ନୂଆଦିଲ୍ଲୀ ୧୯।୪: ରାଉଜ ଏଭେନ୍ୟୁ କୋର୍ଟରେ ଶୁକ୍ରବାର ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ଆବେଦନ ଉପରେ ଶୁଣାଣି ହୋଇଛି। ଏଥିରେ ସେ ତାଙ୍କ ଡାକ୍ତରଙ୍କ ସହିତ ଭର୍ଚୁଆଲ କନସଲଟାନ୍ସୀ ନିମନ୍ତେ ମଞ୍ଜୁରୀ ମାଗିଛନ୍ତି। ଏହି ଅବସରରେ ଓକିଲ ଜେଲରେ କେଜରିୱାଲ ଆଳୁପୁରୀ ଓ ମିଠା ଖାଇବା ନେଇ ଇଡି କରିଥିବା ଅଭିଯୋଗର ଜବାବ ମଧ୍ୟ ଦେଇଛନ୍ତି।
ମେଡିକାଲ ଆଧାରରେ ଜାମିନ ନିମନ୍ତେ ଜେଲରେ ଆଳୁପୁରୀ, ମିଠା ଓ ଆମ୍ବ ଖାଇବା ନେଇ ଇଡିଙ୍କ ଦାବି ଉପରେ କେଜରିୱାଲଙ୍କ ଓକିଲ କହିଛନ୍ତି ଯେ ତାଙ୍କ ମହକିଲ ଡାଇବେଟିସ୍ ରେ ଆକ୍ରାନ୍ତ । ତାଙ୍କୁ ଦୈନିକ ୫୦ ୟୁନିଟ ଇନସୁଲିନ ଦିଆଯାଉଛି। କେଜରିୱାଲ କହିଛନ୍ତି ଯେ ତାଙ୍କୁ ଏପର୍ଯ୍ୟନ୍ତ ଘରୁ ୪୮ ଥର ଖାଦ୍ୟ ପଠା ଯାଇଛି। ଯେଉଁଥିରେ ମାତ୍ର ୩ ଥର ତାଙ୍କୁ ଆମ୍ବ ଦିଆଯାଇଛି। କେଜରିୱାଲ କହିଛନ୍ତି ଯେ ସେ ୮ ମାର୍ଚ୍ଚ ପରେ ଆଉ ଆମ୍ବ ଖାଇ ନାହାନ୍ତି। ଆମ୍ବରେ ଗ୍ଲାଇସେମିକ ଇଣ୍ଡେକ୍ସ ୫୧ ଥାଏ। ଏହା ଭାତରେ ୭୩ ଓ ବ୍ରାଉନ ରାଇସର ୬୮ ଗ୍ଲାଇସେମିକ ଇଣ୍ଡେକ୍ସରୁ କମ୍ ଓ ଡାଏଟ ଚାର୍ଟରେ ତାଙ୍କୁ ଏଥି ପାଇଁ ମଞ୍ଜୁରୀ ମିଳିଛି।
ତିହାର ଜେଲରେ ଦୈନିକ ମିଠା ଖାଇବା ଅଭିଯୋଗରେ କେଜରିୱାଲ କହିଛନ୍ତି ଯେ ସେ ସୁଗର ଫ୍ରି ମିଠେଇ ଖାଉଛନ୍ତି ଓ ଏହି ମିଠେଇ ସେ ଏପର୍ଯ୍ୟନ୍ତ ମାତ୍ର ୬ ଥର ଖାଇଛନ୍ତି। ସେ କହିଛନ୍ତି ଯେ ସୁଗର ଲେବୁଲ କଣ୍ଟ୍ରୋଲ କରିବା ପାଇଁ ତାଙ୍କୁ ୧ ଏପ୍ରିଲ ପରଠାରୁ ଟଫି ଓ କଦଳି ଖାଇବାକୁ ଦିଆଯାଉଛି। ସେହିପରି ମିଠା ଚା ପିଉଥିବା ଅଭିଯୋଗ ସମ୍ପୂର୍ଣ୍ଣ ଭୁଲ। ସେ ସୁଗର ଫ୍ରି ଚା ପିଅନ୍ତି ଓ କେବେ ବି ମିଠା ଚା ପିଅନ୍ତି ନାହିଁ। ସେହିପରି ଜେଲକୁ ଆସିବା ଦିନଠାରୁ ସେ ମାତ୍ର ଗୋଟିଏ ଦିନ ଆଳୁପୁରି ଖାଇଥିଲେ ଓ ତାହାବି ନବରାତ୍ରି ପ୍ରସାଦ ରୂପେ ପାଇଥିଲେ।
ଜେଲରେ ନିୟମିତ ସ୍ୱାସ୍ଥ୍ୟ ଯାଞ୍ଚ ଓ ଇନସୁଲିନ ନିମନ୍ତେ କେଜରିୱାଲଙ୍କ ନିବେଦନ ମାମଲାରେ ଇଡି କୋର୍ଟଙ୍କୁ କହିଛନ୍ତି ଯେ ଜେଲ ଅଥରିଟିଙ୍କ ଠାରୁ କେଜରିୱାଲଙ୍କ ଡାୟେଟ ଚାର୍ଟ ରିପୋର୍ଟ ଆସୁଛି। କୋର୍ଟ କେଜରିୱାଲଙ୍କ ଆବେଦନର କପି ସମସ୍ତଙ୍କୁ ଦେବାକୁ କହିଛନ୍ତି। କୋର୍ଟ କହିଛନ୍ତି ଯେ ଆବେଦନରେ କେଜରିୱାଲ କଣ ଦାବି କରିଛନ୍ତି ତାହା ଏପର୍ଯ୍ୟନ୍ତ ଆମେ ଜାଣି ନାହୁଁ। ତେବେ କେଜରିୱାଲଙ୍କ ପକ୍ଷରୁ ତାଙ୍କ ଓକିଲ ଅଭିଷେକ ମନୁ ସିଂଘଭୀ ଇଡିକୁ ଆବେଦନର କପି ଦେଇ ଦିଆଯାଇଥିବା କହିଥିଲେ।
ଅରବିନ୍ଦ କେଜରିୱାଲ ଡାଇବେଟିସ୍ ରୋଗୀ ଅଟନ୍ତି। ଏଣୁ ତାଙ୍କ ଓକିଲ ରାଉଜ ଏଭେନ୍ୟୁ କୋର୍ଟରେ ଆବେଦନ ଦାଖଲ କରି ଭିଡିଓ କନଫରେନସିଂରେ ତାଙ୍କ ଡାକ୍ତରଙ୍କ ସହ ନିୟମିତ କନସଲଟିଂ କରିବାକୁ ଅନୁମତି ଦାବି କରିଛନ୍ତି। ତେବେ ଗୁରୁବାର ସେ ତାଙ୍କର ଆବେଦନ ପ୍ରତ୍ୟାହାର କରି ନେଇଥିଲେ ଓ ପୁଣି ଥରେ ଶୁକ୍ରବାର ରୁଜୁ କରିଛନ୍ତି।
