ଟେନିସ୍ କ୍ୟାରିଅରର ଦି ଏଣ୍ଡ : ରାକେଟ୍ ଛାଡିଲେ ରୋହନ ବୋପନ୍ନା

ନୂଆଦିଲ୍ଲୀ ୦୧/୧୧ :  ଭାରତୀୟ ଟେନିସ୍ ଜଗତକୁ ଶକ୍ତ ଝଟ୍‌କା । ଅବସର ଘୋଷଣା କରିଛନ୍ତି ଦମଦାର୍ ଟେନିସ ତାରକା ରୋହନ ବୋପନ୍ନା ।  ଏନେଇ ସେ ପ୍ରଥମେ ସୋସିଆଲ ମିଡିଆରେ ସୂଚନା ଦେଇଛନ୍ତି । ଦୀର୍ଘ ୨୦ ବର୍ଷ ଧରି ସେ ଟେନିସ ଜଗତ ସହ ଜଡିତ ଥିଲେ । ରିଟାୟାରମେଣ୍ଟ ଘୋଷଣା ପରେ ଏବେ ତାହା ଶେଷ  ହୋଇଯାଇଛି । ଶେଷ ଥର ପାଇଁ ପ୍ୟାରିସରେ ଅନୁଷ୍ଠିତ ପ୍ୟାରିସ୍ ମାଷ୍ଟର୍ସ ୧୦୦୦ରେ ଭାଗ ନେଇଥିଲେ  ଭାଗ ନେଇଥିଲେ ରୋହନ ବୋପନ୍ନା । ଯେଉଁଥିରେ ଆଲେକଜାଣ୍ଡର ବବଲିକଙ୍କ ସହ ସେ ମିଳିତ ଭାବେ ଖେଳିଥିଲେ । ଅବସରକୁ ନେଇ ସେ ସୋସିଆଲ ମିଡିଆରେ ଲେଖିଛନ୍ତି  ଯେଉଁ ଖେଳ ତାଙ୍କ ଜୀବନକୁ ଏକ ଅର୍ଥ ପ୍ରଦାନ କରିଛି ତାହାଠାରୁ ସେ କେମିତି ବିଦାୟ ନେବେ । ୨୦ ବର୍ଷ ପରେ ଏବେ ରାକେଟ୍ ତ୍ୟାଗ କରିବା ନେଇ ସମୟ ଆସିଛି । ଭାରତ ପାଇଁ ପ୍ରତିନିଧିତ୍ବ କରିବା ତାଙ୍କ ଜୀବନର ସବୁଠୁ ବଡ ସମ୍ମାନ ଅଟେ । କୋର୍ଟରେ ଖେଳିବା ସମୟରେ ସବୁବେଳେ ଦେଶ ଏବଂ ତ୍ରିରଙ୍ଗା ପାଇଁ ସେ ଖେଳୁଥିବା ଉଲ୍ଲେଖ କରିଛନ୍ତି ।

ରୋହନ ବୋପନ୍ନା ଭାରତୀୟ ଟେନିସକୁ ଏକ ନୂଆ ଦିଗ ଦେଇଥିଲେ । ୨୦ ବର୍ଷର ଲମ୍ବା କ୍ୟାରିଅରରେ ସେ ଅନେକ ସଫଳତା ସାଉଁଟିଥିଲେ । ଡବଲ୍ସ ସ୍ପେଶାଲିଷ୍ଟ ଭାବରେ ବିଶ୍ବସ୍ତରରେ ସର୍ବଶ୍ରେଷ୍ଠ ଖେଳାଳି ଭାବେ ତାଙ୍କର ଖ୍ୟାତି ରହିଥିଲା । ସେ ଦୁଇଟି ଗ୍ରାଣ୍ଡ୍ ସ୍ଲାମ୍ ଚାମ୍ପିଅନ ହେବା ସହ ଅନେକ ଅନ୍ତର୍ଜାତୀୟ ମଂଚରେ ଦେଶର ଗରିମା ବୃଦ୍ଧି କରିଥିଲେ । ତାଙ୍କ ପାଇଁ ବୟସ କେବଳ ଏକ ନମ୍ବର୍ ଥିଲା । ୪୦ ବର୍ଷରେ ବି ସେ ଫିଟ୍ ରହିଥିଲେ । ଏପରିକି ଗ୍ରାଣ୍ଡ୍ ସ୍ଲାମ୍ ଫାଇନାଲରେ ସ୍ଥାନ ପକ୍କା କରିଥିଲେ । ଯାହା ଅନ୍ୟ ଯୁବ ଖେଳାଳିଙ୍କ ପାଇଁ ପ୍ରେରଣା ଥିଲା । ୨୦୧୭ରେ ବୋପନ୍ନା ଫ୍ରାନ୍ସ ଓପନ ଡବଲ୍ସରେ ବିଜୟୀ ହୋଇଥିଲେ । ୨୦୨୪ରେ ମାଥ୍ୟୁ ଏବଡନଙ୍କ ସହ ଅଷ୍ଟ୍ରେଲିଆନ୍ ଓପନ ଜିତି ଇତିହାସ ରଚନା କରିଥିଲେ ।