ନୂଆଦିଲ୍ଲୀ: ୧୩/୦୫: ଜମି ଦୁର୍ନୀତି ସହ ଜଡିତ ମନି ଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟର ଗିରଫଦାରିକୁ ବିରୋଧ କରି ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନ ଦାୟର କରିଥିବା ଆବେଦନର ସୁପ୍ରିମକୋର୍ଟ ସୋମବାର ଶୁଣାଣି କରିବେ । ବିଚାରପତି ସଞ୍ଜିବ ଖାନ୍ନା ଓ ବିଚାରପତି ଦିପଙ୍କର ଗୁପ୍ତାଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରିବା ଲାଗି ଦିନଧାର୍ଯ୍ୟ କରିଛନ୍ତି ।
ଗିରଫଦାରି ବିରୋଧରେ ହେମନ୍ତ କରିଥିବା ଆବେଦନକୁ ଗତ ୩ ତାରିଖରେ ହାଇକୋର୍ଟ ଖାରଜ କରିବା ପରେ ସେ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛନ୍ତି । ଏଥିସହ ଏହି ମାମଲାରେ ସର୍ବୋଚ୍ଚ ଅଦାଲତ ରାୟ ଦେବା ପୂର୍ବରୁ ତାଙ୍କୁ ଲୋକସଭା ନିର୍ବାଚନ ଲାଗି ପ୍ରଚାର ଅନୁମତି ଦେବାକୁ ହେମନ୍ତ ଅନୁରୋଧ କରିଛନ୍ତି । ଗତ ଜାନୁଆରୀ ୩୧ ତାରିଖରେ ଇଡି ହେମନ୍ତଙ୍କୁ ଗିରଫ କରିଥିଲା । ତେବେ ଏହା ପୂର୍ବରୁ ସେ ରାଜ୍ୟପାଳଙ୍କୁ ଭେଟି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ ଏବଂ ରାଜ୍ୟର ପରିବହନ ମନ୍ତ୍ରୀ ଚମ୍ପାଇ ସୋରେନ ଝାଡଖଣ୍ଡର ନୂଆ ମୁଖ୍ୟମନ୍ତ୍ରୀ ହୋଇଥିଲେ । ହେମନ୍ତ ଏବେ ବିଚାର ବିଭାଗୀୟ ହାଜତରେ ଅଛନ୍ତି । ତାଙ୍କୁ ରାଞ୍ଚିର ବିର୍ସାମୁଣ୍ଡା ସେଣ୍ଟ୍ରାଲ ଜେଲ୍ରେ ରଖାଯାଇଛି।
