ପ୍ରଥମ କମ୍ପାନୀ ଭାବେ ୫ ଟ୍ରିଲିୟନ ଡଲାର ମାର୍କେଟ କ୍ୟାପ୍ ଅତିକ୍ରମ କଲା ଏନ୍‌ଭିଡିଆ

ନୂଆଦିଲ୍ଲୀ: ଆମେରିକୀୟ ସେମିକଣ୍ଡକ୍ଟର ଚିପ୍ ନିର୍ମାତା କମ୍ପାନୀ ଏନଭିଡିଆର ମାର୍କେଟ କ୍ୟାପ୍ ପ୍ରଥମ ଥର ପାଇଁ ୫ ଟ୍ରିଲିୟନ ଡଲାର ଅତିକ୍ରମ କରିଛି। ବିଶ୍ୱର ପ୍ରଥମ କମ୍ପାନୀ ଭାବେ Nvidia ଏହି ସଫଳତା ହାସଲ କରିଛି। ବିଶ୍ୱରେ ଏଆଇ ଚିପ୍ ଭାଲ୍ୟୁ ବଢ଼ୁଥିବାରୁ କମ୍ପାନୀର ସ୍ଥିତି ମଜଭୁତ ହୋଇଛି। ଆମେରିକାର ସିଲିକନ୍ ଭ୍ୟାଲିରେ ଥିବା ଏହି ଚିପ୍ ନିର୍ମାତା କମ୍ପାନୀ ନିକଟରେ ୪ ଟ୍ରିଲିୟନ ଡଲାର ମାର୍କେଟ୍ କ୍ୟାପ୍‌ ଅତିକ୍ରମ କରିଥିଲା। ଏହାର ମାତ୍ର ୩ ମାସ ପରେ କମ୍ପାନୀ ୫ ଟ୍ରିଲିଅନ ଡଲାରରେ ଅତିକ୍ରମ କରିଛି।

ବିଶ୍ୱବ୍ୟାପୀ ଏଆଇ କମ୍ପ୍ୟୁଟିଂ ପାୱାର ଚାହିଦାରେ ବୃଦ୍ଧି ଯୋଗୁ ୨୦୨୩ ମସିହାର ଆରମ୍ଭରୁ ଷ୍ଟକ୍ ଦ୍ରୁତ ଗତିରେ ବୃଦ୍ଧି ପାଇଛି। ଆନ୍ତର୍ଜାତୀୟ ମୁଦ୍ରା ପାଣ୍ଠି (IMF) ଅନୁଯାୟୀ, କମ୍ପାନୀର ୫.୦୫ ଟ୍ରିଲିୟନ ବଜାର ପୁଞ୍ଜି ବର୍ତ୍ତମାନ ଜାପାନ, ୟୁକେ ଏବଂ ଭାରତର ମିଳିତ ଜିଡିପି ଅପେକ୍ଷା ଅଧିକ। ମଙ୍ଗଳବାର ଦିନ, Nvidia ର ସିଇଓ ଜେନସେନ୍ ହୁଆଙ୍ଗ୍ ୫୦୦ ବିଲିୟନ ଡଲାର ମୂଲ୍ୟର ଚିପ୍ ଅର୍ଡର ହୋଇଥିବା ସୂଚନା ଦେଇଛନ୍ତି। ଏତେ ମାତ୍ରାରେ ଚାହିଦା ଯୋଗୁ କମ୍ପାନୀର ଭାଲ୍ୟୁଏସନ ବଢ଼ୁଛି।

Nvidia ହେଉଛି ଏକ ଟେକ୍ନୋଲୋଜୀ କମ୍ପାନୀ, ଯାହା ଗ୍ରାଫିକ୍ସ ପ୍ରୋସେସିଂ ୟୁନିଟ୍ (GPUs) ର ଡିଜାଇନ୍ ଏବଂ ନିର୍ମାଣ କରେ। ଏହା ୧୯୯୩ ମସିହାରେ ଜେନସେନ୍ ହୁଆଙ୍ଗ, କର୍ଟିସ୍ ପ୍ରିମ୍ ଏବଂ କ୍ରିସ୍ ମାଲାଚୋସ୍କିଙ୍କ ଦ୍ୱାରା ପ୍ରତିଷ୍ଠିତ ହୋଇଥିଲା। ଏହାର ମୁଖ୍ୟାଳୟ କାଲିଫର୍ନିଆର ସାଣ୍ଟା କ୍ଲାରାରେ ରହିଛି। ଫୋବର୍ସ ରିଅଲ୍ ଟାଇମ୍ ବିଲିୟନେୟର୍ସ ତାଲିକା ଅନୁଯାୟୀ, କମ୍ପାନୀର ସିଇଓ ଜେନସେନ୍ ହୁଆଙ୍ଗ ୧୭୪.୪ ବିଲିୟନ ଡଲାର ଅର୍ଥାତ୍ ୧୫.୩୯ ଲକ୍ଷ କୋଟି ଟଙ୍କା ସହିତ ବିଶ୍ୱର ୮ମ ଧନୀ ବ୍ୟକ୍ତି ଅଛନ୍ତି।