କଙ୍ଗୋରେ ବଡ଼ ଦୁର୍ଘଟଣା; ସମୁଦ୍ରରେ ଡଙ୍ଗା ଓଲଟି ୨୦ ମୃତ, ଅନେକ ନିଖୋଜ

ନୂଆଦିଲ୍ଲୀ: ଉତ୍ତର-ପଶ୍ଚିମ କଙ୍ଗୋରେ ଆଉ ଏକ ଡଙ୍ଗା ବୁଡ଼ି ଘଟଣା ସାମ୍ନାକୁ ଆସିଛି । ଏଥିରେ ପ୍ରାୟ ୨୦ ଜଣଙ୍କର ମୃତ୍ୟୁ ହୋଇଛି ଏବଂ ଅନେକ ନିଖୋଜ ଅଛନ୍ତି। ଦୁର୍ଘଟଣାଟି ମାଇ-ନୋମ୍ବେ ହ୍ରଦରେ ଘଟିଥିବା ଜଣାପଡ଼ିଛି। ଯାତ୍ରୀମାନଙ୍କୁ ନେଇ ଡଙ୍ଗାଟି ରାଜଧାନୀ କିନସାସା ଅଭିମୁଖେ ଯାଉଥିବା ବେଳେ ଓଲଟି ପଡ଼ିଥିଲା । ରିପୋର୍ଟ ଅନୁସାରେ, ଡଙ୍ଗାଟି କିରି ସହରରୁ କିନସାସା ଯାଉଥିବା ବେଳେ ଗୁରୁବାର ରାତି ପ୍ରାୟ ୮ଟାରେ ବୋବେନି ଏବଂ ଲୋବେକେ ଗ୍ରାମ ନିକଟ ସମୁଦ୍ରରେ ଓଲଟି ପଡ଼ିଥିଲା। ଏହି ଦୁର୍ଘଟଣାରେ କୋଡ଼ିଏ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ନିଖୋଜ ଅଛନ୍ତି ।

କଙ୍ଗୋ ସରକାର ଆନୁଷ୍ଠାନିକ ଭାବରେ ମୃତକଙ୍କ ସଂଖ୍ୟା ପ୍ରକାଶ କରିନାହାଁନ୍ତି । ତଥାପି ଦୁର୍ଘଟଣାରେ ପ୍ରାୟ ୨୦ ଜଣଙ୍କର ମୃତ୍ୟୁ ହୋଇଥିବା କୁହାଯାଉଛି। ମାଇ-ନୋମ୍ବେ ପ୍ରଦେଶର ରାଜ୍ୟପାଳ କେଭାନି ନକୋସୋ କହିଛନ୍ତି, ‘ଆମେ ମୃତକଙ୍କ ସଂଖ୍ୟା ଏବଂ ବଞ୍ଚିଥିବା ଲୋକଙ୍କ ସଂଖ୍ୟା ନିର୍ଣ୍ଣୟ କରିବା ପାଇଁ ଘଟଣାସ୍ଥଳରେ ନିୟୋଜିତ ଦଳଗୁଡ଼ିକଠାରୁ ସୂଚନା ଅପେକ୍ଷାରେ କରିଛୁ।’ ମଧ୍ୟ ଆଫ୍ରିକୀୟ ଦେଶରେ ଡଙ୍ଗା ବୁଡ଼ିବା ଘଟଣା ବୃଦ୍ଧି ପାଉଛି । ଲୋକମାନେ ଶସ୍ତା କାଠ ଡଙ୍ଗା ବ୍ୟବହାର କରୁଥିବାରୁ ଏହି ଘଟଣା ବଢ଼ିଛି ।

ଏହି ସବୁ ଡଙ୍ଗାରେ ଲାଇଫ୍ ଜ୍ୟାକେଟ୍ ନଥାଏ ଏବଂ ଡଙ୍ଗାଗୁଡ଼ିକ ସାଧାରଣତଃ ଅଧିକ ଲୋଡ୍ ଯୋଗୁ ଭାଙ୍ଗିଯାଏ କିମ୍ବା ଓଲଟି ପଡ଼େ । ଅନେକ ଡଙ୍ଗା ରାତିରେ ଯାତାୟତ କରେ । ଫଳରେ ବିପଦ ଆହୁରି ବଢ଼ିଯାଏ । ଉଦ୍ଧାର କାର୍ଯ୍ୟ ମଧ୍ୟ ବାଧାପ୍ରାପ୍ତ ହୁଏ । ଚଳିତ ମାସ ଆରମ୍ଭରେ, ଏକ ଡଙ୍ଗା ବୁଡ଼ିଯିବାରୁ ୬୪ ଜଣ ନିଖୋଜ ହୋଇ ଯାଇଥିଲେ। ସେପ୍ଟେମ୍ବରରେ, ଉତ୍ତର-ପଶ୍ଚିମ କଙ୍ଗୋରେ ଦୁଇଟି ପୃଥକ ଡଙ୍ଗା ଦୁର୍ଘଟଣାରେ ପ୍ରାୟ ୧୯୩ ଜଣଙ୍କର ମୃତ୍ୟୁ ହୋଇଥିଲା । ମାର୍ଚ୍ଚ ମାସରେ ମଧ୍ୟ ଦକ୍ଷିଣ-ପଶ୍ଚିମ କଙ୍ଗୋରେ ଏକ ଡଙ୍ଗା ବୁଡ଼ି ଯାଇଥିଲା । ଏଥିରେ ୨୫ ଜଣଙ୍କର ମୃତ୍ୟୁ ହୋଇଥିଲା, ସେମାନଙ୍କ ମଧ୍ୟରୁ ଅନେକ ଫୁଟବଲ୍ ଖେଳାଳି ଥିଲେ। ସେମାନେ ମାଇ-ନୋମ୍ବେ ପ୍ରଦେଶର ମୁସି ସହରରେ ଏକ ମ୍ୟାଚ୍ ଦେଖି ଫେରୁଥିବା ବେଳେ କ୍ୱା ନଦୀରେ ଡଙ୍ଗାଟି ବୁଡ଼ି ଯାଇଥିଲା।