ମାଲକାନଗିରିରେ ଆଉ ୨୪ ଘଣ୍ଟା ବଢିଲା ଇଣ୍ଟରନେଟ୍ କଟକଣା, ଶନିବାର ରାତି ୧୨ଟା ଯାଏ ଜାରି

ମାଲକାନଗିରି ୧୨।୧୨: ମାଲକାନଗିରି ଏମ୍‌ଭି-୨୬ ଏବଂ ରଖଲାଗୁଡ଼ା ଗାଁରେ ହିଂସା ଘଟଣାରେ ଆଉ ୨୪ ଘଣ୍ଟା ବଢିଲା ଇଣ୍ଟରନେଟ୍ କଟକଣା । ଏମ୍‌ଭି-୨୬ ଏବଂ ରଖେଲଗୁଡ଼ା ଗାଁ ମଧ୍ୟରେ ବିବାଦକୁ ନେଇ ନିଷ୍ପତ୍ତି । ପଞ୍ଚମ ଥର ପାଇଁ ବଢିଲା ଇଣ୍ଟରନେଟ୍ କଟକଣା । ଶନିବାର ରାତି ୧୨ଟା ଯାଏ କଟକଣା । ଆଇନଶୃଙ୍ଖଳାକୁ ଦୃଷ୍ଟିରେ ରଖି ପ୍ରଶାସନର ନିଷ୍ପତ୍ତି ।

ମାଲକାନଗିରି ଜିଲ୍ଲା ଏମ୍‌ଭି-୨୬ ଓ ରାଖାଲଗୁଡା ଗାଁରେ ବର୍ତ୍ତମାନ ସୁଦ୍ଧା ବିଏନ୍‌ଏସ୍‌ ୧୬୩ ଲାଗୁ ରହିଛି । ମାଲକାନଗିରି ଜିଲ୍ଲାର ଲୋକ ପର୍ବ ମାଲ୍ୟବନ୍ତ ମହୋତ୍ସବ ୨୦୨୫ ସ୍ଥଗିତ ହୋଇଛି । ଜିଲ୍ଲାରେ ଏହି ସମୟରେ ସମସ୍ତ ଯାତ୍ରା ଉପରେ କଟକଣା ରହିଛି । ସୂଚନା ଦେଇଛନ୍ତି ମାଲକାନଗିରି ଜିଲ୍ଲାପାଳ ସୋମେଶ ଉପାଧ୍ୟାୟ ।

​​​​​​​ସେପଟେ, ମାଲକାନଗିରି ଆଇନ ଶୃଙ୍ଖଳା ସ୍ଥିତି ନେଇ ମୁଖ୍ୟମନ୍ତ୍ରୀଙ୍କୁ ରିପୋର୍ଟ ଦେଇଛନ୍ତି ଉପମୁଖ୍ୟମନ୍ତ୍ରୀ । ବିଭିନ୍ନ ଦିଗକୁ ତର୍ଜମା କରି ଫେରିବା ପରେ ଲୋକସେବା ଭବନରେ ମୁଖ୍ୟମନ୍ତ୍ରୀଙ୍କୁ ରିପୋର୍ଟ ପ୍ରଦାନ କରିଛନ୍ତି ଉପ ମୁଖ୍ୟମନ୍ତ୍ରୀ କେ.ଭି. ସିଂହଦେଓ ଓ ମତ୍ସ୍ୟ ସମ୍ପଦ ମନ୍ତ୍ରୀ ଗୋକୁଳା ନନ୍ଦ ମଲ୍ଲିକ ।

ମନ୍ତ୍ରୀ ଗୋକୁଳା ନନ୍ଦ ମଲ୍ଲିକ କହିଛନ୍ତି, ଜିଲ୍ଲା ପ୍ରଶାସନ ଓ ଉଭୟ ସଂପ୍ରଦାୟ ସହ ଆଲୋଚନା ହୋଇଛି । ସେହି ଅନୁସାରେ ରିପୋର୍ଟ ପ୍ରସ୍ତୁତ କରାଯାଇ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରାଯାଇଛି । ଯାହା ଉଚିତ ମୁଖ୍ୟମନ୍ତ୍ରୀ ପଦକ୍ଷେପ ନେବେ । ଉଭୟ ସଂପ୍ରଦାୟ ଶାନ୍ତି ଚାହୁଁଛନ୍ତି । ବର୍ତ୍ତମାନ ସ୍ଥିତି ନିୟନ୍ତ୍ରଣରେ ଅଛି । ଅନେକ କାରଣ ରହିଛି । ସରଜମିନ ତଦନ୍ତ କରାଯାଇଛି । ଦୁଇ ସମ୍ପ୍ରଦାୟ ସହ ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ସହିତ ଆଲୋଚନା ହୋଇଛି । ସମସ୍ତେ ଶାନ୍ତି ଚାହୁଁଛନ୍ତି ।