ନୂଆଦିଲ୍ଲୀ: ପାଣି ପାଇଁ ଲେବାନନରେ ହାହାକାର। ବୁନ୍ଦାଏ ପାଇଁ ମାଇଲ ମାଇଲ ଦୂର ଯାଉଛନ୍ତି ଲେବାନନ ନାଗରିକ। ଇସ୍ରାଏଲର ଏୟାର ଷ୍ଟ୍ରାଇକରେ ଦକ୍ଷିଣ-ପୂର୍ବ ଲେବାନନର ଶୈବା ସହର ଉପକଣ୍ଠରେ ଥିବା ଏକ ଜଳ ପ୍ରକଳ୍ପ ନଷ୍ଟ ହୋଇଯିବା ପରେ ମହାଦଶା ଭୋଗୁଛନ୍ତି ଏଠାକାର ନାଗରିକ। ଶୈବା ମହାନଗର ନିଗମ ଜିନହୁଆ ନ୍ୟୁଜ୍ ଏଜେନ୍ସିକୁ କହିଛି ଯେ ଶନିବାର ଇସ୍ରାଏଲର ଏକ ଯୁଦ୍ଧ ବିମାନ 'ଅଲ-ମାଗାରା' ଜଳ ପ୍ରକଳ୍ପ ଉପରେ ମିଶାଇଲ ମାଡ଼ କରିଛି।

ଏହି ପ୍ରକଳ୍ପ ଦକ୍ଷିଣ ଲେବାନନର ଅଲ-ଆରକୋବ, ହାସବାୟା ଏବଂ ମାର୍ଜିୟୋନ୍ ଅଞ୍ଚଳର ଗାଁ ଏବଂ ସହରକୁ ପାନୀୟ ଜଳ ଯୋଗାଇଥାଏ।ସୂତ୍ରରୁ ପ୍ରକାଶ ଯେ, ଏହି ଆକ୍ରମଣ ପ୍ରକଳ୍ପର ମୁଖ୍ୟ ନିର୍ଗମନପଥରେ ମିଶାଇଲ ମାଡ଼ ହୋଇଥିଲା।  ଯେଉଁଥିପାଇଁ ଗ୍ରାମଗୁଡିକୁ ଯୋଗାଇ ଦିଆଯାଉଥିବା ଜଳ ପ୍ରବାହିତ ହେବାକୁ ଲାଗିଲା। ଏହି ସମୟରେ, ଦକ୍ଷିଣ ଲେବାନନ୍ ୱାଟର ଏଷ୍ଟାବ୍ଲିସମେଣ୍ଟ (SLWE) ଶନିବାର କହିଛି ଯେ ଇସ୍ରାଏଲର ମିଶାଇଲ ମାଡ଼ରେ  ଏହି ପ୍ରକଳ୍ପ ଗୁରୁତର ଭାବେ କ୍ଷତିଗ୍ରସ୍ତ ହୋଇଛି।

ଅଲ-ଆରକୋବ ଏବଂ ହସବାୟା ପୌରସଂସ୍ଥା ଏକ ବିବୃତ୍ତି ଜାରି କରି କହିଛନ୍ତି ଯେ ପାନୀୟ ଜଳ ପ୍ରକଳ୍ପ ଉପରେ ଇସ୍ରାଏଲର ଆକ୍ରମଣ ହେତୁ ହୋଇଥିବା କ୍ଷୟକ୍ଷତିର ତୁରନ୍ତ ମରାମତି ପାଇଁ ସରକାରୀ ଏଜେନ୍ସି, ଆନ୍ତର୍ଜାତୀୟ ଅନୁଷ୍ଠାନ ଅନୁରୋଧ କରୁଛୁ। ଇସ୍ରାଏଲ ସେନା ଏହି ଆକ୍ରମଣ ଉପରେ ଏପର୍ଯ୍ୟନ୍ତ କୌଣସି ମନ୍ତବ୍ୟ ଦେଇନାହାଁନ୍ତି।

ଶନିବାର ନିଜେ ଇସ୍ରାଏଲ୍ ପ୍ରତିରକ୍ଷା ବାହିନୀ (ଆଇଡିଏଫ୍) ଏକ ବିବୃତ୍ତିରେ କହିଛି ଯେ ସଠିକ୍ ତଥ୍ୟ ଉପରେ ଆଧାର କରି ଏହାର ବାୟୁସେନା ମୁଖ୍ୟାଳୟ ଉପରେ ଆକ୍ରମଣ କରିଛି। ଏଥିରେ କୁହାଯାଇଛି ଯେ ବେରୁଟର ମଧ୍ୟଭାଗରେ ଥିବା ଆବାସିକ ଅଟ୍ଟାଳିକା ତଳେ ହେଜବୁଲଙ୍କ ଅସ୍ତ୍ରଶସ୍ତ୍ର ଭଣ୍ଡାର ଏହି ଅଞ୍ଚଳର ଜନସଂଖ୍ୟାକୁ ବିପଦରେ ପକାଇଛି। ସେପ୍ଟେମ୍ବର ୨୩ ଠାରୁ, ଇସ୍ରାଏଲ୍ ସୈନ୍ୟମାନେ ଲେବାନନ୍ ଉପରେ ବଡ଼ ଧରଣର ଏୟାର ଷ୍ଟ୍ରାଇକ୍ କରିଆସୁଛନ୍ତି।