ନାଗରିକତା ଲୁଚାଇ ଭାରତରେ ସରକାରୀ ଚାକିରି, ୩୦ ବର୍ଷ ତଳେ ପଳାଇ ଆସିଥିଲେ ପାକିସ୍ତାନୀ ମହିଳା

ନୂଆଦିଲ୍ଲୀ, ୦୯/୦୧: ଘର ପାକିସ୍ତାନ । କିନ୍ତୁ ଭାରତରେ ଦୀର୍ଘ ଦିନ ହେବ ରହି ଆସୁଛନ୍ତି । କାଇଦା କରି ସରକାରୀ ଚାକିରି ମଧ୍ୟ ପାଇଥିଲେ । ଏପରି ଜଣେ ମହିଳାଙ୍କ ନାଁରେ ମାମଲା ରୁଜୁ କରିଛି ପୋଲିସ । ସେ ପାକିସ୍ତାନୀ ହୋଇଥିଲେ ମଧ୍ୟ ଭାରତରେ କିପରି ୩୦ ବର୍ଷରୁ ଅଧିକ ଦିନ ରହିଗଲେ ତାକୁ ନେଇ ମଧ୍ୟ ପ୍ରଶ୍ନ ଉଠିଛି ।

ସୂଚନାନୁସାରେ, ଉତ୍ତର ପ୍ରଦେଶର ଅଜିମ୍ ନଗର ଅଞ୍ଚଳରେ ମାହିରା ଅଖତାର୍ ନାମକ ଜଣେ ମହିଳା ରୁହନ୍ତି । ସେ ୧୯୭୯ରେ ଜଣେ ପାକିସ୍ତାନୀ ନାଗରିକଙ୍କୁ ବିବାହ କରିଥିଲେ । ଏହା ପରେ ଭାରତ ଛାଡି ପାକିସ୍ତାନ ପଳାଇଥିଲେ । ସେଠାରେ ସେ ପାକିସ୍ତାନୀ ନାଗରିକତା ଗ୍ରହଣ କରିଥିଲେ । କିନ୍ତୁ ୧୯୮୫ରେ ସେ ପାକିସ୍ତାନୀ ପାସପୋର୍ଟରେ ଭାରତ ଆସିଯାଇଥିଲେ । ସ୍ଥାନୀୟ ଅଞ୍ଚଳର ଆଉ ଜଣେ ବ୍ୟକ୍ତିଙ୍କୁ ବିବାହ କରିଥିଲେ । ଏବେସୁଦ୍ଧା ସେ ଭାରତର ନାଗରିକତା ଗ୍ରହଣ କରିନଥିବା କୁହାଯାଉଛି ।ଖାଲି ଏତିକି ନୁହେଁ ୟୁପି ସରକାରର ଗଣଶିକ୍ଷା ବିଭାଗରେ ମଧ୍ୟ ସେ କାମ କରୁଛନ୍ତି ।

ପୋଲିସର କହିବାନୁସାରେ, ଉତ୍ତର ପ୍ରଦେଶର ଅଜିମ୍ ନଗର ଥାନାରେ ଏକ ମାମଲା ରୁଜୁ ହୋଇଛି । ମାହିରା ନାମକ ଜଣେ ମହିଳା ଉତ୍ତର ପ୍ରଦେଶର ଗଣଶିକ୍ଷା ବିଭାଗରେ କାର୍ଯ୍ୟ କରୁଥିଲେ । ତାଙ୍କ ନାଗରିକତାକୁ ନେଇ ପ୍ରଶ୍ନ ଉଠିଛି । ବିଭାଗ ପକ୍ଷରୁ ମଧ୍ୟ ତଦନ୍ତ ଆରମ୍ଭ ହୋଇଯାଇଛି । ସେ ଫେକ୍ ଡକ୍ୟୁମେଣ୍ଟ୍ ଦେଇ ଚାକିରି ହାତେଇଥିବା ଅଭିଯୋଗର ତଦନ୍ତ ଚାଲିଛି ।

ସ୍ଥାନୀୟ ଏଏସପି ଅନୁରାଗ ସିଂ କହିଛନ୍ତି ଯେ, ଅଭିଯୁକ୍ତଜଣଙ୍କ ରାମପୁରର କୁମାରିୟା ଗ୍ରାମରେ ଶିକ୍ଷକତା କରୁଥିଲେ । ତାଙ୍କ ବିରୋଧରେ ଭାରତୀୟ ନ୍ୟାୟ ସଂହିତାର ଧାରା ୩୧୮-୪, ୩୩୬,୩୩୮, ୩୪୦ ଆଧାରରେ ମାମଲା ରୁଜୁ ହୋଇଛି । ପାକିସ୍ତାନୀ ନାଗରିକ ହୋଇ ମଧ୍ୟ ସେ ଫେକ୍ ସାର୍ଟିଫିକେଟ୍ ଦେଇ ଚାକିରି ହାତେଇବାରେ ସଫଳ ହୋଇଥିଲେ ।

ଅଭିଯୋଗ ଆସିବା ପରେ ମାହିରାଙ୍କୁ ସସପେଣ୍ଡ୍ କରାଯାଇଛି । ଏହାସହ ଚାକିରିରୁ ବରଖାସ୍ତ କରିବା ପାଇଁ ପ୍ରସ୍ତୁତି ଚାଲିଛି । ପୋଲିସ ମଧ୍ୟ ଘଟଣାର ତଦନ୍ତ କରୁଛି । ଏବେସୁଦ୍ଧା ତାଙ୍କୁ ଗିରଫ କରାଯାଇନଥିବା ଏଏସପି କହିଛନ୍ତି ।