ଗାଡ଼ି ପରେ ଗାଡ଼ିକୁ ପିଟି ମାଡ଼ିଆସିଲା ଟ୍ରାକ୍ଟର, ଜୀବନ ବଞ୍ଚାଇବାକୁ ଦୌଡ଼ିଲେ ଲୋକ

ବଲାଙ୍ଗିର ୬।୧୨: ନିଶାସକ୍ତ ଟ୍ରାକ୍ଟର ଡ୍ରାଇଭରଙ୍କ ଉନ୍ମତକାଣ୍ଡ । ଗାଡ଼ି ପରେ ଗାଡ଼ିକୁ ପିଟି ଚାଲିଲା । ଭୟରେ ଦୌଡିଲେ ଲୋକ । ବର୍ତ୍ତିଗଲା ଜୀବନ । ବଲାଙ୍ଗିର ଟାଉନ ଥାନା ଅଞ୍ଚଳ ବସ୍ ଟର୍ମିନାଲ ନିକଟରେ ଘଟିଛି ଏଭଳି ସିରିଜ୍ ଦୁର୍ଘଟଣା । ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି ।

ସୂଚନାଯୋଗ୍ୟ ଯେ, ବଲାଙ୍ଗିର ଟାଉନ ଥାନା ଅଞ୍ଚଳ ବସ୍ ଟର୍ମିନାଲ ନିକଟରେ ପୌରପରିଷଦ ପାଇଖାନା ସଫେଇ ଟ୍ରାକ୍ଟର ଗାଡ଼ିଟି ସିରିଜ୍ ଦୁର୍ଘଟଣା ଘଟାଇଛି । ନିଶାସକ୍ତ ଅବସ୍ଥାରେ ଟ୍ରାକ୍ଟର ଡ୍ରାଇଭର ଜଣଙ୍କ ଦ୍ରୁତଗତିରେ ମାଡ଼ିଆସି ରାସ୍ତା କଡ଼ରେ ଥିବା ଠେଲାକୁ ଧକ୍କା ଦେଇଥିଲା । ପରେ ନିକଟରେ ଥିବା ଏକ ବାଇକ୍‌କୁ ଧକ୍କା ଦେଇଥିଲା । ଶେଷରେ ସ୍କୁଟି, ସାଇକେଲ ସହ ଦୋକାନ ଘରକୁ ଟ୍ରାକ୍ଟରଟି ଧକ୍କା ଦେଇଥିଲା । ଲୋକ ଭୟଭୀତ ଅବସ୍ଥାରେ ଟ୍ରାକ୍ଟରକୁ ଦେଖି ଦୌଡ଼ି ପଳାଇଥିଲେ । ଫଳରେ ଅଳ୍ପକେ ବର୍ତ୍ତିଗଲା ଲୋକଙ୍କ ଜୀବନ ।

ତେବେ ସିରିଜ୍ ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି । ସଂପୃକ୍ତ ଡ୍ରାଇଭରଙ୍କୁ ଅଟକ ରଖିଲେ ସ୍ଥାନୀୟ ଲୋକ । ଘଟଣାସ୍ଥଳରେ ଟାଉନ ଥାନା ପୋଲିସ ପହଞ୍ଚି ଲୋକଙ୍କ ବୁଝାସୁଝା କରିବା ସହ ଉଦ୍ଧାର କାର୍ଯ୍ୟ ଆରମ୍ଭ କରିଛି ।