ପରମାଣୁ ଶକ୍ତି ସମ୍ପନ୍ନ ବୁଡ଼ା ଜାହାଜ ଡିଲ୍ ଖବର ମିଛ: ସରକାର କହିଲେ ଋଷ ସହ ହୋଇନି କୌଣସି ନୂଆ ଚୁକ୍ତି

ନୂଆଦିଲ୍ଲୀ: ଭାରତ ଋଷ ଠାରୁ ପରମାଣୁ ଶକ୍ତି ସମ୍ପନ୍ନ ବୁଡ଼ା ଜାହାଜ ଲିଜ୍ ନେବା ପାଇଁ ୨ ବିଲିଅନ ଆମେରିକୀୟ ଡଲାରର ଚୁକ୍ତି କରିଛି ବୋଲି କିଛି ଘଣ୍ଟା ପୂର୍ବରୁ ଖବର ପ୍ରକାଶ ପାଇଥିଲା। ନ୍ୟୁଜ ଏଜେନ୍ସି ବ୍ଲୁମବର୍ଗ ରିପୋର୍ଟ ଆଧାରରେ ଗୁରୁବାର ଅନ୍ୟ ଗଣମାଧ୍ୟମଗୁଡ଼ିକ ଖବର ପ୍ରକାଶ କରିଥିଲେ। ହେଲେ ଭାରତ ସରକାର ଏଭଳି ରିପୋର୍ଟକୁ ଖଣ୍ଡନ କରିଛନ୍ତି। ଋଷ ସହିତ ସେଭଳି କୌଣସି ଡିଲ୍ ହୋଇ ନାହିଁ ବୋଲି କେନ୍ଦ୍ର ସରକାର କହିଛନ୍ତି।

#PIBFactCheck ଟ୍ୟାଗ୍ ହୋଇଥିବା ଏକ ପୋଷ୍ଟରେ, ସରକାର କହିଛନ୍ତି ଯେ ଏହି ଦାବି ସମ୍ପୂର୍ଣ୍ଣ ଭ୍ରାମକ। ଋଷ ସହ କୌଣସି ନୂଆ ଚୁକ୍ତି ହୋଇନାହିଁ। ରିପୋର୍ଟରେ ଯେଉଁ ସବମରିନ ଡିଲ୍ କଥା କୁହାଯାଇଥିଲା ତାହା ମାର୍ଚ୍ଚ ୨୦୧୯ ରେ ହୋଇଥିବା ଏକ ଚୁକ୍ତି। ଏଥିରେ ସବମରିନ ଡେଲିଭରିରେ ବିଳମ୍ବିତ ହୋଇଛି, ବର୍ତ୍ତମାନ ଏହାର ଡେଲିଭରି ୨୦୨୮ ସୁଦ୍ଧା କରିବାକୁ ସ୍ଥିର କରାଯାଇଛି। ଭାରତ ସରକାରଙ୍କର ଏହି ସ୍ପଷ୍ଟୀକରଣ ସତ୍ତ୍ୱେ ବି ଉଭୟ ଦେଶଙ୍କ ମଧ୍ୟରେ କିନ୍ତୁ ପରମାଣୁ ଶକ୍ତି ସମ୍ପନ୍ନ ବୁଡ଼ା ଜାହାଜ ଲିଜ୍ ନେଇ ଆଲୋଚନା ଜାରି ରହିଛି।

ଏହା ପୂର୍ବରୁ ବ୍ଲୁମବର୍ଗରେ ପ୍ରକାଶିତ ରିପୋର୍ଟ ଅନୁସାରେ, ଭଡ଼ାରେ ଆଣିବାକୁ ଋଷ ଅଧିକ ଦାମ କହୁଥିବାରୁ ଉଭୟ ଦେଶ ମଧ୍ୟରେ ଡିଲ୍ ଫାଇନାଲ ହୋଇପାରୁ ନଥିଲା। ଏଥିପାଇଁ ଦଶନ୍ଧୀ ଧରି ଆଲୋଚନା ଚାଲିଥିଲା। ଏବେ ଦୁଇ ଦେଶର ଅଧିକାରୀ ଆଲୋଚନା ମାଧ୍ୟମରେ ଥିବା ସର୍ତ୍ତ ପୂରଣ କରିଛନ୍ତି। ଏଥିପାଇଁ ଜଣେ ଭାରତୀୟ ଅଧିକାରୀ ନେଭେମ୍ବର ମାସରେ ଋଷର ଶିପୟାର୍ଡରେ ବୁଡ଼ାଜାହାଜର ପ୍ରଡକ୍ସନ ଫେସିଲିଟି ପ୍ରୋଗ୍ରେସର ସମୀକ୍ଷା କରିବାକୁ ଯାଇଥିଲେ ବୋଲି ବ୍ଲୁମବର୍ଗ ରିପୋର୍ଟରେ ଉଲ୍ଲେଖ କରିଥିଲା।

ପରମାଣୁ ଶକ୍ତି ସମ୍ପନ୍ନ ବୁଡ଼ାଜାହାଜଗୁଡ଼ିକୁ ଡିଜେଲ-ଇଲେକ୍ଟ୍ରିକ୍ ଜାହାଜ ତୁଳନାରେ ବହୁତ ଉନ୍ନତ ବୋଲି ବିବେଚନା କରାଯାଏ। କାରଣ ଏଗୁଡ଼ିକ ଅଧିକ ସମୟ ବୁଡ଼ି ରହିପାରିବ। ବେଶି ଶବ୍ଦ ନ କରି ନୀରବରେ ଚାଲିପାରିବ। ସାଧାରଣତଃ ଆକାରରେ ବଡ଼ ହୋଇଥିଲେ ବି ଏହାକୁ ସହଜରେ ଚିହ୍ନଟ କରିବା କଷ୍ଟକର। ବିଶେଷକରି ଭାରତ ଏବଂ ପ୍ରଶାନ୍ତ ମହାସାଗରର ବିସ୍ତୃତ ଜଳ ରାଶିରେ ଏହି ବୁଡ଼ା ଜାହାଜକୁ ଚିହ୍ନଟ କରିବା କଷ୍ଟର ହୋଇପାରେ।