ଇଣ୍ଡିଗୋ ବିମାନ ବିଶୃଙ୍ଖଳା: ଏୟାରଲାଇନ ଉପରେ ଲାଗିଲା ୨୨ କୋଟି ଫାଇନ, ସିଇଓଙ୍କ ସମେତ ବଡ଼ ଅଧିକାରୀଙ୍କୁ ଚେତାବନୀ

ନୂଆଦିଲ୍ଲୀ: ଗତବର୍ଷ ଶେଷ ଆଡ଼କୁ ଇଣ୍ଡିଗୋରେ ଯେଉଁ ଅବ୍ୟବସ୍ଥା ଦେଖା ଦେଇଥିଲା ତା’ ପାଇଁ ଇଣ୍ଡିଗୋ ଏୟାରଲାଇନ୍କୁ ୨୨ କୋଟି ଟଙ୍କାର ଫାଇନ କରିଛି ବେସାମରିକ ବିମାନ ଚଳାଚଳ ପ୍ରାଧିକରଣ(ଡିଜିସିଏ)।

ଗତ ବର୍ଷ ଡିସେମ୍ବରରେ ଇଣ୍ଡିଗୋ ଏକ ବଡ଼ ସଙ୍କଟର ସମ୍ମୁଖୀନ ହୋଇଥିଲା। ହଜାର ହଜାର ଉଡ଼ାଣ ବିଳମ୍ବିତ ଏବଂ ବାତିଲ ହୋଇଥିଲା, ଯାହା ଫଳରେ ଯାତ୍ରୀମାନଙ୍କୁ ବହୁତ ଅସୁବିଧାରେ ସାମ୍ନା କରିବାକୁ ପଡ଼ିଥିଲା। ଏହି ମାମଲାରେ DGCAର ତଦନ୍ତ ରିପୋର୍ଟ ଏବେ ପ୍ରକାଶ ପାଇଛି। ରିପୋର୍ଟରେ କାର୍ଯ୍ୟର ଅତ୍ୟଧିକ ଅପ୍ଟିମାଇଜେସନ୍, କ୍ରୁ ଏବଂ ବିମାନ ପାଇଁ ପର୍ଯ୍ୟାପ୍ତ ବ୍ୟାକଅପ୍ ନ ହେବା ଏବଂ ନୂଆ FDTL ନିୟମାବଳୀର ଠିକ୍ ଭାବେ କାର୍ଯ୍ୟକାରୀ ନ କରିବା କଥା କୁହାଯାଇଛି।

ଘଟଣାରେ ଏୟାରଲାଇନ ଉପରେ କଡ଼ା କାର୍ଯ୍ୟାନୁଷ୍ଠାନ କରିଛି ଡିଜିସିଏ। ଏୟାରଲାଇନର ସିଇଓଙ୍କୁ ଓ ସିଓଓ (ଆକାଉଣ୍ଟାବେଲ୍ ମ୍ୟାନେଜର)ଙ୍କୁ ଏକ ଚେତାବନୀ ଜାରି କରାଯାଇଛି। ଏବଂ SVP (OCC)ଙ୍କୁ ପରିଚାଳନାଗତ ଦାୟିତ୍ୱରୁ ବହିଷ୍କାର କରିବାକୁ ନିର୍ଦ୍ଦେଶ ଦିଆଯାଇଛି। ଏହା ବ୍ୟତୀତ, DGCA ଉଡ଼ାଣରେ ଗୁରୁତ୍ୱପୂର୍ଣ୍ଣ ବାଧା ପାଇଁ ଇଣ୍ଡିଗୋ ଉପରେ ₹୨୨.୨ କୋଟି ଟଙ୍କାର ଜରିମାନା ଲଗାଇଛି।

ଡିଜିସିଏ ତଦନ୍ତ ରିପୋର୍ଟରେ ସଫ୍ଟୱେର୍ ଏବଂ ପରିଚାଳନାରେ ଗମ୍ଭୀର ତ୍ରୁଟି ବିଷୟରେ ଉଲ୍ଲେଖ କରାଯାଇଛି। କ୍ରୁ ଉପରେ ଅତ୍ୟଧିକ ଚାପ ପକାଇଥିବା, ଅଧିକ ଡ୍ୟୁଟି କରାଇବା ଆଦି ରିପୋର୍ଟରେ କୁହାଯାଇଛି। ଡେଡ୍-ହେଡିଂ, ଟେଲ୍ ସ୍ୱାପ୍ ଏବଂ ଲମ୍ବା ଡ୍ୟୁଟି ଆୱାର ଆଦି ସମସ୍ୟା ଦର୍ଶାଇଯାଇଛି।

ସମ୍ପୂର୍ଣ୍ଣ ମାମଲା ଥିଲା ଏମିତି

୨୦୨୫ ଡିସେମ୍ବରରେ, ୨,୫୦୭ ଇଣ୍ଡିଗୋ ବିମାନ ଉଡ଼ାଣ ବାତିଲ କରାଯାଇଥିଲା ଏବଂ ୧,୮୫୨ ଟି ବିଳମ୍ବ ହୋଇଥିଲା, ଯାହା ଫଳରେ ବିଭିନ୍ନ ବିମାନବନ୍ଦରରେ ଫସି ରହିଥିବା ୩ ଲକ୍ଷରୁ ଅଧିକ ଯାତ୍ରୀ ଅସୁବିଧାର ସମ୍ମୁଖୀନ ହୋଇଥିଲେ। ଜନ ଅସନ୍ତୋଷ ବଢ଼ିବାରୁ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ (MoCA) ଏହାର ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ। ଏହାପରେ ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (DGCA) ଏକ ଚାରି ଜଣିଆ ସଦସ୍ୟ ବିଶିଷ୍ଟ କମିଟି ଗଠନ କରି ତଦନ୍ତ ଆରମ୍ଭ କରିଥିଲା।