ଟ୍ୟାକ୍ସିର ଷ୍ଟିୟରିଂରୁ କ୍ରେମଲିନର ଶୀର୍ଷ ନେତା ପର୍ଯ୍ୟନ୍ତ ପୁଟିନଙ୍କ ଯାତ୍ରା କିପରି ଥିଲା ଆସନ୍ତୁ ଜାଣିବା

ନୂଆଦିଲ୍ଲୀ ୪।୧୨: ଭ୍ଲାଦିମୀର ପୁଟିନ ଯାହାଙ୍କୁ ଆଜି ସାରା ବିଶ୍ୱରେ ଶୀର୍ଷ ନେତାଙ୍କ ମଧ୍ୟରେ ଗଣାଯାଉଛି ତାଙ୍କ ପିଲାଦିନ ଓ ପରବର୍ତ୍ତି ଜୀବନ ଘୋର ସଂଘର୍ଷ ଓ ଅଭାବରେ ବିତିଛି। ଲେନିନଗ୍ରାଦର ଭଙ୍ଗା ଦଦରା ଘର ଓ ଯୁଦ୍ଧ ପରବର୍ତ୍ତି କଠିନ ପରିସ୍ଥିତି ତାଙ୍କ ବ୍ୟକ୍ତିତ୍ୱକୁ ଆକାର ଦେଇଛି। ତାଙ୍କ ଜୀବନୀର ଏକ ଅଶୁଣା କଥାରୁ ଜଣା ପଡେ ଯେ କିପରି ଏକ ମୁଷା ପିଲାଦିନେ ସବୁଠୁ ବଡ଼ ଶିକ୍ଷା ଦେଇଥିଲା, ଯାହା ତାଙ୍କୁ ଆଜି ଶିଖରରେ ପହଞ୍ଚାଇଛି।

୧୯୬୦ ଦଶକରେ ପୁଟିନ ତାଙ୍କ ମାତାପିତାଙ୍କ ସହ ଏକ ଭଙ୍ଗା ଦଦରା ଘରେ ରହୁଥିଲେ। ଏଠାରେ ସାଧାରଣ ମୌଳିକ ସୁବିଧା ମଧ୍ୟ ନଥିଲା। ଘରର ପଞ୍ଚମ ମହଲାକୁ ପହଞ୍ଚିବା ପାଇଁ ପୁଟିନଙ୍କୁ ସବୁଦିନ ମୁଷାଙ୍କ ସହ ସାକ୍ଷାତ ହେଉଥିଲା। ଦିନେ ତାଙ୍କ ରାସ୍ତାରେ ଏକ ବଡ଼ ମୁଷା ଆସିଯାଇଥିଲା। ପୁଟିନ ବାଡି ଧରି ତାକୁ ତଡିବାକୁ ଚେଷ୍ଟା କରିବାରୁ ସେ ପଳାଇଥିଲା ଓ ଏକ ଏପରି ସ୍ଥାନରେ ଫଶି ଯାଇଥିଲା ଯେଉଁଠାରେ ସେ ଆଉ ଆଗକୁ ବଢି ପାରିନଥିଲା। ଏଣୁ ପୁଟିନଙ୍କ ଉପରେ ଓଲଟା ଆକ୍ରମଣ କରିଥିଲା। ଏହି ଘଟଣା ପୁଟିନଙ୍କ ମନ ଉପରେ ଗଭୀର ରେଖାପାତ କରିଥିଲା। ଏଥିରୁ ସେ ଏହା ଶିକ୍ଷା କରିଥିଲେ ଯେ ଯଦି ବଞ୍ଚିବାର କୌଣସି ରାସ୍ତା ନଥାଏ ତେବେ ପାଲଟା ଆକ୍ରମଣ କରିବା ଦରକାର। ମୁଷା ଠାରୁ ଏହି ଶିକ୍ଷା ତାଙ୍କର ଭବିଷ୍ୟତର ରଣନୀତି ଓ ଦୃଢତାର ଆଧାର ପାଲଟିଥିଲା।

ପୁଟିନଙ୍କ ଜନ୍ମ ୭ ଅକ୍ଟୋବର ୧୯୫୨ରେ ଲେନିନଗ୍ରାଦ (ଏବେକା ସେଣ୍ଟ ପିଟର୍ସବର୍ଗ)ରେ ହୋଇଥିଲା। ତାଙ୍କ ପିତା ଭ୍ଲାଦିମୀର ସ୍ପିରିଡୋନଭିଚ୍ ପୁଟିନ ସୋଭିଏତ ନୌସେନାରେ ଥିଲେ ଓ ଦ୍ୱିତୀୟ ବିଶ୍ୱଯୁଦ୍ଧରେ ଆହତ ହୋଇଥିଲେ। ଏହା ପରେ ସେ ଟ୍ରେନ କାରଖାନାରେ କାମ କରୁଥିଲେ। ସେହିପରି ମା ମେରୀ ଏକ ଫ୍ୟାକ୍ଟ୍ରିରେ ୱାର୍କରେ ଥିଲେ। ପୁଟିନ ତାଙ୍କ ମାତପିାତଙ୍କ ତୃତୀୟ ସନ୍ତାନ ଥିଲେ। ତାଙ୍କ ଦୁଇ ବଡ଼ ଭାଇଙ୍କ ମୃତ୍ୟୁ ପିଲାଦିନେ ବେମାରୀ ଓ ଯୁଦ୍ଧ ଯୋଗୁ ଅନାହାରରେ ହୋଇଥିଲା। ଏପରି କଠିନ ପାରିବାରିକ ଓ ଆର୍ଥିକ ପରିସ୍ଥିତି ପୁଟିନଙ୍କୁ କମ୍ ବୟସରେ ଜୀବନର କଠୋର ବାସ୍ତବିକତା ସହିତ ପରିଚିତ କରାଇଥିଲା।

ପିଲାଦିନେ ବେଶ୍ ବିନମ୍ର ପୁଟିନଙ୍କର ଯେତେବେଳେ ପଡୋଶୀ ପିଲାଙ୍କ ସହ ମୁହାଁମୁହିଁ ହେଲା ସେ ହାରି ଯାଇଥିଲେ। ଏଣୁ ସେ ନିଜକୁ ମଜଭୁତ କରିବାକୁ ନିଷ୍ପତ୍ତି ନେଇଥିଲେ ଓ ଜୁଡୋ ଶିଖିବା ଆରମ୍ଭ କରିଥିଲେ। ସେ ଖୁବ୍ ଶୀଘ୍ର ନିଜକୁ ଷ୍ଟ୍ରିଟ୍ ଫାଇଟିଂ ଓ କଳିଝଗଡାରେ ସାମିଲ କରିଦେଇଥିଲେ। ମାର୍ଶାଲ ଆର୍ଟ ପ୍ରତି ତାଙ୍କର ଋଚି ଏତେ ବଢି ଯାଇଥିଲା ଯା ସେ ମାତ୍ର ୧୮ ବର୍ଷ ବୟସରେ ବ୍ଲାକ୍ ବେଲ୍ଟ ହାସଲ କରିଥିଲେ। ଏହି ଖେଳ ତାଙ୍କୁ ଅନୁଶାସନ, ଆତ୍ମରକ୍ଷା ଓ ପ୍ରତିଦ୍ୱନ୍ଦ୍ୱୀଙ୍କ ଉପରେ ବିଜୟ ପ୍ରାପ୍ତ କରିବାର କଳା ଶିଖାଇଥିଲା।

ପିଲାଦିନେ ଗୋଇନ୍ଦା ନୋଭେଲ ପଢିବାକୁ ଆଗ୍ରହୀ ପୁଟିନ ବଡ ହେଲେ ଋଷିଆ ଗୋଇନ୍ଦା କେଜିବିରେ ଯୋଗ ଦେବାକୁ ଚାହୁଁଥିଲେ। ସେ ତାଙ୍କର ଏହି ଲକ୍ଷ୍ୟ ପୂରଣ କରିବାକୁ ଆଇନ ପଢା ଶେଷ କରିବା ପରେ ୧୯୭୫ରେ କେଜିବିରେ ସାମିଲ ହୋଇଯାଇଥିଲା। ସେ ୧୯୯୧ ମସିହାରେ ସୋଭିଏତ ସଂଘର ପତନ ପର୍ଯ୍ୟନ୍ତ ଲେଫ୍ଟନାଣ୍ଟ କର୍ଣ୍ଣେଲ ପଦବୀରେ ଥିଲେ। ସୋଭିଏତ ସଂଘ ପତନ ପରେ ଆରମ୍ଭ ହୋଇଥିବା ଆର୍ଥିକ ସଂକଟ କାଳରେ ସେ ପରିବାରର ଦାୟିତ୍ୱ ନିର୍ବାହ କରିବାକୁ ଓ ଅତିରିକ୍ତ ଆୟ ନିମନ୍ତେ ଟ୍ୟାକ୍ସି ଡ୍ରାଇଭର ରୂପେ କାମ କରିଥିଲେ।

୧୯୯୦ ଦଶକ ଆରମ୍ଭରେ ପୁଟିନ ଲେନିନଗ୍ରାଦ ମେୟର କାର୍ଯ୍ୟାଳୟରେ କାମ କରିବା ଆରମ୍ଭ କରିଥିଲେ ଓ ଉପମେୟର ହୋଇଥିଲେ। ୧୯୯୬ ମସିହାରେ ସେ ମସ୍କୋ ଚାଲି ଯାଇଥିଲେ ଓ ତତ୍କାଳୀନ ରାଷ୍ଟ୍ରପତି ବୋରିସ ଏଲସିନ୍ ଙ୍କ ପ୍ରଶାସନରେ ସେ ଅନେକ ଗୁରୁତ୍ୱପୂର୍ଣ୍ଣ ପଦପଦବୀରେ କାମ କରିଥିଲେ। ୧୯୯୯ ମସିହାରେ ସେ କାର୍ଯ୍ୟକାରୀ ରାଷ୍ଟ୍ରପତି ହୋଇଥିଲେ ଓ ମାର୍ଚ୍ଚ ୨୦୦୦ରେ ଅନୁଷ୍ଠିତ ନିର୍ବାଚନରେ ଔପଚାରିକ ଭାବେ ରାଷ୍ଟ୍ରପତି ନିର୍ବାଚିତ ହୋଇଥିଲେ। ମଝିରେ ୨୦୦୮ରୁ ୨୦୧୨ ମସିହା ପର୍ଯ୍ୟନ୍ତ ଦେଶର ପ୍ରଧାନମନ୍ତ୍ରୀ ଥିଲେ।

ଟ୍ୟାକ୍ସିର ଷ୍ଟିୟରିଂରୁ ନେଇ କ୍ରେମଲିନର ଉଚ୍ଚକ୍ଷମତା ପର୍ଯ୍ୟନ୍ତ ପୁଟିନଙ୍କ ଏହି ଯାତ୍ରା କେବଳ ତାଙ୍କର କଠୋର ଅନୁଶାସନ,ଦୃଢ ରାଜନୈତିକ ଇଚ୍ଛା ଶକ୍ତି ଓ ତାଙ୍କ ରଣନୈତିକ ମାନସିକତାର ପ୍ରତୀକ।