ପୁରୀ ୦୫।୦୮ : ଶ୍ରୀମନ୍ଦିରରେ ପୁଣି ହିଡେନ୍ କ୍ୟାମେରା । ପଶ୍ଚିମଦ୍ୱାରା ଦେଇ ଶ୍ରୀମନ୍ଦିରକୁ ପ୍ରବେଶ ବେଳେ କ୍ୟାମେରା ସହ ଜଣେ ଯୁବକଙ୍କୁ ଧରିଲା ପୋଲିସ । କ୍ୟାମେରା ଜବତ ସହ ଉକ୍ତ ଯୁବକଙ୍କୁ ସିଂହଦ୍ୱାରା ଥାନାରେ ଅଟକ ରଖିଛି ପୋଲିସ ।
ଖବର ଅନୁଯାୟୀ, ଶ୍ରୀମନ୍ଦିର ସୁରକ୍ଷାକୁ ନେଇ ପୁଣି ଚିନ୍ତା । ଗତ କିଛି ଦିନ ହେଲା ଶ୍ରୀମନ୍ଦିରରୁ ତିନୋଟି ହିଡେନ୍ କ୍ୟାମେରା ଜବତ ହୋଇଛି । କିଛି ଦିନ ତଳେ ଜଣେ ଯୁବକ ଶ୍ରୀମନ୍ଦିର ମଧ୍ୟରେ ଚଷମାରେ ହିଡେନ୍ କ୍ୟାମେରା ଫିଟ୍ କରି ବୁଲୁଥିଲେ । ଯାହାକୁ ସନ୍ଦେହ ହେବା ପରେ ପୋଲିସ ଗିରଫ କରିବା ସହ ତାଙ୍କ ନାଁର ମାମଲା ରୁଜୁ କରିଥିଲା । ତେବେ ଗୋଟିଏ ଘଟଣାକୁ କିଛି ଦିନ ବିତିଛି କି ନାହିଁ ଆଉ ଏକ ମାମଲା ସାମ୍ନାକୁ ଆସିଛି । ଗୁଜୁରାଟ ସୁରତର ଜଣେ ଯୁବକ ଶ୍ରୀମନ୍ଦିର ମଧ୍ୟରେ ଚଷମାରେ ହିଡେନ କ୍ୟାମେରା ଲଗାଇ ପ୍ରବେଶ କରିଥିଲେ । ମୁକ୍ତି ମଣ୍ଡପ ନିକଟରେ ବୁଲୁଥିବା ବେଳେ ଧରିଥିଲେ ଜେଟିପି । ତାଙ୍କୁ ମଧ୍ୟ ସିଂହଦ୍ୱାର ଥାନାରେ ଅଟକ ରଖିଛି ପୋଲିସ । ଦୁଇଟି ଘଟଣାରେ ଆଖି ସାମ୍ନାରେ ଥିବା ବେଳେ ଆଉ ଏକ ଖବର ପୋଲିସ ପ୍ରଶାସନ ନିକଟକୁ ଆସିଛି । ଶ୍ରୀମନ୍ଦିରର ପଶ୍ଚିମ ଦ୍ୱାରା ଦେଇ ଜଣେ ଯୁବକ ଶ୍ରୀମନ୍ଦିରକୁ ପ୍ରବେଶ କରୁଥିଲେ । ତାଙ୍କ ସହିତ ମଧ୍ୟ ଏକ ହିଡେନ୍ କ୍ୟାମେରା ମଧ୍ୟ ରହିଥିଲା । ଯାହା ସଂପର୍କରେ ଖବର ପାଇ ତୁରନ୍ତ ଆକ୍ସନକୁ ଆସିଥିଲା ପୋଲିସ। ଉକ୍ତ ଯୁବକଙ୍କୁ ଅଟକ ରଖି ଜେରା କରୁଛି ପୋଲିସ । ଏହାସହ ହିଡେନ୍ କ୍ୟାମେର୍କୁ ମଧ୍ୟ ଜବତ କରିଛି ସିଂହଦ୍ୱାର ପୋଲିସ । ଅଟକ ଯୁବକଙ୍କ ଘର ପଶ୍ଚିମବଙ୍ଗ ବୋଲି ଜଣାପଡିଛି । ତାଙ୍କ ନାମ ବିପୁଲ ପାଲ୍ ବୋଲି ସୂଚନା ମିଳିଛି ।
ସେପଟେ ବାରମ୍ବାର ଶ୍ରୀମନ୍ଦିର ଭିତରକୁ ହିଡେନ୍ କ୍ୟାମେରା ଯିବା ନେଇ ଚିନ୍ତାରେ ସେବାୟତ ଓ ଭକ୍ତ। ଶ୍ରୀମନ୍ଦିର ବାହାରେ ଓ ଭିତରେ କଡ଼ା ସୁରକ୍ଷା ସତ୍ତ୍ୱେ ଏହି ବ୍ୟକ୍ତି ମାନେ ଶ୍ରୀମନ୍ଦିର ଭିତରକୁ କିଭଳି ହିଡେନ୍ କ୍ୟାମେରା ନେବାକୁ ସାହାସ କରୁଛନ୍ତି ତାକୁ ନେଇ ଏବେ ପ୍ରଶ୍ନ ଉଠାଇଛନ୍ତି ସେବାୟତ।
