ଟଙ୍କା ପାଇଁ ଶ୍ରୀମନ୍ଦିର ମର୍ଯ୍ୟାଦା ହାନି, ପ୍ରସାଦ-ଫ୍ୟାନ୍ସି ଚୁନରି ବାଣ୍ଟି ଶୋଷୁଛନ୍ତି

ଭୁବନେଶ୍ୱର ୨୪।୦୨ : ଶ୍ରୀମନ୍ଦିର ପ୍ରାଙ୍ଗଣରେ ସବୁଠି ଟଙ୍କା ମାଗୁଛନ୍ତି । ହାତରେ ପ୍ରସାଦ ଧରି ଯାତ୍ରୀଙ୍କ ପଛରେ ଗୋଡ଼ାଇ ଗୋଡ଼ାଇ ଯାଚୁଛନ୍ତି । ଯାତ୍ରୀ ଗ୍ରହଣ କଲେ ମନଇଛା ଦକ୍ଷିଣା ମାଗୁଛନ୍ତି । ନଦେଲେ ନାସ୍ତିକ କହି ଗାଳିମନ୍ଦ କରୁଛନ୍ତି । ଜଣେ ଆମ ହାତକୁ ପ୍ରସାଦ ଦେଇ ୨ଶହ ଟଙ୍କା ମାଗିଲେ। ଆମେ ୫୦ ଟଙ୍କା ଦେବାରେ ହାତକୁ ଦେଇଥିବା ପ୍ରସାଦ ଛଡ଼ାଇ ନେଇ ଗାଳି କଲେ । ପୁଣି ଶହେ ଟଙ୍କା ଦେବାରେ କୁନ୍ଥକୁନ୍ଥ ହୋଇ ପ୍ରସାଦ ଦେଲେ । ଆମେ ତାଙ୍କୁ ପ୍ରସାଦ ମାଗି ନଥିଲୁ। ଯାଚିକରି ଦେଲେ ପୁଣି ଖରାପ ବ୍ୟବହାର କଲେ । ବେଢ଼ାସ୍ଥିତ ବିଭିନ୍ନ ଦେବଦେବୀଙ୍କ ନିକଟରେ ମଧ୍ୟ ଦକ୍ଷିଣା ମଗାଯାଉଛି। ଶ୍ରୀମନ୍ଦିର ଭଳି ଠାକୁରଙ୍କ ପବିତ୍ର ସ୍ଥଳୀରେ ଏଭଳି ଦୁର୍ବ୍ୟବହାର ଆତ୍ମାକୁ ବାଧୁଥିବା ଉତ୍ତରପ୍ରଦେଶରୁ ଶ୍ରୀଜଗନ୍ନାଥଙ୍କୁ ଦର୍ଶନ କରିବାକୁ ଆସିଥିବା ଜୁହି ଗୁପ୍ତା କହିଛନ୍ତି।

ଟଙ୍କା ପାଇଁ ଶ୍ରୀମନ୍ଦିରର ମୌଳିକତା ବାଜି ଲାଗିଛି। କିଛି ଦିନ ହେବ ଫ୍ୟାନ୍ସି ଚୁନରି ବଡ଼ଦେଉଳରେ ହାଉଯାଉ ହେଉଛି। ଜରି ଝାଲର ଲଗା ଚିକିମିକି ହାତେ ଦୁଇ ହାତର ଲମ୍ବା କନା। ଚୁନରି ଠାକୁରଙ୍କ ଲାଗି କହି ଭକ୍ତ ବେକରେ ପକାଉଛନ୍ତି। ଶହେ ଦୁଇ ଶହ ଟଙ୍କା ବିନିମୟରେ ନିଜେ ସେବକ ଏହି ସବୁ ଶ୍ରୀମନ୍ଦିର ବାହାର ଫ୍ୟାନ୍ସି ଆଇଟମ୍ ଦେଉଛନ୍ତି । ଯାତ୍ରୀଙ୍କୁ ନାନା ପ୍ରକାରେ ମନଇଛା କଥା କହି ଦିଆଯିବାରେ ଅନେକ ଯାତ୍ରୀ ସବୁଜାଣି ଝିଂଝଟରୁ ବର୍ତ୍ତିବାକୁ ନେଉଛନ୍ତି। ହେଲେ ସେମାନଙ୍କ ପାଖରେ ଏହାର ମହତ୍ତ୍ୱ ରହୁନି। ଶ୍ରୀଜଗନ୍ନାଥଙ୍କ ଶିରିକାପଡ଼ାଟିଏ ହେଉ କିମ୍ବା ବାନା ଖଣ୍ଡିଏ, ଶ୍ରଦ୍ଧାଳୁ ପାଖରେ ଏହାର ବହୁ ମହତ୍ତ୍ୱ! ଠାକୁରଙ୍କ ଲାଗି ସୂତାଟିଏ ପାଇଲେ ଭକ୍ତ କୁତାର୍ଥ ହୋଇଯାଏ। ଏବେ ଏସବୁକୁ ଉପହାସ କରୁଛି "ଫ୍ୟାନ୍ସି ଚୁନରି'। ଠାକୁରଙ୍କ ସମ୍ମୁଖରେ ତାଙ୍କ ପ୍ରିୟ ଭକ୍ତଙ୍କୁ ଠକୁଛନ୍ତି । ଏଣୁ ଠାକୁରଙ୍କ ଲାଗି ଜିନିଷ ପ୍ରତି ମଧ୍ୟ ଶ୍ରଦ୍ଧାଳୁର ଆଗଭଳି ଶ୍ରଦ୍ଧା ରହୁନି। ସେହିଭଳି ବାନା ମଧ୍ୟ ବଣ୍ଟା ଯାଉଛି। ଯାତ୍ରୀମାନଙ୍କୁ ମହାପ୍ରଭୁଙ୍କ ବାନା କହି ଦିଆଯାଉଛି। ଏହାକୁ କିଏ କିପରି ବ୍ୟବହାର କରୁଛନ୍ତି କାହାରି ନିଘା ରହୁନି। ଫ୍ୟାନ୍ସି ଚୁନରିକୁ କିଏ ହାତରେ ବାନ୍ଧୁଛି କିଏ ବେଣିରେ । ଠାକୁରଙ୍କ ନିକଟରେ ଚାଲିଛି ଏଭଳି ମନଇଛା ବେପାର । ଭଳିକି ଭଳି ଝଲମଲ ପୁଳା ପୁଳା ଚୁନରି ହାତରେ ଧରି ଠିଆ ହେଉଛନ୍ତି । ଠାକୁରଙ୍କ ନାମରେ ଯାତ୍ରୀଙ୍କୁ ମନଗଢ଼ା କଥା କହି ଶହେ କିମ୍ବା ତତୁଦ୍ଧ୍ୱର୍ ଟଙ୍କା ନେଇ ଭକ୍ତଙ୍କ ବେକରେ ଲମ୍ବାଇ ଦେଉଛନ୍ତି । କିଛି ଭକ୍ତ ଏହାକୁ ସତ ଭାବି ବେଶ୍ କିଛି ଦକ୍ଷିଣା ଦେଇ ଆଗ୍ରହରେ ନେଉଛନ୍ତି । ଆଉ କିଛି ଏସବୁ ଠାକୁରଙ୍କ ନୁହେଁ ଜାଣି ମଧ୍ୟ ଜବରଦସ୍ତି କରାଯିବାରେ ବାଧ୍ୟ ହୋଇ ଟଙ୍କା ଦେଇ ଅନିଛାରେ ଗ୍ରହଣ କରୁଛନ୍ତି । ପରେ କିଏ କେମିତି ଏହାକୁ ବ୍ୟବହାର କରୁଛନ୍ତି ତାର କୌଣସି ଠିକ୍ ଠିକଣା ରହୁନି । କିଏ ଗାଡ଼ି ହ୍ୟାଣ୍ଡେଲରେ ବାନ୍ଧିଲାଣି ତ କିଏ ହାତରେ ଗୁଡ଼ାଇଲାଣି । ଯାହାକୁ ଦେଖି ଖୋଦ୍ ଜଣେ ସେବକ ଭୀଷଣ ବିରକ୍ତି ପ୍ରକାଶ କରିବା ସହ ଶ୍ରୀମନ୍ଦିର ଭିତରେ ଟଙ୍କା ପାଇଁ ଚାଲିଥିବା ନାଟ ବାବଦରେ ଖୋଲାଖୋଲି ବିଷ ଉଗାଳିଥିଲେ । ଅନେକ ସମୟରେ ଏହି ଚୁନରି ପକା ଓ ଜବରଦସ୍ତ ପ୍ରସାଦ ବଣ୍ଟାକୁ ନେଇ ବଡ଼ଦେଉଳରେ ଉଚ୍ଚବାଚ୍ଚ ମଧ୍ୟ ହେଉଛି । ଏସବୁ ପ୍ରତି ଦୃଷ୍ଟି ଦିଆ ନଯିବାରେ ପ୍ରତିଦିନ ଶହ ଶହ ଜଗନ୍ନାଥପ୍ରେମୀ ଠକେଇର ଶିକାର ହୋଇ ଫେରୁଛନ୍ତି । ଦର୍ଶନ ସମୟରେ ଶ୍ରଦ୍ଧାଳୁଙ୍କ ସହ ମୂଲ୍ଚାଲ୍ କରିବା କିମ୍ବା ଶ୍ରଦ୍ଧାଳୁଙ୍କ ଠାରୁ ମନଇଛା ଦକ୍ଷିଣା ମାଗିବାକୁ ବାରଣ ହୋଇଛି । ଶ୍ରୀମନ୍ଦିର ଅଧିକାରୀ ଓ ବରିଷ୍ଠ ସେବାୟତ ସବୁକିଛି ଦେଖୁଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନହେବାରେ ଦିନକୁ ଦିନ ଶ୍ରଦ୍ଧାଳୁ ଶୋଷଣର ସମ୍ମୁଖୀନ ହେବା ସହ ଶ୍ରୀମନ୍ଦିର ମର୍ଯ୍ୟାଦାକୁ ହାନି ପହଞ୍ଚୁଛି ।