ମଦନୀଙ୍କ ‘ଜିହାଦ’ ବୟାନରେ କ୍ଷୁବ୍ଧ ହେଲେ ଆରିଫ ମହମ୍ମଦ, କହିଲେ- ଜମ୍ମୁ-କାଶ୍ମୀରରେ ହିନ୍ଦୁଙ୍କ ପ୍ରତି ଅତ୍ୟାଚାର ବେଳେ ଥିଲେ କେଉଁଠ?

କାନପୁର ୩୦।୧୧: ବିହାର ରାଜ୍ୟପାଳ ଆରିଫ ମହମ୍ମଦ ଖାନ ଜମିୟତ-ଉଲେମା-ଏ-ହୀନ୍ଦର ରାଷ୍ଟ୍ରୀୟ ଅଧ୍ୟକ୍ଷ ମୌଲାନା ମହମୁଦ ମଦନୀଙ୍କ ‘ଜିହାଦ’ ଭାଷଣକୁ ନେଇ କଡ଼ା ପ୍ରତିକ୍ରିୟା ଦେଇଛନ୍ତି। କାନପୁରରେ ଏକ କାର୍ଯ୍ୟକ୍ରମରେ ରାଜ୍ୟପାଳ ସଫାସଫା କହିଛନ୍ତି ଯେ କୁରାନରେ ‘ଜିହାଦ’ର ଅର୍ଥ କେବଳ ଓ କେବଳ ଅତ୍ୟାଚାର ଓ ଅନ୍ୟାୟ ବିରୋଧରେ ଛିଡାହେବା ବୋଲି ଉଲ୍ଲେଖ ରହିଛି, ହେଲେ ଦେବବନ୍ଦର ମଦ୍ରାସାମାନଙ୍କରେ ଏହାର ଓଲଟା ଅର୍ଥ ବ୍ୟାଖ୍ୟା କରାଯାଉଛି।

ମହମୁଦ ମଦନୀ ଶନିବାର ଭୋପାଲରେ କହିଥିଲେ ଯେ ‘ଯେବେ ଯେବେ ଅତ୍ୟାଚାର ହେବ, ସେବେ ସେବେ ଜିହାଦ ହେବ’। ଏହି ବୟାନରେ ରାଜ୍ୟପାଳ କଟାକ୍ଷ କରି ମଦନୀଙ୍କୁ ପଚାରିଛନ୍ତି ‘ଯଦି ମୋଲାନା କୁରାନର ଜିହାଦକୁ ମାନନ୍ତି ତେବେ ୧୯୯୦ରେ ଯେତେବେଳେ କାଶ୍ମୀରରେ ହିନ୍ଦୁଙ୍କ ଉପରେ ଅତ୍ୟାଚାର ହେଲା, ମସଜିଦରୁ ହିନ୍ଦୁଙ୍କୁ ମାରିବାକୁ, ତଡିବାକୁ ଫର୍ମାନ ଜାରି ହେଉଥିଲା ଓ ଏଥି ପାଇଁ ଲକ୍ଷଲକ୍ଷ ହିନ୍ଦୁ ବ୍ରାହ୍ମଣଙ୍କୁ ଘର ଛାଡିବାକୁ ପଡିଲା ସେତେବେଳେ ମହମୁଦ ମଦନୀଙ୍କ ଜିହାଦ କେଉଁଠି ଥିଲା,କାହିଁକି ଜିହାଦ କରିବାକୁ ପହଞ୍ଚିଲେନି’?

ଆରିଫ ମହମ୍ମଦ ଖାନ କହିଛନ୍ତି ଯେ ଦାଋଲ ଉଲୁମ ଦେଓବନ୍ଦ ସମ୍ପର୍କିତ ଶିକ୍ଷାନୁଷ୍ଠାନଙ୍କ ବହିରେ ଜିହାଦର ଅର୍ଥ ‘ସରିୟତକୁ ବିରୋଧ କରୁଥିବା ଲୋକଙ୍କ ବିରୋଧରେ ଲଢେଇ’ ବୋଲି ପଢା ଯାଉଛି। ରାଜ୍ୟପାଳ କହିଛନ୍ତି ଯେ ଦାଋଲ ଉଲୁମର ଏହି ପୁସ୍ତକରେ ଯାଦୁ ଟୋଣାକୁ ବି ଉଚିତ ବୋଲି କୁହାଯାଇଛି। ଏଠାରେ ପୁରା କୋରାନ ପଢା ଯାଏ ନାହିଁ ବଛାବଛା ପଙକ୍ତି ସନ୍ଦର୍ଭରୁ କାଟି ଭୁଲ ଅର୍ଥ କରାଯାଉଛି। ରାଜ୍ୟପାଳ ‘ବନ୍ଦେ ମା ତରମ’ ବିରୋଧକୁ ମଧ୍ୟ ଟାର୍ଗେଟ୍ କରିଛନ୍ତି।

ସେ କହିଛନ୍ତି ଯେ କିଛି ବର୍ଷ ପୂର୍ବେ ସେ ଏହାର ଊର୍ଦ୍ଦୁ ଅନୁବାଦ ପ୍ରମୁଖ ମୌଲାନାମାନଙ୍କୁ ପଠାଇଥିଲେ। ଏଥିରେ କେହି ଜଣେ ବି ମୌଲାନା ଗୋଟିଏ ଶବ୍ଦ ଉପରେ ବି ପ୍ରଶ୍ନ ଉଠାଇନଥିଲେ କି ଆପତ୍ତି ବି କରିନଥିଲେ। ବିରୋଧ କେବଳ ଏଥି ପାଇଁ ହେଉଛି କାରଣ ସଂସ୍କୃତ ସହିତ ପରିଚିତ ନୁହଁ। ଯଦି ଊର୍ଦ୍ଦୁ ଅନୁବାଦ ପଢାଯାଏ ଏହାକୁ ବିରୋଧର କୌଣସି କାରଣ ନାହିଁ।