କଟକ, ୨୧/୦୭: ଖୁବଶୀଘ୍ର ନିଯୁକ୍ତି ପାଇବେ ୧୦ ହଜାରରୁ ଉର୍ଦ୍ଧ୍ୱ ହାଇସ୍କୁଲ ଶିକ୍ଷକ । ଶିକ୍ଷକ ନିଯୁକ୍ତି ନେଇ ଯେଉଁ ଆଇନ୍ ଗତ ପ୍ରତିବନ୍ଧକ ଥିଲା, ତାହା ହଟିଛି । ନିଯୁକ୍ତି ସମ୍ପର୍କିତ ବିଜ୍ଞପ୍ତିକୁ ଚ୍ୟାଲେଞ୍ଜ କରି ଦାୟର ହୋଇଥିବା ଏକାଧିକ ମାମଲାକୁ ଖାରଜ କରିଛନ୍ତି ହାଇକୋର୍ଟ । ଶିକ୍ଷକ ନିଯୁକ୍ତି ପ୍ରକ୍ରିୟାରେ କୌଣସି ଅନିୟମିତତା ହୋଇନଥିବା ହାଇକୋର୍ଟ ତାଙ୍କ ରାୟରେ ଦର୍ଶାଇଛନ୍ତି । ଗତବର୍ଷ ଡ଼ିସେମ୍ବର ମାସରେ ଠିକା ଭିତ୍ତିକ ଶିକ୍ଷକ ନିଯୁକ୍ତି ପାଇଁ ସ୍କୁଲ୍ ଓ ଗଣଶିକ୍ଷା ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା । କିନ୍ତୁ ସ୍ଥାନ ସଂରକ୍ଷଣକୁ ନେଇ ତ୍ରୁଟି ରହିଥିବାର ଅଭିଯୋଗ ହୋଇଥିଲା ଏବଂ ନିଯୁକ୍ତି ପ୍ରକ୍ରିୟାରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ଆଣି ହାଇକୋର୍ଟରେ ଏକାଧିକ ମାମଲା ଦାୟର ହୋଇଥିଲା ।
ଯାହା ଉପରେ ଶୁଣାଣୀ କରି ଗତ ମେ ମାସରେ ଶିକ୍ଷକ ନିଯୁକ୍ତି ଉପରେ ରହିତାଦେଶ ଜାରି କରିଥିଲେ ହାଇକୋର୍ଟ । ତେବେ ସମସ୍ତ ପକ୍ଷଙ୍କୁ ଶୁଣିବା ପରେ କୋର୍ଟ ନିଜ ରାୟରେ ଏହା ଉଲ୍ଲେଖ କହିଛନ୍ତି ଯେ, ସ୍ଥାନ ସଂରକ୍ଷଣ କିମ୍ବା ନିଯୁକ୍ତି ପ୍ରକ୍ରିୟାରେ କୌଣସି ତ୍ରୁଟି ନାହିଁ । ତେଣୁ ଶିକ୍ଷକ ନିଯୁକ୍ତିକୁ ଚ୍ୟାଲେଞ୍ଜ କରି ଦାୟର ହୋଇଥିବା ସମସ୍ତ ଆବେଦନକୁ ଖାରଜ କରାଯାଉଛି ।
