ଡବଲ ଇଞ୍ଜିନ ସରକାର କେବେ ବି ଦୁର୍ନୀତିକୁ ପ୍ରଶ୍ରୟ ଦେବନାହିଁ, ଯେତେ ପ୍ରଭାବଶାଳୀ ବ୍ୟକ୍ତି ହୋଇଥିଲେ ବି ଛଡ଼ାଯିବ ନାହିଁ

ଭୁବନେଶ୍ବର ୨୫।୨: ଖଣି ଅଧିକାରୀଙ୍କ ଘରେ ଟଙ୍କାର ଖଣି । ଭିଜିଲାନ୍ସ ରେଡ୍ ବେଳେ ଯାହା ପାଇଛି ଆଖି ଟେରା ହୋଇଯାଇଛି । ଭୁବନେଶ୍ବର ସ୍ଥିତ ବାବୁଙ୍କ ଘରୁ ବାହାରିଛି ୪ କୋଟି ନଗଦ ଟଙ୍କା । ତେବେ ଏହି ଘଟଣାକୁ ନେଇ ବିଜେପି ବିଧାୟକ ସନାତନ ବିଜୁଳି ବଡ଼ ବୟାନ ରଖିଛନ୍ତି । ସେ କହିଛନ୍ତି, ଇଏ ୨୪ ବର୍ଷର ଚେର । ଯାହାକୁ ଗୋଟିଏ ପରେ ଗୋଟିଏ ବାହାର କରାଯାଉଛି । ପୂର୍ବ ସରକାରରେ ଏମିତିକା ସବୁ ଦୁର୍ନୀତିଗ୍ରସ୍ତ ଅଧିକାରୀ ଥିଲେ । ତାଙ୍କର ସବୁ ଗୋଟେ ପରେ ଗୋଟେ ପର୍ଦ୍ଦାଫାଶ ହେଉଛି । ଆହୁରି ବଡ଼ ବଡ଼ ମାଛ ଆଗକୁ ଧରାପଡ଼ିବେ । ଏ ସରକାରରେ ଯିଏ ବି ଦୁର୍ନୀତି କରିବ ତାକୁ ନିସ୍ତାର ନାହିଁ । ଡବଲ ଇଞ୍ଜିନ ସରକାର କେବେ ବି ଦୁର୍ନୀତିକୁ ପ୍ରସୟ ଦେବନାହିଁ । ଯେତେ ପ୍ରଭାବଶାଳୀ ବ୍ୟକ୍ତି କିମ୍ୱା ଯେତେ ବଡ଼ ଅଧିକାରୀ ହୋଇଥିଲେ ବି କାହାକୁ ଛଡ଼ାଯିବ ନାହିଁ । ଯିଏ ଦୁର୍ନୀତି କରିବ ତାଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ।

ଏ ଖବର ବି ପଢ଼ନ୍ତୁ:- ଆହୁରି କଡ଼ାକଡି ହେବ ଭିଜିଲାନ୍ସ ଚଢାଉ ପ୍ରକ୍ରିୟା, ଦୁର୍ନୀତି ଖୋରଙ୍କ ପାଇଁ ଆଇ ଓପନର ହେଉ

ସୂଚନାଯୋଗ୍ୟ ଯେ,ଭିଜିଲାନ୍ସ ଜାଲରେ ଖଣି ବିଭାଗର କଟକ ସର୍କଲ ଉପ ନିର୍ଦ୍ଦେଶକ ଦେବବ୍ରତ ମହାନ୍ତି ।ଲାଞ୍ଚ ନେଇ ଧରା ପଡ଼ିବା ପରେ ଆରମ୍ଭ ହୋଇଛି ଆୟ ବହିର୍ଭୂତ ସମ୍ପତ୍ତିର ଖୋଳତାଡ଼ । ସଂପୃକ୍ତ ଉପନିର୍ଦ୍ଦେଶକଙ୍କ ଘରେ ରାତି ଅଧିଆ ରେଡ୍ କରିଛି ଭିଜିଲାନ୍ସ । ଭୁବନେଶ୍ୱର ସ୍ଥିତ ଶ୍ରୀବିହାର ଘର ସମେତ କଟକ ସ୍ଥିତ କାର୍ଯ୍ୟାଳୟ ଓ ଅନ୍ୟାନ୍ୟ ସ୍ଥାନରେ ଭିଜିଲାନ୍ସ ରେଡ୍ କରିଥିବା ସୂଚନା ମିଳିଛି । ଖଣି ଅଧିକାରୀଙ୍କ ଘରୁ ମିଳିଛି ପୁଳା ପୁଳା ଟଙ୍କା । ଘରେ ଚଢାଉ ବେଳେ ୪ କୋଟି ଟଙ୍କାର ନଗଦ ମିଳିଛି । ଟଙ୍କାକୁ ଟ୍ରଲି ବ୍ୟାଗ ଓ ଆଲମିରାରେ ରଖିଥିଲେ ଅଧିକାରୀ ।

ଏ ଖବର ବି ପଢ଼ନ୍ତୁ:- ଜୀବନ ଗଲା ପରେ ଚେତା ପଶିଲା, ଆସନ୍ତା ୬ ତାରିଖରୁ ହଟିବ ବେଆଇନ ହୋର୍ଡିଂ

ଖଣି ଅଧିକାରୀଙ୍କ କାର୍ଯ୍ୟାଳୟରେ ଚଢାଉ ବେଳେ ନଗଦ ୧ ଲକ୍ଷ ୨୦ ହଜାର ଟଙ୍କା ମିଳିଛି । ଭିଜିଲାନ୍ସ ଇତିହାସରେ ଏକକାଳୀନ ସର୍ବାଧିକ ଟଙ୍କା ଜବତ । ଆଖି ଝଲସିଗଲା ଭଳି ଜବତ ହୋଇଛି ନଗଦ ଟଙ୍କା । ଟ୍ରଲି ବ୍ୟାଗରୁ ବାହାରିଲା ବିଡ଼ାବିଡ଼ା ଟଙ୍କା । ବାବୁଙ୍କ ଟଙ୍କା ଖଣି ଦେଖି ଭିଜିଲାନ୍ସ ଅଧିକାରୀ କାବା । ସେହିପରି ୧୩୦ ଗ୍ରାମ୍ ସୁନା ଓ ଭୁବନେଶ୍ୱରର ପାହାଳରେ ପ୍ରାୟ ୨୪୦୦ ବର୍ଗଫୁଟରେ ନିର୍ମିତ ଏକ ଦୁଇ ମହଲା କୋଠା ଠାବ ହୋଇଛି ।