ନୂଆଦିଲ୍ଲୀ ୨୬।୦୩; ଭୟଙ୍କର ଘୂର୍ଣ୍ଣିଝଡ଼, ବର୍ଷା ଓ ବିଜୁଳି ମାଡ଼ରେ ସଂପୂର୍ଣ୍ଣ ଭାବେ ଛିନଛତ୍ର ହୋଇଯାଇଛି ଆମେରିକାର ମିସିସିପି ସହର । ଏଥିରେ ୨୬ଜଣଙ୍କ ମୃତ୍ୟୁ ଘଟିଥିବା ବେଳେ , ଅନେକ ଲୋକ ଆହତ ହୋଇଛନ୍ତି । ଘୂର୍ଣ୍ଣିଝଡ଼ ଯୋଗୁ କିଛି ମିନିଟ ମଧ୍ୟରେ ପୂରା ସହରର ରୂପ ବଦଳି ଯାଇଛି । ଘର ଠାରୁ ଆରମ୍ଭ କରି ଗାଡ଼ି ଯାଏ ସବୁ କିଛି କ୍ଷତିଗ୍ରସ୍ତ ହୋଇଛି  ।

ରାଜ୍ୟର ବିପର୍ଯ୍ୟୟ ପ୍ରଶମନ ଏଜେନ୍ସି କହିଛି ଯେ, ବିଶାଳକାୟ ଘୂର୍ଣ୍ଣଝଡ଼ର ପ୍ରଭାବ ପ୍ରାୟ ୧୬୦ କିଲୋମିଟର ଅଞ୍ଚଳ ମଧ୍ୟରେ ଦେଖିବାକୁ ମିଳିଛି । ଝଡ଼ ଥମିବା ପରେ ଲୋକମାନେ ଧ୍ବଂଶାବଶେଷ ତଳୁ ନିଜ ପରିବାର ଲୋକ ଓ ଜିନିଷ ଖୋଜିବା ଆରମ୍ଭ କରିଛନ୍ତି । ସେହିପରି ଆଗକୁ ମୃତାହତଙ୍କ ସଂଖ୍ୟା ବଢ଼ିପାରେ ବୋଲି ମଧ୍ୟ ଆକଳନ କରାଯାଉଛି।

ଦେଶର ଜାତୀୟ ପାଣିପାଗ ବିଭାଗ ଅନୁଯାୟୀ, ଏହି ଘୂର୍ଣ୍ଣିବଳୟ ମିସିସିପିର ଉତ୍ତର-ପୂର୍ବରେ ପ୍ରାୟ ୬୦ ମାଇଲ ଦୂରରେ ଅବସ୍ଥିତ । ଏହି ଘୂର୍ଣ୍ଣିବଳୟ ଆଲାବାମାର ୱିନୋନା ଏବଂ ଆମୋରୀ ଆଡକୁ ୧୧୩ କିଲୋମିଟର ବେଗରେ ଗତି ଜାରି ରଖିଛି ବୋଲି ଆସୋସିଏଟେଡ୍ ପ୍ରେସ ରିପୋର୍ଟ କରିଛି।

ଖବର ଅନୁଯାୟୀ, ପ୍ରଭାବିତ ଅଞ୍ଚଳରେ ଉଦ୍ଧାରକାରୀ ଦଳ କାର୍ଯ୍ୟ ଜାରି ରଖିଛନ୍ତି । ଏଥିସହିତ ମିସିସିପି ରାଜ୍ୟପାଳ ଟେଟ୍ ରିଭସ୍ ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି । ଏଥିସହିତ ଆମେରିକାର ରାଷ୍ଟ୍ରପତି ଜୋ ବିଡେନ ମଧ୍ୟ ସହାୟତା ପାଇଁ ପ୍ରତିଶୃତି ଦେଇଛନ୍ତି ।