ଘର କ୍ରେତାଙ୍କ ହାରାହାରି ବୟସ ୩୮ ରୁ ୩୪ ବର୍ଷକୁ ହ୍ରାସ: ୭୪% ଘର କିଣିଛନ୍ତି ମିଲେନିଆଲ୍ସ ଓ ଜେନ-ଜି

ନୂଆଦିଲ୍ଲୀ: ପୂର୍ବରୁ ସାଧାରଣ ଭାରତୀୟ ପରିବାର ପ୍ରଥମେ ପଇସା ସଞ୍ଚୟ କରତା'ପରେ ଘର କିଣ, ଏହି ନୀତି ଅନୁସରଣ କରୁଥିଲେ। ହେଲେ ବର୍ତ୍ତମାନ,ଚାକିରି ପାଇବା ମାତ୍ରେ ଘର କିଣିବା ଧାରା ଆରମ୍ଭ ହୋଇଯାଇଛି। ଆଉ ଏହି ଟ୍ରେଣ୍ଡ୍ ମିଲେନିଆନ୍ସ ଓ ଜେନ୍-ଜିଙ୍କ ଠାରେ ଅଧିକ ଦେଖାଯାଉଛି। ଦେଶରେ ୭୪% ବିକ୍ରି ହୋଇଥିବା ଘର କିଣିଛନ୍ତି ୩୫ବର୍ଷରୁ କମ୍ ବୟସର ଲୋକେ। ଏକ ସର୍ଭେରେ ଏହି ରୋଚକ କଥା ସମ୍ନାକୁ ଆସିଛି।

ଭାରତର ଜେନ୍-ଜିଙ୍କୁ ଏବେ ଘାରିଛି ଘର କିଣା ନିଶା। ଦେଶରେ ୭୪% ବିକ୍ରି ହୋଇଥିବା ଘର କିଣିଛନ୍ତି ୩୫ ବର୍ଷରୁ କମ୍ ବୟସର ଲୋକେ। ଏହି କ୍ରେତାଙ୍କ ମଧ୍ୟରୁ ୩୨% ହେଉଛନ୍ତି ୨୫ ବର୍ଷରୁ କମ୍ ବୟସର। ହୋମଲୋନ ଏଗ୍ରୀଗେସନ ଓ ଡିଷ୍ଟ୍ରିବ୍ୟୁସନ ପ୍ଲାଟଫର୍ମର ବେସିକ ହୋମ ଲୋନ ସର୍ଭେ ‘ଘର କା ସପ୍ନା କୈଶା ପୂରା କରତା ହେ ଭାରତ’? ରିପୋର୍ଟରେ ସାମ୍ନାକୁ ଆସିଛି।

ସର୍ଭେ ଅନୁଯାୟୀ, ଉଚ୍ଚ ଆୟକାରୀମାନେ ଘର EMI ପାଇଁ ସେମାନଙ୍କର ବାର୍ଷିକ ଆୟର ୫୦% ପର୍ଯ୍ୟନ୍ତ ଦେବାକୁ ଇଚ୍ଛୁକ। ଡିଜିଟାଲ୍ ପ୍ଲାଟଫର୍ମରେ ଦ୍ରୁତ ପ୍ରକ୍ରିୟାକରଣ କମ ବୟସର କ୍ରେତାମାନଙ୍କୁ ଅଧିକ ଆକର୍ଷିତ କରୁଛି। ତଥାପି, ସେମାନେ ଅତି କମରେ ୫୦ ବର୍ଷ ପୁରୁଣା ଏବଂ ବିଶ୍ୱସ୍ତ ଆର୍ଥିକ ସଂସ୍ଥାରୁ ଋଣ ନେବାକୁ ପସନ୍ଦ କରୁଛନ୍ତି। ସର୍ଭେ ଅନୁଯାୟୀ ଏହି ୬ ବର୍ଷ ମଧ୍ୟରେ ଗୃହ କ୍ରେତାଙ୍କ ହାରାହାରି ବୟସ ୩୮ ରୁ ୩୪ ବର୍ଷକୁ ହ୍ରାସ ପାଇଛି।

ଏହି ସର୍ଭେ ବିଭିନ୍ନ ବୟସ ଗୋଷ୍ଠୀର ୨୩ ହଜାର ଲୋକଙ୍କ ଉପରେ କରାଯାଇଥିଲା। ସେମାନଙ୍କ ମଧ୍ୟରୁ ୩୧%ଙ୍କ ବାର୍ଷିକ ଆୟ ୫୦ ଲକ୍ଷ ଟଙ୍କାରୁ ଅଧିକ ଥିଲା। ଏହା ବ୍ୟତୀତ ୨୯%ଙ୍କ ଆୟ ୫ ଲକ୍ଷ ଟଙ୍କା ପର୍ଯ୍ୟନ୍ତ, ୨୦%ଙ୍କ ଆୟ ୫ ରୁ ୧୦ ଲକ୍ଷ ଟଙ୍କା, ୭%ଙ୍କ ଆୟ ୧୧ ରୁ ୨୦ ଲକ୍ଷ ଟଙ୍କା, ୪%ଙ୍କ ଆୟ ୨୧ ରୁ ୩୫ ଲକ୍ଷ ଟଙ୍କା ଏବଂ ୯%ଙ୍କ ଆୟ ୩୬ ରୁ ୪୦ ଲକ୍ଷ ଟଙ୍କା ଥିଲା। ଏମାନଙ୍କ ମଧ୍ୟରୁ ୯୧% ପୁରୁଷ ଏବଂ ୯% ମହିଳା ଥିଲେ। ଘର କିଣିବାରେ ମହିଳାଙ୍କ ଅଂଶ ନିରନ୍ତର ବୃଦ୍ଧି ପାଉଛି। ୨୦୨୪ ମସିହାରେ ଶ୍ରେଷ୍ଠ ସହରଗୁଡ଼ିକରେ ମହିଳାମାନେ ୧.୨୯ ଲକ୍ଷ ଆବାସିକ କାରବାର କରିଥିଲେ। ଏହି ସହରଗୁଡ଼ିକରେ ମୋଟ କାରବାରର ଏହା ୧୪% ଥିଲା।