ମୁମ୍ବାଇ ୨୭।୦୩; ଟିମ୍‌ ଇଣ୍ତିଆର ଷ୍ଟାର ବ୍ୟାଟର ବିରାଟ କୋହଲି ।  ଦୁନିଆର ଶ୍ରେଷ୍ଠ କ୍ରିକେଟରଙ୍କ ମଧ୍ୟରୁ ଜଣେ । ସବୁବେଳେ କିଙ୍ଗ୍ କୋହଲି ନିଜ ବ୍ୟକ୍ତିଗତ ଓ ବୃତ୍ତିଗତ ଜୀବନକୁ ନେଇ ରୁହନ୍ତି ଚର୍ଚ୍ଚାରେ । ୨୦୦୮ରେ ଟିମ୍ ଇଣ୍ଡିଆ ପାଇଁ  ଡେବ୍ୟୁ କରିଥିବା ବିରାଟ ନିଜର ଧୁଆଁଧାର ବ୍ୟାଟିଂ ପାଇଁ ବିଶ୍ୱ କ୍ରିକେଟ୍‌ରେ ବେଶ୍ ପରିଚିତ । ୧୫ ବର୍ଷର ଅନ୍ତର୍ଜାତୀୟ କ୍ରିକେଟ କ୍ୟାରିୟରରେ ୨୫ ହଜାରରୁ ଅଧିକ ରନ୍ କରିଛନ୍ତି । ୧୮ନଂ ଜର୍ସି ପିନ୍ଧି ସର୍ବାଦ କ୍ରିକେଟ୍‌ ପଡ଼ିଆରେ ଚଉକା ଛକା ମାରିଥାନ୍ତି କୋହଲି। ଆପଣ ଜାଣିଛନ୍ତି କି ଏହି ୧୮ନଂ ଜର୍ସି ପଛର ରାଜ୍ । ଆସନ୍ତୁ ଜାଣିବା ।

କ୍ରିକେଟ୍‌ରେ ପ୍ରତିଟି ଖେଳାଳିଙ୍କ ଜର୍ସି ପଛରେ ରହିଥାଏ ଏକ ନମ୍ବର । ଖେଳାଳିଙ୍କ ଇଚ୍ଛାନୁଯାୟୀ ରଖାଯାଏ । ଏହାକୁ ସମସ୍ତେ ନିଜର ଲକି ନଂ ବୋଲି କହିଥାନ୍ତି । ତେବେ ବିରାଟଙ୍କ ୧୮ ନଂ ଜର୍ସି ପଛରେ କଣ ରହିଛି ସ୍ପେଶାଲ୍ । ୨୦୦୮ U-19 ବିଶ୍ୱକପ୍‌ରେ ଅଧିନାୟକ ଥିବା ବେଳୁ ହିଁ ସେ ୧୮ ନଂ ଜର୍ସି ପିନ୍ଧି ଆସୁଛନ୍ତି । କୁହାଯାଉଛି କି କିଙ୍ଗ୍ କୋହଲିଙ୍କ ଏହି ନମ୍ବର ପଛରେ ରହିଛି ଏକ ଭାବପୂର୍ଣ୍ଣ କାହାଣୀ । ବିରାଟ ମାତ୍ର ୧୭ ବର୍ଷ ବୟସରେ ନିଜ ପିତାଙ୍କୁ ହରାଇଥିଲେ । ଡିସେମ୍ବର ୧୮, ୨୦୦୬ରେ ତାଙ୍କ ପିତାଙ୍କର ହୋଇଥିଲା ଦେହାନ୍ତ ।

 ସେହିଦିନକୁ ସ୍ମରଣୀୟ କରିବା ପାଇଁ ସେ ୧୮ ନଂ ଜର୍ସି ପିନ୍ଧି ଆସୁଛନ୍ତି । କୋହଲି ଗଣମାଧ୍ୟମକୁ ସାକ୍ଷାତକାର ଦେଇଥିବା ବେଳେ କହିଥିଲେ ଯେ, ‘ମୋର ଆଜି ବି ମନେ ଅଛି ସେହି ରାତି, ଯେଉଁଦିନ ମୋ ବାପାଙ୍କର ଦେହାନ୍ତ ହୋଇଥିଲା । ଏହା ମୋ ପାଇଁ କଷ୍ଟଦାୟକ ସମୟ ଥିଲା । ତା’ପରଦିନ ପୁଣି କ୍ରିକେଟ୍‌ ପଡ଼ିଆକୁ ଓହ୍ଲାଇବା ମୋ ପାଇଁ ବେଶ୍‌ କଠିନ୍‌ ସମୟ ଥିଲା । ବାପାଙ୍କ ଦେହାନ୍ତ ପରଦିନ ସକାଳେ ମୁଁ ମୋ କୋଚ୍‌ଙ୍କୁ ଫୋନ୍‌ କଲି ଏବଂ ଖେଳିବା ପାଇଁ କହିଲି । ମୋ ପାଇଁ ମ୍ୟାଚ୍‌ ଅଧାରେ ଛାଡ଼ିବା ପାପ ସହ ସମାନ । ସେହି ମୁହୂର୍ତ୍ତଟି ମୋ ଜୀବନକୁ ବଦଳାଇ ଦେଲା । ସେହି ସମୟରେ ଜାଣିପାରିଲି ଯେ କ୍ରିକେଟ୍‌ ମୋ ଜୀବନରେ ବେଶ୍‌ ମହତ୍ତ୍ୱପୂର୍ଣ୍ଣ’ ।

ତେବେ ବାପାଙ୍କ ଦେହାନ୍ତ ଦିନ କୋହଲି କର୍ଣ୍ଣାଟକ ବିପକ୍ଷରେ ଦିଲ୍ଲୀ ପକ୍ଷରୁ ରଣଜୀ ଟୁର୍ଣ୍ଣାମେଣ୍ଟ ଖେଳୁଥିଲେ । ସେହି ମ୍ୟାଚ୍‌ରେ କୋହଲି ୯୦ ରନ୍‌ର ଦମଦାର ଇନିଂସ ଖେଳିଥିଲେ । କିନ୍ତୁ ତାଙ୍କ ମାଆ ଓ ପରିବାର ଲୋକଙ୍କ ପରାମର୍ଶ ପରେ ସେ ପିତାଙ୍କ ଦେହାନ୍ତ ପରଦିନ ମଧ୍ୟ କ୍ରିକେଟ୍‌ ପଡ଼ିଆକୁ ଓହ୍ଲାଇଥିଲେ । ତାଙ୍କର ଏହି ନିଷ୍ପତ୍ତିକୁ ସମସ୍ତେ ସମ୍ମାନ ଜଣାଇଥିଲେ ।