ନୂଆଦିଲ୍ଲୀ୧୫।୦୨ : ହେଙ୍ଗୁର ସ୍ବାଦ,ସୁଗନ୍ଧ ଏବଂ ଉପକାରିତାରେ ଆମେ ସମସ୍ତେ ବେଶ୍ ପରିଚିତ । ଯେକୌଣସି ରୋଷେଇରେ ଅଳ୍ପ ଟିକେ ହେଙ୍ଗୁ ପକେଇଦେଲେ, ଏହାର ସ୍ବାଦ ଆସିଯାଏ ଅଲଗା । ଚାହିଦା ତୁଳନାରେ କମ୍ ଯୋଗାଣ ହେତୁ ଏହା ଦେଶରେ ଉଚ୍ଚା ଦରରେ ବିକ୍ରି ହୋଇଥାଏ । ଏହି କାରଣରୁ ଲୋକମାନେ କେବଳ ଛୋଟ ଛୋଟ ଡବାରେ କିଣି ନିଜକୁ ଭାଗ୍ୟବାନ ମନେ କରିଥାନ୍ତି । କିନ୍ତୁ ଆପଣ ଜାଣନ୍ତି କି ହେଙ୍ଗୁ କିପରି ତିଆରି ହୁଏ ?
ଦେଶ-ଦୁନିଆରେ ବହୁତ କମ ଲୋକ ଜାଣିଥାନ୍ତି ହେଙ୍ଗୁ ତିଆରି କରିବାର ପଦ୍ଧତି । କହିବାକୁ ଗଲେ ହେଙ୍ଗୁ ଏକ ଉଦ୍ଭିଦରୁ ମିଳିଥାଏ । କିନ୍ତୁ ଏହା ଉଦ୍ଭିଦର ଉପରେ ନୁହେଁ ବରଂ ମୂଳରେ ମିଳିଥାଏ । ଏହି ଗଛର ଚେରକୁ ମାଟି ତଳୁ ବାହର କରିବା ପରେ ଏହାର ରସ ବାହାର କରାଯାଏ । ସେହି ରସକୁ ଅନେକ ପ୍ରକ୍ରିୟାକରଣ ପରେ ଏକ ପାଉଡରରେ ତିଆରି କରାଯାଏ ଏବଂ ସେହି ପାଉଡର ହୋଇଥାଏ ହେଙ୍ଗୁ । ଯାହାକୁ ଆମେମାନେ ଅନେକ ସମୟରେ ରୋଷେଇରେ ବ୍ୟବହାର କରିଥାଉ । ଏହାର ସୁଗନ୍ଧ ହିଁ ଖାଦ୍ୟର ସ୍ୱାଦକୁ ବଢାଇଥାଏ ।
ଭାରତରେ ହେଙ୍ଗୁ ରାଜସ୍ଥାନରେ ଚାଷ କରାଯାଏ । କିନ୍ତୁ ଦେଶରେ ଏହାର ଚାହିଦା ତୁଳନାରେ ଉତ୍ପାଦନ ଏକ ଓଟ ପାଟିରେ ଜିରା ସଦୃଶ । ସେଥିପାଇଁ ହେଙ୍ଗୁର ଆମଦାନୀ ଅନ୍ୟ ଦେଶରୁ ହୋଇଥାଏ । ଆମଦାନୀ ଶୁଳ୍କ ଲାଗୁ ହେତୁ ଏବଂ ଚାହିଦା ତୁଳନାରେ ଯୋଗାଣ ବହୁତ କମ୍ ଥିବାରୁ ଏହାର ମୂଲ୍ୟ ବହୁତ ଅଧିକ ରହିଥାଏ । ବର୍ତ୍ତମାନ ସରକାର ନିଜେ ହେଙ୍ଗୁ ଉତ୍ପାଦନ ବୃଦ୍ଧି କରିବାକୁ ଚେଷ୍ଟା କରୁଛନ୍ତି ।
