Sarfaraz Ahmed Retirement from International Cricket: ଆନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କଲେ ପାକିସ୍ତାନର ପୂର୍ବତନ ଅଧିନାୟକ ସରଫରାଜ ଅହମ୍ମଦ

ଇସଲାମାବାଦ: ପାକିସ୍ତାନର ପୂର୍ବତନ ଅଧିନାୟକ ତଥା ୱିକେଟକିପର ବ୍ୟାଟର ସରଫରାଜ ଅହମ୍ମଦ ଆନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସ ନେଇଛନ୍ତି। ଏହା ସହିତ ତାଙ୍କର ୧୫ ବର୍ଷର ଲମ୍ବା ତଥା ସଫଳ କ୍ରିକେଟ୍ କ୍ୟାରିୟରର ଅନ୍ତ ଘଟିଛି। ୨୦୦୭ ରୁ ୨୦୨୩ ପର୍ଯ୍ୟନ୍ତ ସେ ପାକିସ୍ତାନ ଜାତୀୟ ଦଳର ପ୍ରତିନିଧିତ୍ୱ କରିଥିଲେ ଏବଂ ଦେଶକୁ ଅନେକ ଐତିହାସିକ ସଫଳତା ଭେଟି ଦେଇଥିଲେ।

ଐତିହାସିକ ଆଇସିସି ଟାଇଟଲ୍ ବିଜେତା ଅଧିନାୟକ

ସରଫରାଜଙ୍କ ନେତୃତ୍ୱରେ ପାକିସ୍ତାନ ୨୦୧୭ ଆଇସିସି ଚାମ୍ପିୟନ୍ସ ଟ୍ରଫି (ICC Champions Trophy) ଜିତି ଏକ ବଡ଼ ଇତିହାସ ରଚିଥିଲା। ଟୁର୍ଣ୍ଣାମେଣ୍ଟ ଆରମ୍ଭରୁ ସବୁଠୁ ତଳ ମାନ୍ୟତାରେ ଥିବା ପାକିସ୍ତାନ ଫାଇନାଲରେ ଚିରପ୍ରତିଦ୍ୱନ୍ଦ୍ୱୀ ଭାରତକୁ ହରାଇ ଏହି ସମ୍ମାନଜନକ ଟାଇଟଲ୍ ହାସଲ କରିଥିଲା। ଇମ୍ରାନ ଖାନଙ୍କ ପରେ ସେ ହେଉଛନ୍ତି ପ୍ରଥମ ପାକିସ୍ତାନୀ ଅଧିନାୟକ ଯିଏକି ଦଳକୁ ୫୦-ଓଭର ଫର୍ମାଟରେ ଆଇସିସି ଟାଇଟଲ୍ ଜିତାଇଥିଲେ। ଏହା ପୂର୍ବରୁ ୨୦୦୬ ରେ ତାଙ୍କ ନେତୃତ୍ୱରେ ପାକିସ୍ତାନ ଅଣ୍ଡର-୧୯ (U-19) ବିଶ୍ୱକପ୍ ମଧ୍ୟ ଜିତିଥିଲା।

Also Read: Abrar Ahmed: କାବ୍ୟା ମାରାନଙ୍କୁ ବଡ଼ ଝଟକା, ଅଢେଇ କୋଟିରେ କିଣିଥିବା ପାକିସ୍ତାନୀ ସ୍ପିନର ଖେଳିବେନି 'ଦି ହଣ୍ଡ୍ରେଡ୍' ଟୁର୍ଣ୍ଣାମେଣ୍ଟ!

ଟି-୨୦ କ୍ରିକେଟରେ ସଫଳ ନେତୃତ୍ୱ

୨୦୧୬ ରେ ଟି-୨୦ ଦଳର ଅଧିନାୟକ ହେବା ପରେ ସେ ପାକିସ୍ତାନକୁ ଏକ ଶକ୍ତିଶାଳୀ ଦଳରେ ପରିଣତ କରିଥିଲେ। ତାଙ୍କ ଅଧିନାୟକତ୍ୱରେ ପାକିସ୍ତାନ ଲଗାତାର ୧୧ଟି ଟି-୨୦ ସିରିଜ୍ ଜିତିବା ସହ ଆଇସିସି ମାନ୍ୟତାରେ ଏକ ନମ୍ବର ସ୍ଥାନ ହାସଲ କରିଥିଲା। ସମସ୍ତ ଫର୍ମାଟକୁ ମିଶାଇ ସେ ୧୦୦ଟି ମ୍ୟାଚରେ (୧୩ ଟେଷ୍ଟ, ୫୦ ଦିନିକିଆ, ୩୭ ଟି-୨୦) ପାକିସ୍ତାନର ନେତୃତ୍ୱ ନେଇଥିଲେ।

ବ୍ୟକ୍ତିଗତ ରେକର୍ଡ ଏବଂ କ୍ୟାରିୟର ଷ୍ଟାଟିଷ୍ଟିକ୍ସ

ସରଫରାଜ ନିଜ କ୍ୟାରିୟରରେ ୫୪ଟି ଟେଷ୍ଟ ଖେଳି ୪ଟି ଶତକ ସହ ୩,୦୩୧ ରନ୍ କରିଥିବା ବେଳେ ୧୧୭ ଦିନିକିଆରେ ୨,୩୧୫ ରନ୍ ଏବଂ ୬୧ ଟି-୨୦ ରେ ୮୧୮ ରନ୍ ସଂଗ୍ରହ କରିଛନ୍ତି। ଜଣେ ଉତ୍କୃଷ୍ଟ ୱିକେଟକିପର ଭାବେ ସେ ଆନ୍ତର୍ଜାତୀୟ କ୍ରିକେଟରେ ୩୧୫ଟି କ୍ୟାଚ୍ ଏବଂ ୫୬ଟି ଷ୍ଟମ୍ପିଂ କରିଛନ୍ତି। ୨୦୨୨ ରେ କରାଚିଠାରେ ନ୍ୟୁଜିଲ୍ୟାଣ୍ଡ ବିପକ୍ଷରେ ସେ ଖେଳିଥିବା ୧୧୮ ରନ୍ର ଲଢୁଆ ଇନିଂସ୍ ତାଙ୍କ କ୍ୟାରିୟରର ଅନ୍ୟତମ ଶ୍ରେଷ୍ଠ ଇନିଂସ୍ ଭାବେ ବିବେଚନା କରାଯାଏ।

Also Read: ଭାରତୀୟ ଫୁଟବଲ୍ ଜଗତ ପାଇଁ ଦୁଃଖଦ ଖବର, ଖେଳୁଥିବା ବେଳେ ଚାଲିଗଲା ଯୁବ ଡିଫେଣ୍ଡରଙ୍କ ଜୀବନ

ନୂଆ ଦାୟିତ୍ୱ ସହ କ୍ରିକେଟକୁ ବିଦାୟ

ଅବସର ଘୋଷଣା କରିବା ଅବସରରେ ସରଫରାଜ ପାକିସ୍ତାନ କ୍ରିକେଟ୍ ବୋର୍ଡ (PCB) ଦ୍ୱାରା ଜାରି ଏକ ବିବୃତ୍ତିରେ କହିଛନ୍ତି, "ପାକିସ୍ତାନର ପ୍ରତିନିଧିତ୍ୱ କରିବା ମୋ ଜୀବନର ସବୁଠାରୁ ବଡ଼ ସମ୍ମାନ। ୨୦୦୬ରେ ୟୁ-୧୯ ଟାଇଟଲ୍ ଜିତିବା ଠାରୁ ଆରମ୍ଭ କରି ୨୦୧୭ରେ ଚାମ୍ପିୟନ୍ସ ଟ୍ରଫି ଉଠାଇବା ପର୍ଯ୍ୟନ୍ତ, ପାକିସ୍ତାନ ଜର୍ସିରେ ମୋର ପ୍ରତ୍ୟେକ ମୁହୂର୍ତ୍ତ ସ୍ୱତନ୍ତ୍ର ଥିଲା।" ୨୦୨୩ ଡିସେମ୍ବରରେ ଅଷ୍ଟ୍ରେଲିଆ ବିପକ୍ଷ ପର୍ଥ ଟେଷ୍ଟ ତାଙ୍କର ଶେଷ ଆନ୍ତର୍ଜାତୀୟ ମ୍ୟାଚ୍ ଥିଲା। ଅବସର ପରେ ତାଙ୍କୁ ଜାତୀୟ ପୁରୁଷ ଚୟନ କମିଟିର ସଦସ୍ୟ ଭାବେ ନୂଆ ଦାୟିତ୍ୱ ଦିଆଯାଇଛି।