ବିଦ୍ୟାଳୟ ହଷ୍ଟେଲରୁ ୨୦ଛାତ୍ର ନିଖୋଜ ଘଟଣାର ତଦନ୍ତ ଆରମ୍ଭ, ଭୟଭୀତ ହୋଇ ୧୮ ପିଲାଙ୍କୁ ନେଇଗଲେ ଅଭିଭାବକ

ଆନନ୍ଦପୁର ୨।୧୨:କୋରାପୁଟ ବ୍ଲକର ଲଙ୍କାପୁଟ ପଞ୍ଚାୟତ ପ୍ରାଥମିକ ବିଦ୍ୟାଳୟ ହଷ୍ଟେଲରୁ ୨୦ ଜଣ ଛାତ୍ର ନିଖୋଜ ହେବା ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ହଷ୍ଟେଲ ଠାରୁ ୯ କି.ମି. ଦୂର ଜଙ୍ଗଲରୁ ପିଲା ମାନଙ୍କୁ ସୋମବାର ଅପରାହ୍ନରେ ଉଦ୍ଧାର କରାଯାଇଥିଲା । ବିଦ୍ୟାଳୟରୁ କେଉଁ ପରିସ୍ଥିତିରେ ୨୦ ପିଲା ବାହାରିଲେ ତାହାକୁ ନେଇ ବିଦ୍ୟାଳୟ କର୍ତ୍ତୃପକ୍ଷଙ୍କ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।

ସେପଟେ ଜିଲ୍ଲାପାଳ ଘଟଣା ସମ୍ପର୍କରେ ଜାଣିବା ପରେ ତୁରନ୍ତ କୋରାପୁଟ ବିଡ଼ିଓ ଓ ଅତିରିକ୍ତ ବ୍ଳକ୍ ଶିକ୍ଷା ଅଧିକାରୀ ଘଟଣା ସମ୍ପର୍କରେ ତଦନ୍ତ ଆରମ୍ଭ କରିଥିଲେ । ବିଦ୍ୟାଳୟ ହଷ୍ଟେଲରୁ ପିଲାମାନେ କେଉଁଥି ପାଇଁ ହଷ୍ଟେଲ ଛାଡ଼ିଲେ ତାହା ଅସ୍ପଷ୍ଟ ରହିଛି । ପିଲା ପହଞ୍ଚିବା ପରେ ଅବିଭାବକ ମାନେ ଭୟଭୀତ ହୋଇ ୧୮ ଜଣ ଛାତ୍ରଙ୍କୁ ଘରକୁ ନେଇ ଯାଇଥିବା ଜଣାପଡିଛି । ହଷ୍ଟେଲରେ ଷ୍ଟାଫ୍ କ୍ୱାର୍ଟର ବ୍ୟବସ୍ଥା ନଥିବାରୁ ଶିକ୍ଷୟିତ୍ରୀ ମାନେ ୬ କି.ମି. କୋରାପୁଟ ଠାରୁ ଯିବା ଆସିବା କରୁଛନ୍ତି । ଫଳରେ ସଠିକ୍ ସମୟରେ ପିଲା ମାନଙ୍କ କୌଣସି ଆବଶ୍ୟକତା କିମ୍ବା ଅସୁବିଧା ସମୟରେ ପହଞ୍ଚି ପାରୁନଥିବା ସୂଚନା ଦେଇଛନ୍ତି । ଅନ୍ୟପଟେ ହଷ୍ଟେଲରେ ଓ୍ବାର୍ଡେନ୍ ନଥିବାରୁ ମଧ୍ୟ ସମସ୍ୟା ସୃଷ୍ଟି ହେଉଥିବା ପୂର୍ବତନ ସରପଞ୍ଚ ପ୍ରକାଶ କରିଛନ୍ତି ।