇଥିଲା । ଆଉ କିଛି ଭିଡିଓରେ ପ୍ରଦର୍ଶନକାରୀ ଇରାନ କ୍ରାଉନ ପ୍ରିନ୍ସ ରେଜା ପହଲଭିଙ୍କ ସପକ୍ଷରେ ନାରାବାଜି କରିଥିଲେ । ଯିଏ ଏବେ ନିର୍ବାସନ ଦଣ୍ଡ ଭୋଗୁଛନ୍ତି ।

ରାଷ୍ଟ୍ରପତିଙ୍କ ନିବେଦନ

ପ୍ରଦର୍ଶନକାରୀଙ୍କୁ ଶାନ୍ତି ରକ୍ଷା କରିବାକୁ ରାଷ୍ଟ୍ରପତି ମସୌଦ ପେଜେଖିଆନ୍ ଅନୁରୋଧ କରିଛନ୍ତି । ଆନ୍ଦୋଳନ ପଛରେ କୌଣସି ବୈଦେଶିକ ଶକ୍ତିର ହାତ ଥିବା ସେ ଅଭିଯୋଗ କରିଛନ୍ତି । ଆଜିର ସମୟରେ ଦେଶକୁ ବୋମା ଗୁଳି ସାହାଯ୍ୟରେ ହାତେଇ ହେବ ନାହିଁ । ତେଣୁ ଅଶାନ୍ତିର ବାତାବରଣ ସୃଷ୍ଟି କରାଯାଉଥିବା ନେଇ ସେ ପ୍ରକାଶ କରିଛନ୍ତି ।

ସୋସିଆଲ ମିଡିଆରେ ରେଜାଙ୍କ ଅପିଲ

କ୍ରାଉନ୍ ପ୍ରିନ୍ସ ପହଲଭି ସୋସିଆଲ ମିଡିଆରେ ଦେଶରେ ୪୬ ବର୍ଷର ଅରାଜକତାକୁ ଶେଷ କରିବାର ସମୟ ଆସିଥିବା କହିଛନ୍ତି । ଇରାନବାସୀଙ୍କୁ ଅନ୍ତର୍ଜାତୀୟ ସଙ୍ଗଠନ ସମର୍ଥନ କରିବା ପାଇଁ ସେ ଅପିଲ କରିଛନ୍ତି ।