india-us trade deal: ସତରେ କ’ଣ ଟ୍ରମ୍ପଙ୍କ ସର୍ତ୍ତରେ ରାଜି ହୋଇଗଲା ଭାରତ?ବାଣିଜ୍ୟ ଚୁକ୍ତିରେ ସାଲିସ୍ କରି ନାହାନ୍ତି ତ ମୋଦୀ ସରକାର?ଆଉ ୫ ଦିନ ପରେ ଖୁଲାସା!

ନୂଆଦିଲ୍ଲୀ: ଭାରତ ଓ ଆମେରିକା ମଧ୍ୟରେ ଚୁକ୍ତି ଘୋଷଣା ହୋଇଥିଲେ ବି ଏହାର ବିଶେଷ ରିପୋର୍ଟ ତିଆରି ଜାରି ରହିଛି। କାମ ସରିଲେ ଆଗାମୀ ୪-୫ ଦିନ ମଧ୍ୟରେ ଦୁଇ ଦେଶ ମିଳିତ ଭାବେ ପ୍ରତିକ୍ରିୟା ଜାରି କରି ଚୁକ୍ତି ବିଷୟରେ ସମ୍ପୂର୍ଣ୍ଣ ସୂଚନା ଦେବେ ବୋଲି ସୂଚନା ମିଳିଛି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ସହିତ ଟ୍ରେଡ୍ ଡିଲ୍ ଘୋଷଣା କରିବା ପରେ ଦୁଇ ଦେଶ ମଧ୍ୟରେ କ’ଣ ଡିଲ୍ ହୋଇଛି ସେ ନେଇ ସାରା ବିଶ୍ୱ ଜାଣିବାକୁ ଉତ୍କଣ୍ଠାରେ ଚାହିଁ ରହିଛି। ବିରୋଧୀମାନେ ମଧ୍ୟ ନାନା ସନ୍ଦେହ କରି ଏନେଇ ସରକାରଙ୍କୁ ଘେରିଛନ୍ତି। ମୋଦୀ ଚାପରେ ଟ୍ରମ୍ପଙ୍କୁ ସୁହାଇଲା ଭଳି ଡିଲ୍ ଉପରେ ସାଇନ କରିଛନ୍ତି ବୋଲି ବିରୋଧୀ ଅଭିଯୋଗ କରିଛି।

ଟ୍ରମ୍ପ ତାଙ୍କ ପୋଷ୍ଟରେ ଏକାଧିକ କଥା କହିଥିଲେ। ଏବଂ ଟାରିଫ ୫୦ ରୁ ୧୮% କରିଦିଆଗଲା ବୋଲି ଘୋଷଣା କରିଥିଲେ। ତେବେ ପ୍ରଧାନମନ୍ତ୍ରୀ ଟ୍ରମ୍ପଙ୍କୁ ଖାଲି ଧନ୍ୟବାଦ ଦେଇ ପୋଷ୍ଟ କରିଥିଲେ। ହେଲେ ଡିଲ୍ସ ବିଷୟରେ କୌଣସି ତଥ୍ୟ ଦେଇ ନଥିଲେ।ଡିଲ୍ର ସମୟସୀମା ବିଷୟରେ ସୂଚନା ଦେଇ କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲ କହିଛନ୍ତି ଯେ ବାଣିଜ୍ୟ ଚୁକ୍ତିର ପ୍ରଥମ ପର୍ଯ୍ୟାୟ ମାର୍ଚ୍ଚ ମଧ୍ୟଭାଗରେ ସ୍ୱାକ୍ଷରିତ ହେବ। ମିଳିତ ବିବୃତ୍ତି ପରେ, ଆମେରିକା ଭାରତ ଉପରେ ଶୁଳ୍କକୁ ୧୮% କୁ ହ୍ରାସ କରିବା ପାଇଁ ଏକ କାର୍ଯ୍ୟନିର୍ବାହୀ ନିର୍ଦ୍ଦେଶ ଜାରି କରିବ ବୋଲି ଗୋୟଲ କହିଛନ୍ତି।

ଟ୍ରେଡ୍ ଡିଲ୍‌ରେ କୃଷି କ୍ଷେତ୍ର ସୁରକ୍ଷିତ କି ?

ଏହି ଚୁକ୍ତିରେ ଭାରତର ସମ୍ବେଦନଶୀଳ କ୍ଷେତ୍ର ଯଥା- କୃଷି, ଦୁଗ୍ଧ ଓ ମତ୍ସ୍ୟଚାଷକୁ ସୁରକ୍ଷିତ ରଖାଯାଇଛି ବୋଲି ବିଶେଷ ସୂତ୍ରରୁ ତଥ୍ୟ ନେଇ ବିଭିନ୍ନ ମିଡିଆରେ ଖବର ପ୍ରକାଶ ପାଇଛି। ଏହିସବୁ ସେକ୍ଟରକୁ ନେଇ ଆମେରିକା ସହିତ ମତାନ୍ତର ରହୁଥିବାରୁ ଟ୍ରେଡ୍ ଡିଲ୍ ବିଳମ୍ବ ହୋଇଥିଲା। ଏହା ବାଦ୍ ଡିଲ୍ ପାଇଁ ମୋଦୀ ଟ୍ରମ୍ପଙ୍କୁ କଲ୍ କି ମେସେଜ୍ କରି ନଥିବାରୁ ଟ୍ରମ୍ପଙ୍କ ଅହଂକାରକୁ ବାଧିଥିଲା। ଏଥିପାଇଁ ଡିଲ୍ରେ ବଳମ୍ବ ହୋଇଥିଲା ବୋଲି ଗତମାସରେ ଆମେରିକା ବାଣିଜ୍ୟ ସଚିବ ହାୱର୍ଡ ଲୁଟନିକ୍ କହିଥିଲେ।

ପଢ଼ନ୍ତୁ- ରୁଷରୁ ତେଲ କିଣିବା ବନ୍ଦ କରିବାକୁ ରାଜି ହୋଇଛି କି ଭାରତ? କ୍ରେମଲିନର ସ୍ପଷ୍ଟୀକରଣ ପରେ ଆମେରିକା ଟେନସନ୍

ଏପଟେ ଆମେରିକା ସହିତ କୌଣସି ଡିଲ୍ ହୋଇପାରୁ ନଥିବା ବେଳେ ଭାରତ କିନ୍ତୁ ଏହାର ବିକଳ୍ପ ବଜାର ଅନୁସନ୍ଧାନ କରିବାକୁ ଅନ୍ୟ ଦେଶଗୁଡ଼ିକ ସହିତ ବାଣିଜ୍ୟ ଚୁକ୍ତି କରିବା ଜାରି ରଖିଥିଲା। ୟୁକେ ଓ ୟୁରୋପ ସହ ଫ୍ରି ଟ୍ରେଡ୍ ଏଗ୍ରୀମେଣ୍ଟ କରିବା ସହିତ ନ୍ୟୁଜିଲାଣ୍ଡ ସହିତ ମଧ୍ୟ ବାଣିଜ୍ୟ ଡିଲ୍ କରିଥିଲା। ହେଲେ ସବୁ ଡିଲ୍ରେ କୃଷି ଓ ଦୁଗ୍ଧ କ୍ଷେତ୍ରକୁ ବାହାରେ ରଖିଥିଲା। ତେଣୁ ଆମେରିକା ସହିତ ସମାନ ସର୍ତ୍ତରେ ଡିଲ୍ କରାଯାଇଛି ବୋଲି ଅନୁମାନ କରାଯାଉଛି।

ଭାରତ-ଆମେରିକା ବାଣିଜ୍ୟ ଚୁକ୍ତିରେ ଏପର୍ଯ୍ୟନ୍ତ ଏହିସବୁ ଚୁକ୍ତି ସ୍ପଷ୍ଟ ହୋଇଛି

ଟ୍ରେଡ୍ ଡିଲ୍ ନେଇ ଟ୍ରମ୍ପ ଯେଉଁ ଘୋଷଣା କରିଥିଲେ ସେଥିରେ କୌଣସି ସ୍ପଷ୍ଟତା ନଥିଲା। ଖାଲି ଶୁଳ୍କ ୫୦ ପ୍ରତିଶତରୁ ୧୮ ପ୍ରତିଶତ କରାଗଲା ବୋଲି କହିଥିଲେ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟ୍ରମ୍ପଙ୍କୁ ଧନ୍ୟବାଦ ଦେଇଥିଲେ। ସେ ମଧ୍ୟ କୌଣସି ଖୁଲାସା କରି ନଥିଲେ। ଟ୍ରମ୍ପ ତାଙ୍କ ଘୋଷଣାରେ ଆହୁରି କହିଥିଲେ ଯେ ଭାରତ ଋଷ ଠାରୁ ତେଲ ନ କିଣି ଆମେରିକା ଓ ସମ୍ଭବତଃ ଭେନେଜୁଏଲା ଠାରୁ କିଣିବ। ଭାରତ ଆମେରିକା ସାମଗ୍ରୀ ଉପରେ ଶୁଳ୍କ ହ୍ରାସ କରିବାକୁ ରାଜି ହୋଇଛି ବୋଲି ଟ୍ରମ୍ପ ଘୋଷଣା କରିଥିଲେ।

ହେଲେ ଭାରତ ସରକାରଙ୍କ ପକ୍ଷରୁ ଏନେଇ କୌଣସି ମନ୍ତବ୍ୟ ଦେଇ ନଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଟ୍ରମ୍ପଙ୍କ ମନ୍ତବ୍ୟ ଉପରେ କୌଣସି ଟିପ୍ପଣୀ କରି ନଥିଲେ। କେବଳ ଏତିକି ନୁହେଁ, ଭାରତ କୁଆଡ଼େ ଆମେରିକା ଠାରୁ ୫୦୦ ବିଲିଅନ ଡଲାର ସାମଗ୍ରୀ କିଣିବାକୁ ରାଜି ହୋଇଛି। ଏଥିରେ ବି ମୋଦୀ କିଛି କହି ନଥିଲେ। ତେଣୁ ଦୁଇ ଦେଶ ମଧ୍ୟରେ କ’ଣ ଡିଲ୍ ହୋଇଛି ତାହା କହିବା ମୁସ୍କିଲ। ଆଗାମୀ ୪ -୫ ଦିନ ମଧ୍ୟରେ କଥା ସାମ୍ନାକୁ ଆସିବ।

ପଢ଼ନ୍ତୁ- ଆଗାମୀ ଦୁଇରୁ ତିନି ଦଶନ୍ଧି ମଧ୍ୟରେ ଭାରତ ୩୦ ଟ୍ରିଲିୟନ ଡଲାର ଅର୍ଥନୀତିରେ ପରିଣତ ହେବ: ମୁକେଶ ଅମ୍ବାନୀ