ଏବେ ସରିବନି ଯୁଦ୍ଧ, ବିଶ୍ୱରେ ବଢିଯିବ ପେଟ୍ରୋଲ-ଡିଜେଲ ଦାମ୍ ! ଭାରତରେ ପଡିବ କି ପ୍ରଭାବ ?

ତେହେରାନ, ୦୧ /୦୩: ଇରାନ-ଇସ୍ରାଏଲ ଯୁଦ୍ଧ ଏବେ ଭୟଙ୍କର ରୂପ ନେଇଛି । ପ୍ରାଣ ହରାଇଛନ୍ତି ଇରାନର ସର୍ବୋଚ୍ଚ ନେତା ଖାମେନି । ପ୍ରଥମେ ଇସ୍ରାଏଲ- ଆମେରିକା ଏକତ୍ର ହୋଇ ଇରାନର ୩୦ରୁ ଅଧିକ ଠିକଣାରେ ଆକ୍ରମଣ କରିଥିଲେ । ପରେ ଇରାନ ଇସ୍ରାଏଲ ସମେତ ଆମେରିକାର ୭ଟି ସୈନ୍ୟ ଆଡ୍ଡା ଉପରେ କରିଛି ହମଲା । କୁଏତ୍, ୟୁଏଇ, କତାର ଏବଂ ବହରୀନ ଭଳି ଠିକଣାରେ ଇରାନ ମିସାଇଲ ମାଡ଼ କରିଛି । ଯୁଦ୍ଧରେ ୭ରୁ ୮ ଦେଶ ସାମିଲ ହୋଇସାରିଲେଣି । ଇରାନ ମଧ୍ୟପ୍ରାଚ୍ୟସ୍ଥିତ ଆମେରିକାର ସାମରିକ ଘାଟିକୁ ଟାର୍ଗେଟ କରିଛି । ଲେବାନନ ଏବଂ ହୁତି ଭଳି ଦେଶ ବି ଇରାନ ପକ୍ଷରୁ ଆକ୍ରମଣ କରୁଛନ୍ତି । ଇସ୍ରାଏଲ୍ ଉପରେ ଅନେକ ଦେଶ ପକ୍ଷରୁ ହମଲା ହେଉଛି ।

ଏଭଳି ସ୍ଥିତିରେ ଭୟ ସୃଷ୍ଟି ହୋଇଛି ଯେ, ଯୁଦ୍ଧ କେତେ ଲମ୍ବା ଚାଲିବ ତଥା କେତେ ଭୟଙ୍କର ହେବ । ଅନୁମାନ ଲଗାଇବା ମୁସ୍କିଲ । ତେବେ ଯୁଦ୍ଧ ଯୋଗୁ ବିଶ୍ୱ ଅର୍ଥବ୍ୟବସ୍ଥାରେ ଅସ୍ଥିରତା ଆଶଙ୍କା ବଢ଼ିଯାଇଛି । ଦୋଳାୟମାନ ଅବସ୍ଥାରେ ବଜାର । ଭାରତ ସମେତ ବିଶ୍ୱବ୍ୟାପୀ ନିବେଶକ ଭୟଭୀତ । ବିଶେଷଜ୍ଞଙ୍କ କହିବାନୁସାରେ, ଏହି ହମ୍ଲା ଦ୍ୱାରା ଅଶୋଧିତ ତୈଳ ଦରରେ ଉଛାଳ ଆସିବା ଥୟ, ଯାହା ଦରଦାମ ସମସ୍ୟାକୁ ତେଜିବ । ଭାରତ ସମେତ ଅନେକ ଦେଶ ଷ୍ଟ୍ରେଟ୍ ଅଫ୍ ହୋର୍ମୁଜ ଦେଇ ଅଶୋଧିତ ତୈଳ ଆମଦାନି କରିଥାନ୍ତି । ଯୁଦ୍ଧ ସମୟରେ ଏହି ବାଟକୁ ବନ୍ଦ କରିଦେଇଛି ଇରାନ । ଫଳରେ ତୈଳ ଜାହାଜ ଚଳାଚଳ ହୋଇଯାଇଛି ଠପ । ଅଶୋଧିତ ତୈଳ ଯୋଗାଣ ବାଧାପ୍ରାପ୍ତ ହୋଇଛି । ପ୍ରଭାବରେ ଭୟଙ୍କର ମାତ୍ରାରେ ବଢ଼ିପାରେ ତୈଳ ଦର । ଘରୋଇ ବଜାରରେ ମହଙ୍ଗା ହୋଇଯିବ ପେଟ୍ରୋଲ ଏବଂ ଡିଜେଲ । ଦେଶରେ ଦେଖାଦେବ ଦରଦାମ ବୃଦ୍ଧି ସ୍ଥିତି । ସାଧାରଣ ଲୋକଙ୍କ ପକେଟକୁ ଏହା ବଡ଼ ଆକାରରେ ବାଧିବ ।

ଭାରତ ଏହାର ଆବଶ୍ୟକତାର ୮୫% ରୁ ଅଧିକ ଅଶୋଧିତ ତୈଳ ଆମଦାନି କରିଥାଏ ଏବଂ ଏଥିରେ ବଡ଼ ଭାଗ ରହିଛି ଉପସାଗରୀୟ ଦେଶଗୁଡ଼ିକର । ଏହି ଦେଶଗୁଡ଼ିକ ହେଲା ସାଉଦି ଆରବ, ୟୁଏଇ ଏବଂ ଇରାକ ଆଦି । ହୋର୍ମୁଜ ଷ୍ଟ୍ରେଟ୍ ଦେଇ ଏହି ଦେଶଗୁଡ଼ିକରୁ ତେଲ ଭାରତକୁ ଆସିଥାଏ । ହୋର୍ମୁଜ ଷ୍ଟ୍ରେଟ୍ ଉପରେ ରୋକ ଲାଗିବା ଦ୍ୱାରା ଭାରତର ମାସିକ ମୋଟ ତୈଳ ଆମଦାନିର ୫୦% ପର୍ଯ୍ୟନ୍ତ ପ୍ରଭାବିତ ହେବାକୁ ଯାଉଛି । ଏହି ପରିବହନ ବାଟ ବନ୍ଦ ହେବା ଦ୍ୱାରା ବ୍ୟାରେଲ ପିଛା ଅଶୋଧିତ ତୈଳ ଦର ୧୧୦ ଡଲାର ପର୍ଯ୍ୟନ୍ତ ଯାଇପାରେ ବୋଲି ଆଶଙ୍କା କରାଯାଉଛି । ଏହା ହେଲେ ଭାରତୀୟ ତୈଳ ବିପଣନ କମ୍ପାନିଗୁଡ଼ିକର ବିଶୋଧନ ଖର୍ଚ୍ଚରେ ବଡ଼ ଆକାରର ବୃଦ୍ଧି ଘଟିବ । ଯଦି କେନ୍ଦ୍ର ସରକାର ଉତ୍ପାଦ ଶୁଳ୍କକୁ ହ୍ରାସ ନ କରନ୍ତି ତେବେ ପେଟ୍ରୋଲ ଏବଂ ଡିଜେଲର ଖୁଚୁରା ଦର ଲିଟର ପିଛା ୫ରୁ ୧୦ ଟଙ୍କା ପର୍ଯ୍ୟନ୍ତ ବଢ଼ିପାରେ । ଦରଦାମ ସ୍ଥିତି ହୋଇପାରେ ଅଣାୟତ ।

ଶୁକ୍ରବାର ଅଶୋଧିତ ତୈଳ ଦର ୨.୭୮% ବଢ଼ି ବ୍ୟାରେଲ ପିଛା ୬୭.୦୨ ଡଲାରରେ ବନ୍ଦ ହୋଇଥିଲା । ସୋମବାର ଯେତେବେଳେ କମୋଡିଟି ବଜାର ଖୋଲିବ ଏଥିରେ ଆହୁରି ବୃଦ୍ଧି ଦେଖିବାକୁ ମିଳିପାରେ । ଭାରତୀୟ ଅର୍ଥବ୍ୟବସ୍ଥା ଉପରେ ବ୍ୟାପକ ପ୍ରଭାବ ଡିଜେଲ ଦର ବଢ଼ିବା ଦ୍ୱାରା ଦେଶବ୍ୟାପୀ ମାଲ ପରିବହନ ଓ ସାଧାରଣ ପରିବହନ ଖର୍ଚ୍ଚ ବଢ଼ିବ । ଏଫଏମସିଜି ଉତ୍ପାଦ, ଫଳ ଏବଂ ପନିପରିବା ଦର ଉପରେ ଏହାର ପ୍ରଭାବ ପଡ଼ିବ । ଫଳରେ ଖୁଚୁରା ମୁଦ୍ରାସ୍ଫୀତି ହାର(ସିପିଆଇ) ଭାରତୀୟ ରିଜର୍ଭ ବ୍ୟାଙ୍କର ନିର୍ଦ୍ଧାରିତ ସୀମା ବାହାରକୁ ଯାଇପାରେ । ତେଲ ମହଙ୍ଗା ହେବା ଦ୍ୱାରା ଆମଦାନି କରିବା ପାଇଁ ଭାରତକୁ ଅଧିକ ଡଲାର ଖର୍ଚ୍ଚ କରିବାକୁ ପଡ଼ିବ । ଏହାଦ୍ୱାରା ଭାରତର ଚଳନ୍ତି ଖାତା ନିଅଣ୍ଟ ବଢ଼ିବ ଏବଂ ଡଲାରର ବର୍ଦ୍ଧିତ ଚାହିଦା ଯୋଗୁ ଭାରତୀୟ ଟଙ୍କାର ବିନିମୟ ମୂଲ୍ୟରେ ବଡ଼ ହ୍ରାସ ଘଟିପାରେ । ଟଙ୍କା ଦୁର୍ବଳ ହେବା ଦ୍ୱାରା ଇଲେକ୍ଟ୍ରୋନିକ୍ସ ଗ୍ୟାଜେଟ୍ରୁ ଆରମ୍ଭ କରି ଖାଇବା ତେଲ ପର୍ଯ୍ୟନ୍ତ, ସମସ୍ତ ଆମଦାନି ସାମଗ୍ରୀ ମହଙ୍ଗା ହୋଇଯିବ । ଭାରତ-ଇରାନ ମଧ୍ୟରେ ବ୍ୟାପାର କମ୍ ଭାରତ ଏବଂ ଇରାନ ମଧ୍ୟରେ ଦ୍ୱିପାକ୍ଷିକ ବ୍ୟାପାର ସେତେଟା ଅଧିକ ନୁହେଁ । ତେଣୁ ଉଭୟ ଦେଶ ମଧ୍ୟରେ ଥିବା ବାଣିଜ୍ୟ ଉପରେ ଯୁଦ୍ଧର ସିଧାସଳଖ ସେତେଟା ପ୍ରଭାବ ପଡ଼ିବ ନାହିଁ । ଭାରତ ଏବଂ ଇରାନ ମଧ୍ୟରେ ଅଧିକାଂଶ ବ୍ୟାପାର ଔଷଧ ଏବଂ ଫଳ ପର୍ଯ୍ୟନ୍ତ ସିମୀତ ।

୨୦୨୪-୨୫ରେ ଇରାନ ସହ ଭାରତର ଦ୍ୱିପାକ୍ଷିକ ବ୍ୟାପାର ୧.୬୮ ବିଲିୟନ ଡଲାର ଥିଲା । ଏହା ୨୦୧୮-୧୯ରେ ରହିଥିବା ୧୭.୦୩ ବିଲିୟନ ଡଲାରରୁ ବହୁ ମାତ୍ରାରେ କମ୍ । ୧.୬୮ ବିଲିୟନ ଡଲାରର ଏହି ଅଙ୍କ ୨୦୨୪-୨୫ରେ ଭାରତର ମୋଟ ଦ୍ୱପାକ୍ଷିକ ବାଣିଜ୍ୟ ଅର୍ଥାତ ୧.୭୪ ଟ୍ରିଲିୟନ ଡଲାରର ମାତ୍ର ୦.୦୧% । ସେୟାର ବଜାରରେ ଦେଖାଦେବ ପତନ ଯୁଦ୍ଧ ଏତେ ମାତ୍ରାରେ ଭୀଷଣ ହେଲାଣି ଯେ, ବିଶେଷଜ୍ଞ ଅନୁମାନ କରୁଛନ୍ତି ଯେ, ସୋମବାର ଭାରତ ସମେତ ବିଶ୍ୱବ୍ୟାପୀ ସେୟାର ବଜାରରେ ଦେଖାଦେବ ବଡ଼ ପତନ । ଏହା ଏତେ ମାତ୍ରାରେ ଅଧିକ ରହିବ ଯେ, ନିବେଶକ ସେୟାର ବିକ୍ରି କରିବେ । ଏହାର ସଂକେତ ଶୁକ୍ରବାର ହିଁ ଭାରତୀୟ ବଜାରରେ ଦେଖିବାକୁ ମିଳିଥିଲା, ଯେତେବେଳେ ଇରାନ-ଆମେରିକା ମଧ୍ୟରେ ଆଲୋଚନା ସଫଳ ହୋଇ ନ ଥିଲା । ଏହା ପ୍ରଭାବରେ ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସଇ) ସୂଚକାଙ୍କ ସେନ୍ସେକ୍ସ ୯୬୧ ପଏଣ୍ଟ ଏବଂ ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟି ୩୧୭ ପଏଣ୍ଟ ହ୍ରାସ ସହିତ ବନ୍ଦ ହୋଇଥିଲା । ଏବେ ସୋମବାର ଉପରେ ନିବେଶକଙ୍କ ନଜର ରହିବ । ବଜାର କିଭଳି ରହୁଛି ସେ ନେଇ ଉତ୍କଣ୍ଠା ରହିଛି ।