ଭୁବନେଶ୍ୱର ୧୧।୦୫: ମୈତ୍ରେୟୀ ଲେଖିକା ସଙ୍ଗଠନର ଅଷ୍ଟମ ମାସିକ ଆଭାସୀ ଆସର ମେ ୮ ତାରିଖ ଅନୁଷ୍ଠିତ ହୋଇଯାଇଛି। ବରିଷ୍ଠ ଲେଖିକା ମୈତ୍ରେୟୀ ସୁନନ୍ଦା ବି ମହାପାତ୍ରଙ୍କ ସଭାପତିତ୍ବରେ ଅନୁଷ୍ଠିତ ଏହି ଆସରରେ ମୁଖ୍ୟ ଅତିଥି ଭାବେ ସୁପ୍ରତିଷ୍ଠିତ କବି ଡ. ସୁଷମା ମିଶ୍ର ଯୋଗଦେଇଥିଲେ। ସେ କାର୍ଯ୍ୟକ୍ରମକୁ ସମ୍ବୋଧିତ କରି କହିଥିଲେ ଯେ, "ମାଆ ନାହିଁ ତ ପାଦ ତଳର ମାଟି ନାହିଁ କି ମୁଣ୍ଡ ଉପରେ ଆକାଶ ନାହିଁ । ମାଆ ଅନ୍ତର୍ଯ୍ୟାମୀ, ମାଆର ମୃତ୍ୟୁ ନାହିଁ ।
ସେହିପରି ମୈତ୍ରେୟୀମାନଙ୍କୁ ଉଦ୍ବୋଧନ ଦେଇ ସଭାପତି କହିଛନ୍ତି ଯେ, ପ୍ରାପ୍ତି ଅପ୍ରାପ୍ତି ଭିତରେ ଏକ ମିଶ୍ର ଅନୁଭବ ହେଉଛି ଲେଖିକାର ଜୀବନ, ଏକ ମାଆର ଜୀବନ । ଇତ୍ୟବସରରେ ମାତୃ ଦିବସ ଉପଲକ୍ଷେ ଅନୁଷ୍ଠିତ କବିତା ଆସରରେ ମାଆ...ମାଟିରୁ ଆକାଶ, ବିଷୟବସ୍ତୁ ଆଧାରିତ ସ୍ବରଚିତ କବିତା ପାଠ କରିଥିଲେ ମୈତ୍ରେୟୀ ପଦ୍ମଜା ଶରଣ, ଡ. ଜ୍ୟୋତ୍ସ୍ନା ମଞ୍ଜରୀ ତ୍ରିପାଠୀ, ଚନ୍ଦ୍ରା ମିଶ୍ର, ନିହାରିକା ରଥ, ମିରିନା ମହାନ୍ତି ଓ ଇପ୍ସିତା ଷଡ଼ଙ୍ଗୀ । ପଠିତ କବିତାଗୁଡ଼ିକୁ ସମୀକ୍ଷା କରିଥିଲେ ବିଶିଷ୍ଟ କବି ବିଜୟଲକ୍ଷ୍ମୀ ପାଣିଗ୍ରାହୀ ।
ତେବେ ଏଥରର ସୃଜନୀରେ ସୁଲେଖିକା ସ୍ବାଗତିକା ସେଠୀଙ୍କର ଗଳ୍ପ ସଂକଳନ "କଲର୍ କଲର୍"କୁ ସମୀକ୍ଷା କରିଥିଲେ ସୁପରିଚିତା ଲେଖିକା ମୌସୁମୀ ଦାସ ଓ ସୁସାହିତ୍ୟିକା ମଧୁସ୍ମିତା ନାୟକ। ପ୍ରାରମ୍ଭରେ ମୈତ୍ରେୟୀ ବନ୍ଦନା ମିଶ୍ର ଭକ୍ତି ସଙ୍ଗୀତ ଗାନ କରିଥିଲେ। ଉପସ୍ଥାପିକା ମୈତ୍ରେୟୀ ମୀତା ପଟ୍ଟନାୟକ ଓ ସଂଯୋଜିକା ମୈତ୍ରେୟୀ ଶୁଚିସ୍ମିତା ମିଶ୍ରଙ୍କ ଦ୍ୱାରା କାର୍ଯ୍ୟକ୍ରମର ସଫଳ ପରିଚାଳନା ଶେଷରେ ମୈତ୍ରେୟୀ ସୁଚେତା ପାଣିଗ୍ରାହୀ ଧନ୍ୟବାଦ ଅର୍ପଣ କରି ସଭା ସାଙ୍ଗ କରିଥିଲେ।