ନୂଆଦିଲ୍ଲୀ: ସାଂଘାଇ ସହଯୋଗ ସଂଗଠନ(ଏସସିଓ)ରେ ଯୋଗ ଦେବାକୁ ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟସଙ୍କର ପାକିସ୍ତାନ ଯିବା ପରେ ଦୁଇ ଦେଶର ସମ୍ପର୍କରେ ସୁଧାର ଆସିବା ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ତେବେ ଭାରତ ଅପେକ୍ଷା ପାକିସ୍ତାନରେ ଏହି ଚର୍ଚ୍ଚା ଅଧିକ ହେଉଛି। ଅତୀତକୁ ପଛରେ ପକାଇ ଭବିଷ୍ୟତର ଶକ୍ତି ଓ ଜଳବାୟୁ ପରିବର୍ତ୍ତନ ସମସ୍ୟା ସମାଧାନ ଉଭୟ ପାଇଁ ଆଗେଇ ଆସିବେ ବୋଲି ଶାସକ ଦଳର ନେତା ତଥା ପକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ ଆଶା ବ୍ୟକ୍ତ କରିଛନ୍ତି।
ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେକୁ ସାକ୍ଷାତ୍କାର ଦେଇ ନୱାଜ ଭାରତ ଏବଂ ପାକିସ୍ତାନ ମଧ୍ୟରେ ଶାନ୍ତି ପ୍ରକ୍ରିୟାକୁ ପୁନଃ ସ୍ଥାପନ କରିବା ଏବଂ ଆଉ ଯେମିତି କେବେ ଶାନ୍ତି ଭଙ୍ଗ ନହୁଏ ଏଥିପ୍ରତି ଦୁଇ ଦେଶ ପ୍ରୟାସ କରିବା ଉଚିତ ବୋଲି କହିଛନ୍ତି।
ସେ ଆହୁରି କହିଛନ୍ତି ଯେ ଆମେ ସେହିଠାରୁ ସମ୍ପର୍କ ଆରମ୍ଭ କରିବା ଯେଉଁଠାରେ ଛାଡ଼ିଥିଲୁ। ଏମିତିରେ ୭୫ ବର୍ଷ ବିତିଗଲାଣି। ତେଣୁ ଆମେ ଆଉ ୭୫ ବର୍ଷ ବର୍ବାଦ କରିବା ନାହିଁ। ଏଥିସହିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏସସିଓ ବୈଠକକୁ ଆସିଥିଲେ ଭଲ ହୋଇଥାନ୍ତା ବୋଲି ନାୱଜ କହିଛନ୍ତି। ଆମେ ଆମ ପଡ଼ୋଶୀଙ୍କୁ ବଦଳାଇ ଦେଇପାରିବା ନାହିଁ। ବରଂ ଆମେ ଭଲ ପଡ଼ୋଶୀ ହୋଇ ରହିପାରିବା ବୋଲି କହିଛନ୍ତି ନୱାଜ ସରିଫ।
