ବ୍ରହ୍ମୋସ ସିଇଓଙ୍କୁ ବହିଷ୍କାର କରିବାକୁ ଟ୍ରିବ୍ୟୁନାଲର ନିର୍ଦ୍ଦେଶ: ନିଯୁକ୍ତିରେ ତ୍ରୁଟି ନେଇ ଅଭିଯୋଗ କରିଥିଲେ ବରିଷ୍ଠ ବୈଜ୍ଞାନିକ

ନୂଆଦିଲ୍ଲୀ: କେନ୍ଦ୍ରୀୟ ପ୍ରଶାସନିକ ଟ୍ରିବ୍ୟୁନାଲ୍ (CAT) ବ୍ରହ୍ମୋସ୍ ଏରୋସ୍ପେସର ମହାନିର୍ଦ୍ଦେଶକ ଏବଂ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO) ପଦରୁ ଜୈତୀର୍ଥ ଆର ଜୋଶୀଙ୍କୁ ବହିଷ୍କାର କରିବାକୁ ନିର୍ଦ୍ଦେଶ ଦେଇଛନ୍ତି। କାରଣ ଜୈତୀର୍ଥଙ୍କ ନିଯୁକ୍ତ ପ୍ରକ୍ରିୟାରେ ତୃଟି ରହିଛି ବୋଲି ଅଭିଯୋଗ ହୋଇଥିଲା। ବରିଷ୍ଠ ବୈଜ୍ଞାନିକ ଶିବସୁବ୍ରମଣ୍ୟମ ନାମ୍ବି ନାଇଡୁ ଜୋଶୀଙ୍କ ନିଯୁକ୍ତିକୁ ଚ୍ୟାଲେଞ୍ଜ କରିଥିଲେ। ଏହି ମାମଲାରେ କେନ୍ଦ୍ରୀୟ ପ୍ରଶାସନିକ ଟ୍ରିବ୍ୟୁନାଲ୍ ଯୋଶୀଙ୍କୁ ପଦରୁ ହଟାଇ ଶିବସୁବ୍ରମଣ୍ୟମ ନାମ୍ବି ନାଇଡୁଙ୍କ ଶୀର୍ଷ ପଦବୀ ପାଇଁ ଦାବିର ପୁନର୍ବିଚାର କରିବାକୁ ନିର୍ଦ୍ଦେଶ ଦେଇଛନ୍ତି।

ସୋମବାର ଦିଆଯାଇଥିବା ନିର୍ଦ୍ଦେଶରେ ହାଇଦ୍ରାବାଦ ବେଞ୍ଚ ଅଫ୍ ଟ୍ରିବ୍ୟୁନାଲ୍ ପ୍ରତିରକ୍ଷା ମନ୍ତ୍ରଣାଳୟ ଏବଂ ପ୍ରତିରକ୍ଷା ଗବେଷଣା ଏବଂ ବିକାଶ ସଂଗଠନ (DRDO)କୁ ଚାରି ସପ୍ତାହ ମଧ୍ୟରେ ନାଇଡୁଙ୍କ ଦାବିକୁ ପୁନଃ ବିଚାର କରିବାକୁ କହିଥିଲେ। ଚୂଡ଼ାନ୍ତ ନିଷ୍ପତ୍ତି ନ ନେବା ପର୍ଯ୍ୟନ୍ତ, ଜଣଙ୍କୁ ଏହି ଦାୟିତ୍ୱରେ ରଖିବାର ବ୍ୟବସ୍ଥା କରାଯାଉ ବୋଲି ସିଏଟି ନିର୍ଦ୍ଦେଶ ଦେଇଥିଲେ। ଫଳରେ ଯୋଶୀଙ୍କୁ ବର୍ତ୍ତମାନ ପାଇଁ ଦାୟିତ୍ୱରେ ରଖିବାକୁ ଟ୍ରିବ୍ୟୁନାଲ ମନା କରୁଥିବା ସ୍ପଷ୍ଟ ଜଣାପଡ଼ୁଛି।

ଟ୍ରିବ୍ୟୁନାଲ୍ ପ୍ରତିରକ୍ଷା ଗବେଷଣା ଏବଂ ବିକାଶ ସଚିବ ଏବଂ ଡିଆରଡିଓର ଅଧ୍ୟକ୍ଷଙ୍କ କ୍ଷମତା ଯାଞ୍ଚ କରି କହିଛନ୍ତି ଯେ ନିର୍ଦ୍ଦେଶକ ଜେନେରାଲ ପଦବୀ ପାଇଁ ଚୟନ କମିଟି ଦ୍ୱାରା ସୁପାରିଶ କରାଯାଇଥିବା ନାମଗୁଡ଼ିକ ମଧ୍ୟରୁ ଗୋଟିଏକୁ ଅନୁମୋଦନ କରିବାର କ୍ଷମତା ପ୍ରାଧିକରଣକୁ ଦିଆଯାଇଛି। କିନ୍ତୁ ଏହି ପଦବୀ ପାଇଁ ତାଲିକାଭୁକ୍ତ ଅନ୍ୟ ବୈଜ୍ଞାନିକଙ୍କ ସମ୍ପୂର୍ଣ୍ଣ ସେବା ରେକର୍ଡକୁ ଅଣଦେଖା କରାଯାଇପାରିବ ନାହିଁ।

ବ୍ରହ୍ମୋସ ଏରୋସ୍ପେସର ଡିଜି ଏବଂ ସିଇଓ ଭାବରେ ଜୋଶୀଙ୍କ ନିଯୁକ୍ତିକୁ ବରିଷ୍ଠ ଡିଆରଡିଓ ବୈଜ୍ଞାନିକ ନାଇଡୁ ଚ୍ୟାଲେଞ୍ଜ କରିଥିଲେ। ଅନ୍ୟାୟ ଭାବରେ ଜାଗାର ଅଧିଗ୍ରହଣ ଏବଂ ପ୍ରକ୍ରିୟାଗତ ଅନିୟମିତତା ଥିବା ସେ ଅଭିଯୋଗ କରିଥିଲେ। ନାଇଡୁ ଯୁକ୍ତି ଦେଇଥିଲେ ଯେ ସେ ଯୋଶୀଙ୍କଠାରୁ ସାତ ବର୍ଷ ବରିଷ୍ଠ ଥିଲେ ଏବଂ ବିଶିଷ୍ଟ ବୈଜ୍ଞାନିକ ମଧ୍ୟରେ ଉଚ୍ଚ ପଦବୀରେ ଥିଲେ। ତାଙ୍କ ନିଯୁକ୍ତି ସମୟରେ ଯୋଶୀ କେବଳ ବୈଜ୍ଞାନିକ 'ଏଚ୍' ଥିଲେ।

CAT ତାଙ୍କ ରାୟରେ ପ୍ରତିରକ୍ଷା ମନ୍ତ୍ରଣାଳୟ ଏବଂ DRDOକୁ ଜୋଶୀଙ୍କୁ ପଦବୀରୁ ହଟାଇବା, ଚୟନ ପ୍ରକ୍ରିୟା ପୁନଃ ଆରମ୍ଭ କରିବା, ନାଇଡୁ ଏବଂ ଅନ୍ୟ ବରିଷ୍ଠ ବୈଜ୍ଞାନିକଙ୍କ ଦାବିର ପୁନର୍ବିଚାର କରିବା ଏବଂ ଚାରି ସପ୍ତାହ ମଧ୍ୟରେ ବ୍ରହ୍ମୋସ ଏରୋସ୍ପେସ୍ ପାଇଁ ଜଣେ ମଧ୍ୟବର୍ତ୍ତୀକାଳୀନ ପ୍ରଭାରୀ ନିଯୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ତେଣୁ ଯୋଶୀଙ୍କୁ ସିଇଓ ଭୂମିକା ଗ୍ରହଣ କରିବାରୁ ବାରଣ କରାଯାଇଛି। ବ୍ରହ୍ମୋସ୍ ଏରୋସ୍ପେସ୍ ଏକ ଭାରତ-ରୁଷ ବହୁରାଷ୍ଟ୍ରୀୟ ଏରୋସ୍ପେସ୍ ଏବଂ ପ୍ରତିରକ୍ଷା ନିଗମ ଯାହା ବିଶ୍ୱର ସବୁଠାରୁ ଦ୍ରୁତତମ ସୁପରସୋନିକ୍ କ୍ରୁଜ୍ କ୍ଷେପଣାସ୍ତ୍ର ବ୍ରହ୍ମୋସ୍ ବିକଶିତ କରିବା ପାଇଁ ବିଶ୍ୱ ପ୍ରସିଦ୍ଧ। ଏଭଳି ଗୁରୁତ୍ୱପୂର୍ଣ୍ଣ ସ୍ଥାନରେ ନିଯୁକ୍ତି ନେଇ ସମସ୍ୟା ହେବା ଭାରତ ସୁରକ୍ଷା ଓ ପ୍ରତିରକ୍ଷା ବିକାଶ ଦିଗରେ ନିହାତି ପକ୍ଷେ ଚିନ୍ତାର ବିଷୟ।