ନୂଆଦିଲ୍ଲୀ ୧୦।୫: ଅନ୍ତରୀକ୍ଷ ପାଣିପାଗରେ ପରିବର୍ତ୍ତନର ସୂଚନା ମିଳୁଛି। ଚଳିତ ସପ୍ତାହକୁ ନେଇ ସ୍ପେସ୍ ୱେଦର ପ୍ରେଡିକ୍ସନରେ କୁହାଯାଇଛି ଯେ ଏକ ଶକ୍ତିଶାଳୀ ସୌର ଝଡ଼ ପୃଥିବୀକୁ ମୁହାଁଇଛି। ଯଦି ଏହି ଝଡ଼ର ପ୍ରଭାବ ପୃଥିବୀ ଉପରେ ପଡିବ ତେବେ ସାରା ବିଶ୍ୱରେ ବ୍ଲାକ୍ ଆଉଟ୍ ସମେତ ନେଭିଗେସନ ସିଷ୍ଟମରେ ଡିଷ୍ଟର୍ବାନ୍ସ ଓ ହାଇଫ୍ରିକ୍ୱେନ୍ସୀ ରେଡିଓ ୱେଭ୍ ପ୍ରଭାବିତ ହେବା ସହିତ ଅନେକ ପ୍ରକାରର ଅବ୍ୟବସ୍ଥା ଉପୁଜିବ। ଏହି ସୌର ଝଡ ସପ୍ତାହନ୍ତରେ ପୃଥିବୀକୁ ପ୍ରଭାବିତ କରିପାରେ ବୋଲି ଆକଳନ କରାଯାଉଛି।
ଆମେରିକୀୟ ସ୍ପେସ୍ ୱେଦର ପ୍ରେଡିକ୍ସନ ସେଣ୍ଟର ସୌର ଝଡ଼କୁ ନେଇ ଜି-୪ ଜିଓମ୍ୟାଗ୍ନେଟିକ୍ ଷ୍ଟର୍ମ ୱାଚ୍ ଜାରି କରିଛି। ରିପୋର୍ଟରେ କୁହାଯାଇଛି ଯେ ୨୦୦୫ ମସିହା ପରେ ପ୍ରଥମ ଥର ହେବାକୁ ଯାଉଥିବା ଏହି ସୌର ଝଡ଼ ଯୋଗୁ ଭୀଷଣ କ୍ଷୟକ୍ଷତିର ଆଶଙ୍କା କରାଯାଉଛି। ଦୀର୍ଘ ୧୯ ପରେ ଏହା ପ୍ରଥମ ଥର ହେବ ଯେଉଁଥିରେ ସାରା ବିଶ୍ୱରେ ବ୍ଲାକ୍ ଆଉଟ୍ ଭଳି ପରିସ୍ଥିତି ଉପୁଜିବ। ଫଳରେ ପୃଥିବୀରେ ବଡ଼ ଧରଣର କ୍ଷୟକ୍ଷତି ଆଶଙ୍କା କରାଯାଉଛି।
କରୋନେଲ ମାସ ଇଜେକ୍ସନ ବା ସିଏମଇ ସୂର୍ଯ୍ୟ ପୃଷ୍ଠରେ ହେଉଥିବା ବିସ୍ଫୋରଣ ଯୋଗୁ ହୋଇଥାଏ। ଏଣୁ ସୂର୍ଯ୍ୟଙ୍କ କରୋନାରୁ ପ୍ଲାଜମା ଓ ଚୁମ୍ବକୀୟ କ୍ଷେତ୍ର ବାହାରିଛି। ଯେବେ ଏହି ସିଏମଇ ପୃଥିବୀ ମୁହାଁ ହୁଏ ଏଥିରୁ ଭୂ-ଚୁମ୍ବକୀୟ ଝଡ଼ ଉତ୍ପନ୍ନ କରିପାରେ। ଏଭଳି ଝଡ଼ ପୃଥିବୀର କକ୍ଷ ଓ ଗ୍ରହର ପୃଷ୍ଠ ଉଭୟ ସ୍ଥାନରେ ବିଭିନ୍ନ ପ୍ରଣାଳୀକୁ ପ୍ରଭାବିତ କରିପାରେ। ସୌର ଝଡ଼ ଯୋଗୁ ସଞ୍ଚାର, ବିଦ୍ୟୁତ ପାୱାର ଗ୍ରୀଡ, ନେଭିଗେସନ, ରେଡିଓ ଏବଂ ଉପଗ୍ରହ ସଞ୍ଚାଳନ ମଧ୍ୟ ପ୍ରଭାବିତ ହୋଇଥାଏ।