ନିଆଁ ପିଣ୍ଡୁଳା ସାଜିଲା କଣ୍ଟେନର , ରାସ୍ତାରେ ୮ କି.ମି ଯାଏ ଜଳି ଚାଲିଥିଲା ଲକ୍ଷ ଲକ୍ଷ ଟଙ୍କାର ଶାଢୀ !

ହାଥରସ : ଉତ୍ତର ପ୍ରଦେଶର ହାଥରସ ଜିଲ୍ଲାରେ ଏକ ଆଶ୍ଚର୍ଯ୍ୟକର ମାମଲା ସାମ୍ନାକୁ ଆସିଛି। ଏଠାରେ ସୁରତରୁ ଶାଢୀ ନେଇ ଆସୁଥିବା ଏକ କଣ୍ଟେନର ଉପରେ ବିଦ୍ୟୁତ୍‌ ତାର ଛିଣ୍ଡି ଯିବାରୁ ନିଆଁ ଲାଗି ଯାଇଥିଲା। ଡ୍ରାଇଭରଙ୍କ ଉପସ୍ଥିତ ବୁଦ୍ଧି ଯୋଗୁଁ ନିଆଁରେ ପୋଡ଼ି ଯାଇଥିବା କଣ୍ଟେନରଟି ସହର ବାହାରେ ୮ କିଲୋମିଟର ପର୍ଯ୍ୟନ୍ତ ଚାଲିଥିଲା। ଏହି ଘଟଣାର ଲାଇଭ୍ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି।

ଆଜତକ୍‌ ଡଟ୍‌ ଇନ୍‌ରେ ପ୍ରକାଶିତ ତଥ୍ୟ ଅନୁସାରେ,  ହାଥରସରେ, ଏକ କଣ୍ଟେନର ରାସ୍ତାରେ ୮ କିଲୋମିଟର ପର୍ଯ୍ୟନ୍ତ ଟାଣି ହୋଇ ଯାଇଥିଲା। ଏହି ଘଟଣାଟି ୨୪ ଅକ୍ଟୋବର ରାତିରେ ଘଟିଥିଲା। ଉକ୍ତ କଣ୍ଟେନର ଉତ୍ତର ପ୍ରଦେଶର ହାଥରସର ଏକ ଆବାସିକ ଅଞ୍ଚଳ ମଧୁଗଢ଼ୀରେ ଠିଆ ହୋଇ ଥିଲା। କଣ୍ଟେନର ଭିତରେ ଲକ୍ଷ ଲକ୍ଷ ଟଙ୍କାର ଶାଢୀ ଜଳୁଥିଲା।

ଏହି କଣ୍ଟେନରରେ ବିଦ୍ୟୁତ୍‌ ଲାଇନ୍‌ର ତାର ଛିଣ୍ଡି ପଡ଼ିବାରୁ ନିଆଁ ଲାଗି ଯାଇ ଥିଲା। ଚାଳକ ଜଳନ୍ତା କଣ୍ଟେନରକୁ ସହରର ବାହାର ୮ କିଲୋମିଟର ଦୂର ନଗଲା ଭୂସ ଛକ ଯାଏ ନେଇ ଯାଇ ଥିଲେ। ଅଗ୍ନିଶମ ବାହିନୀର ଟିମ୍‌ ୮ କିଲୋମିଟର ଯାଏ ଜଳୁଥିବା କଣ୍ଟେନରର ପିଛା କରିଥିଲେ।

କଣ୍ଟେନରରେ ଲାଗିଥିବା ନିଆଁ ପରେ ଡ୍ରାଇଭର ବିପଦ ଥିବା ଜାଣି ଏହାକୁ ଜନବସତିର ବାହାରକୁ ନେଇ ଯିବାକୁ ନିଷ୍ପତ୍ତି ନେଲେ। ସେ ଜଳୁଥିବା କଣ୍ଟେନରକୁ ନେଇ ୮ କିଲୋମିଟର ଯାଏ ପଳାଇ ଥିଲେ। ଏହି ସମୟରେ ଭିତରେ ରଖାଯାଇ ଥିବା ଲକ୍ଷ ଲକ୍ଷ ଟଙ୍କାର ଶାଢୀ ଜଳୁଥିଲା। ନିଆଁର ଆସ୍ତରଣରେ ଘେରି ରହିଥିବା କଣ୍ଟେନରର ଏହି ଦୃଶ୍ୟ ଦେଖି ଲୋକେ ଭୟଭୀତ ହୋଇ ଯାଇଥିଲେ।

ଅନ୍ୟପଟେ ସୂଚନା ପାଇବା ପରେ ଘଟଣା ସ୍ଥଳରେ ପହଞ୍ଚି ଅଗ୍ନିଶମ ଟିମ୍‌ ମଧ୍ୟ କଣ୍ଟେନରର ପଛରେ ଯାଇଥିଲେ। କୌଣସି ମୃତାହତର ସୂଚନା ମିଳି ନାହିଁ।