ନୂଆଦିଲ୍ଲୀ: ରମଜାନ ମାସ ଆରମ୍ଭ ହୋଇସାରିଛି ଏବଂ ଏହାରି ଭିତରେ ଇସଲାମିକ୍ ଦୁନିଆରେ ଏକତା ବଢୁଥିବା ଦେଖିବାକୁ ମିଳୁଛି । କିଛି ଦିନ ପୂର୍ବେ ଇରାନ ସହ ପୁଣି ଥରେ କୂଟନୀତିକ ସମ୍ପର୍କ ଆରମ୍ଭ କରିବା ନେଇ ସାଉଦି ଘୋଷଣା କରିଥିଲା । ଶିଆ ଏବଂ ସୁନ୍ନିର ନେତୃତ୍ୱ ନେଉଥିବା ଦୁଇ ଦେଶ ମଧ୍ୟରେ ଘନିଷ୍ଠତା ବିଶ୍ୱ ରାଜନୀତି ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଅଟେ । ଏହାରି ଭିତରେ ସାଉଦି ଆରବ ଏବଂ ସିରିଆ ପରସ୍ପର ମଧ୍ୟରେ କୂଟନୀତିକ ସମ୍ପର୍କ ପୁଣି ଆରମ୍ଭ କରିବାକୁ ନିଷ୍ପତ୍ତି ନେଇଛନ୍ତି । ଦୁଇ ଦେଶ ଏକ ଦଶନ୍ଧି ପୂର୍ବେ ନିଜ ସମ୍ପର୍କକୁ ଶେଷ କରିଥିଲେ ଏବଂ ଦୂତାବାସ ବନ୍ଦ କରି ଦେଇଥିଲେ ।
ସିରିଆ ଏବଂ ସାଉଦି ଆରବ ନିଜ ନିଜ ଦେଶରେ ପୁଣି ଥରେ ଦୂତାବାସ ଖୋଲିବାକୁ ନିଷ୍ପତ୍ତି ନେଇଛନ୍ତି । ଦାବି କରାଯାଉଛି ଯେ ଇରାନ ଏବଂ ସାଉଦି ଆରବ ମଧ୍ୟରେ ଘନିଷ୍ଠତା ଆସିବା ପରେ ହିଁ ଏହା ସମ୍ଭବ ହୋଇପାରିଛି । ଉଲ୍ଲେଖଯୋଗ୍ୟ ଯେ ସିରିଆକୁ ଇରାନ ସାହାଯ୍ୟ କରିଆସୁଛି । ଏହି କାରଣରୁ ହିଁ ସିରିଆ ଏବଂ ସାଉଦି ମଧ୍ୟରେ ଦୂରତା ବଢିଥିଲା । ୨୦୧୧ରେ ସିରିଆରେ ଗୃହଯୁଦ୍ଧ ଆରମ୍ଭ ହେବା ପରେ ଉପସାଗରୀୟ ଦେଶଗୁଡିକ ସିରିଆକୁ ଏକା କରି ଦେଇଥିଲେ ।
ଏପ୍ରିଲର ଦ୍ୱିତୀୟ ସପ୍ତାହରେ ଇଦ୍ ପରେ ଉଭୟ ଦେଶ ଦୂତାବାସ ଖୋଲିବେ । ତେବେ ସାଉଦି ଆରବର ବିଦେଶ ମନ୍ତ୍ରାଳୟ ଏହି ଖବର ଉପରେ ବର୍ତ୍ତମାନ ସୁଦ୍ଧା କୌଣସି ପ୍ରତିକ୍ରିୟା ରଖି ନାହିଁ । ଉଲ୍ଲେଖଯୋଗ୍ୟ ଯେ ଆମେରିକା ସହ ସାଉଦି ଅରବ ଏବଂ କତାର ପରି ଦେଶ ସିରିଆରେ ବିଦ୍ରୋହୀ ସଂଗଠନର ସମର୍ଥନ କରି ଆସୁଛନ୍ତି । ସାଉଦିର ଏହି ନିଷ୍ପତ୍ତି ପୁଣି ଥରେ ଆମେରିକାକୁ ଏକ ଝଟକା ବୋଲି କୁହାଯାଉଛି ।
