ନୂଆଦିଲ୍ଲୀ: ଭୂମିକମ୍ପ ପରେ ତୁର୍କୀ ଓ ସିରିଆରେ ଭୟଙ୍କର ସ୍ଥିତି । ଚାରି ଆଡ଼େ ଧ୍ବଂସର ବିଭୀଷିକା। ଗତ ସୋମବାର ୭.୫ ତିବ୍ରତା ବିଶିଷ୍ଟ ଶକ୍ତିଶାଳୀ ଭୂମିକମ୍ପ ପରେ ଦୁଇ ଦେଶ ମଧ୍ୟରେ ଭୂକମ୍ପଜନିତ ମୃତ୍ୟୁ ସଂଖ୍ୟା ବଢିବାରେ ଲାଗିଛି। ବର୍ତ୍ତମାନ ସୁଦ୍ଧା ମୃତ୍ୟୁ ସଂଖ୍ୟା ୩୪ ହଜାର ପାର୍ କରିଛି ।
ଭୟଙ୍କର ଭୂମିକମ୍ପରେ ଲଗାତାର ବଢ଼ିବାରେ ଲାଗିଛି ମୃତ୍ୟୁ ସଂଖ୍ୟା। ଧ୍ବଂସାବଶେଷ ତଳୁ ମୃତଦେହ ଉଦ୍ଧାର କରୁଛନ୍ତି ଉଦ୍ଧାରକାରୀ ଦଳ । ଶକ୍ତିଶାଳୀ ଭୂମିକମ୍ପରେ ଦୁଇ ଦେଶରେ ୩୪,୧୦୫ଙ୍କ ମୃତ୍ୟୁ ହୋଇଛି । କେବଳ ତୁର୍କୀରେ ୨୯, ୬୦୫ଜଣ ଲୋକ ପ୍ରାଣ ହରାଇଥିବା ବେଳେ ସିରିଆରେ ୪,୫୭୪ ଜଣଙ୍କ ଜୀବନ ଯାଇଛି । ସେହିପରି ଗୁରୁତରଙ୍କ ସଂଖ୍ୟା ୧ଲକ୍ଷ ପାର୍ କରିଛି । ଗତ ୬ଦିନ ହେଲା ଉଭୟ ଦେଶରେ ଉଦ୍ଧାର କାର୍ଯ୍ୟ ଜାରି ରହିଛି ।
ସିରିଆ ସ୍ବାସ୍ଥ୍ୟ ମନ୍ତ୍ରାଳୟ ରିପୋର୍ଟ ମୁତାବକ, ସିରିଆର ଉତ୍ତର-ପୂର୍ବ ଅଞ୍ଚଳରେ ୩,୧୬୦ ମୃତ୍ୟୁବରଣ କରିଛନ୍ତି । ସେହିପରି ଷ୍ଟେଟ୍ ନ୍ୟୁଜ୍ ଏଜେନ୍ସିର ସୂଚନା ୧,୧୪୧ଙ୍କ ମୃତ୍ୟୁ ହୋଇଛି । ଶୀଘ୍ର ବିଶ୍ବ ସ୍ବାସ୍ଥ୍ୟ ସଂଗଠନ ତୁର୍କୀ ଗସ୍ତ କରି ସ୍ଥିତି ଅନୁଧ୍ୟାନ କରିବେ। ତୁର୍କୀରେ ବିନାଶକାରୀ ଭୂମିକମ୍ପ ପରେ ବର୍ତ୍ତମାନ ପର୍ଯ୍ୟନ୍ତ ଉଦ୍ଧାରକାର୍ଯ୍ୟ ଜାରି ରହିଛି । ୬ଦିନ ପରେ ବିଲ୍ଡିଂ ଧ୍ବଂସାବଶେଷ ତଳୁ ଜଣେ ଗର୍ଭବତୀ ମହିଳାଙ୍କ ସମେତ ଗୋଟିଏ ପରିବାରକୁ ଉଦ୍ଧାର କରାଯାଇଛି।
ତୁର୍କୀ ଏବଂ ସିରିଆରେ ଭୂକମ୍ପର ତାଣ୍ଡବ ପରେ ସବୁ ଦେଶ ସହଯୋଗର ହାତ ବଢାଇଛନ୍ତି । ଭରତ ପକ୍ଷରୁ ଅପରେସନ ଦୋସ୍ତି ଜାରି ରହିଛି । ଏନଡିଆରଏଫ ଟିମ୍ ଓ ଭାରତୀୟ ସେନା ମେଡିକାଲ ଦଳ ବିପନ୍ନଙ୍କୁ ଉଦ୍ଧାର କରି ଚିକିତ୍ସା ସୁବିଧା ଯୋଗାଇ ଦେଇଛନ୍ତି । ସେହିପରି ଜର୍ମାନୀର ଗୃହ ମନ୍ତ୍ରୀ ନାନ୍ସି ଫେଜର ଭୂକମ୍ପ ପୀଡିତ ଏବଂ ସେମାନଙ୍କ ପରିବାର ପାଇଁ ତିନି ମାସର ଭିସା ଦେବାକୁ ଘୋଷଣା କରିଛନ୍ତି ।
