ପ୍ରଧାନମନ୍ତ୍ରୀ ଥିବା ବେଳେ ବିବାହ କଲେ ବିଶ୍ବର ପ୍ରଥମ ନେତା, କନିଆଙ୍କ ବୟସ ୪୬ ବର୍ଷ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ପଦରେ ଥାଇ ବିବାହ କରି ରେକର୍ଡ କଲେ ନେତା । ଏକ ଦେଶର ପ୍ରଧାନମନ୍ତ୍ରୀ ୬୨ ବର୍ଷ ବୟସରେ ବିବାହ କରିଛନ୍ତି । ବୟସ୍କ ପ୍ରେମିକ ନିଜର ପ୍ରେମିକାଙ୍କୁ ଜୀବନସାଥି କରିଛନ୍ତି । ପ୍ରେିମକା ପ୍ରଧାନମନ୍ତ୍ରୀଙ୍କ ଠାରୁ ୧୬ ବର୍ଷ ସାନ । ସୋସିଆଲ ମିଡିଆରେ ପ୍ରଧାନମନ୍ତ୍ରୀ ପୋଷ୍ଟ କରିଛନ୍ତି, ‘ମ୍ୟାରେଡ୍’ । ବିବାହ ସମୟର ଫଟୋ ଏବଂ ଭିଡିଓ ମଧ୍ୟ ସେୟାର କରିଛନ୍ତି । ପ୍ରେମିକାକୁ ଜୀବନସାଥି ରୂପରେ ପାଇଁ ସେ ବେଶ ଖୁସି ଅଛନ୍ତି । ସୋମବାର ସେ ହନିମୁନ୍ ମନାଇବେ ବୋଲି କହିଛନ୍ତି । ଏହା ସହ ଏଥିପାଇଁ ହେବାକୁ ଥିବା ଖର୍ଚ୍ଚ ସେ ନିଜ ପକେଟରୁ କରିବେ । ସରକାରୀ ଅର୍ଥ ଖର୍ଚ୍ଚ କରିବେ ନାହିଁ ବୋଲି ପ୍ରଧାନମନ୍ତ୍ରୀ ଘୋଷଣା କରିଛନ୍ତି । ପ୍ରଧାନମନ୍ତ୍ରୀଙ୍କର ଏହା ଦ୍ବିତୀୟ ବିବାହ । ଏହା ପୂର୍ବରୁ ସେ ୨୦୧୯ରେ ନିଜର ପ୍ରଥମ ପତ୍ନୀଙ୍କୁ ଛାଡ଼ପତ୍ର ଦେଇଥିଲେ । ବିବାହର ୧୯ ବର୍ଷ ପରେ ଛାଡ଼ିଥିଲେ ପ୍ରଧାନମନ୍ତ୍ରୀ । ପ୍ରଥମ ପତ୍ନୀଙ୍କ ସହ ତାଙ୍କର ଜଣେ ପୁଅ ଅଛନ୍ତି । ସେପଟେ ତାଙ୍କର ଦ୍ବିତୀୟ ପତ୍ନୀଙ୍କ ପ୍ରଥମ ବିବାହ ସଂପର୍କରେ ଅଧିକ ତଥ୍ୟ ମିଳି ନାହିଁ ।

ଆମେ ଯେଉଁ ପ୍ରଧାନମନ୍ତ୍ରୀଙ୍କ କଥା କହୁଛୁ, ସେ ହେଉଛନ୍ତି ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନିଜ୍ । ସେ ଶନିବାର ତାଙ୍କ ସାଥୀ ଜୋଡି ହେଡେନଙ୍କୁ ବିବାହ କରିଛନ୍ତି। ୬୨ ବର୍ଷୀୟ ଏହି ବ୍ୟକ୍ତି ପ୍ରଥମ ପ୍ରଧାନମନ୍ତ୍ରୀ ଯିଏ ପଦରେ ଥିବା ସମୟରେ ବିବାହ କରିଛନ୍ତି। ଆଲବାନିଜ୍ କାନବେରାର ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ୪୬ ବର୍ଷୀୟା ଜୋଡି ହେଡେନ୍ ଙ୍କୁ ବିବାହ କରିଛନ୍ତି । ହେଡେନ୍ ଆର୍ଥିକ ସେବା କ୍ଷେତ୍ରରେ କାର୍ଯ୍ୟ କରନ୍ତି। ଆଲବାନିଜ୍ ଫେବୃଆରୀ ୨୦୨୪ରେ ହେଡେନଙ୍କ ସହିତ ନିର୍ବନ୍ଧ କରିଥିଲେ। ପ୍ରଧାନମନ୍ତ୍ରୀ ସୋସିଆଲ ମିଡିଆରେ ‘ବିବାହିତ’ବୋଲି ପୋଷ୍ଟ କରିଛନ୍ତି । ସେ ଏକ ଭିଡିଓ ମଧ୍ୟ ସେୟାର କରିଛନ୍ତି । ଆଲବାନିଜ୍ ୨୦୨୦ରେ ହେଡେନଙ୍କୁ ମେଲବର୍ଣ୍ଣରେ ଆୟୋଜିତ ଏକ ବିଜନେସ୍ ଡିନରରେ ଦେଖିଥିଲେ । ହେଡେନଙ୍କ ଏହା ଦ୍ବିତୀୟ ବିବାହ ।

ଲେବର ପାର୍ଟି ନେତା ଆନ୍ଥୋନୀ ଆଲବାନିଜ୍ ତାଙ୍କ ‘ଆଲବୋ’ ନାଁରେ ଜଣାଶୁଣା । ମାର୍ଚ୍ଚ ୨, ୧୯୬୩ ମସିହାରେ ଅଷ୍ଟ୍ରେଲିଆର କ୍ୟାମ୍ପରଡାଉନ୍ ସହରରେ ଏକ ରକ୍ଷଣଶୀଳ କ୍ୟାଥୋଲିକ୍ ପରିବାରରେ ଜନ୍ମଗ୍ରହଣ କରିଥିଲେ । ଆଲବାନିଜ୍ ପିଲାଟି ଦିନରୁ କେବଳ ତାଙ୍କ ମାଆଙ୍କୁ ଦେଖିଥିଲେ । କାରଣ ସେ ଜନ୍ମ ହେବା ବେଳକୁ ତାଙ୍କ ବାପା ତାଙ୍କ ପାଖରେ ନଥିଲେ । ସେ ଯେବେ ବାପାଙ୍କ ବିଷୟରେ ଜାଣିବାକୁ ଚାହିଁଲେ, ତାଙ୍କୁ କୁହାଗଲା ବିଦେଶରେ ସଡ଼କ ଦୁର୍ଘଟଣାରେ ବାପାଙ୍କର ମୃତ୍ୟୁ ହୋଇଯାଇଛି । ସେ ଏହି କାହାଣୀ ଶୁଣି ବଡ଼ ହୋଇଥିଲେ । ହେଲେ ତାଙ୍କୁ ଯେତେବେଳେ ୧୪ ବର୍ଷ ବୟସ, ସେତେବେଳେ ତାଙ୍କୁ ତାଙ୍କ ମା’ ସତ କହିଥିଲେ । ସେ କହିଥିଲେ ଯେ, ସେ ପ୍ରକୃତରେ ବିବାହିତ ନଥିଲେ। ସେ ଇଟାଲୀରେ ଜଣେ ପୁରୁଷଙ୍କୁ ଭେଟିଥିଲେ, ତାଙ୍କ ସହିତ ସମ୍ପର୍କ ସ୍ଥାପନ କରିଥିଲେ ଏବଂ ଗର୍ଭବତୀ ହୋଇଥିଲେ।

୨୦୦୨ରେ ମା’ଙ୍କ ମୃତ୍ୟୁ ପରେ ଆଲବାନିଜ୍ ନିଜ ପିତାଙ୍କୁ ଖୋଜିବାକୁ ବାହାରିଥିଲେ । ବହୁ ଖୋଜାଖୋଜି ପରେ ସେ ଇଟାଲୀରେ ତାଙ୍କ ପିତା କାର୍ଲୋ କ୍ରୁଜଙ୍କୁ ସାକ୍ଷାତ କରିଥିଲେ । ୨୦୧୪ରେ କର୍କଟ ରୋଗରେ ପଡ଼ି ମୃତ୍ୟୁବରଣ କରିଥିଲେ ଆଲବାନିଜଙ୍କ ପିତା । ସେପଟେ ଆଲବାନିଜ ବହୁ ଛୋଟ ବୟସରୁ ସାମାଜିକ କାର୍ଯ୍ୟରେ ଯୋଗ ଦେଇଥିଲେ । ୨୨ ବର୍ଷ ବୟସରେ ସେ ଲେବର ପାର୍ଟିରେ ସାମିଲ ହୋଇଥିଲେ । ୧୯୯୬ରେ ପ୍ରଥମ ଥର ଏମପି ହୋଇଥିଲେ ଆନ୍ଥୋନୀ ଆଲବାନିଜ । ତାପରେ ସେ ଆଉ କେବେ ପଛକୁ ଚାହିଁନଥିଲେ । ସେପଟେ ଦୀର୍ଘ ୧୦ ବର୍ଷ ଧରି ବିରୋଧୀ ଦଳ ନେତା ରହିବା ପରେ ୨୦୨୨ରେ ପ୍ରଧାନମନ୍ତ୍ରୀ ହେବାର ସୌଭାଗ୍ୟ ପାଇଲେ ଆଲବାନିଜ । ପୁଣି ୨୦୨୫ରେ ସେ ଦ୍ବିତୀୟ ଥର ପାଇଁ ପ୍ରଧାନମନ୍ତ୍ରୀ ନିର୍ବାଚନ ଜିତିଥିଲେ ।