କଟକ: ପୁଣି ଥରେ ୨୦୧୧ ବିଶ୍ୱ କପ ଫାଇନାଲର ସ୍ମୃତିକୁ ତାଜା କରି ଦେଇଛି କଟକର ବାରବାଟୀ ଷ୍ଟାଡିୟମ । ରବିବାର ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିବା ଦ୍ୱିତୀୟ ଟି-୨୦ ମ୍ୟାଚ୍ ବେଳେ କିଛି ସମୟ ଦୃଶ୍ୟ ଏମିତି ଥିଲା ଯାହା ଦେଖିଲେ ଏବଂ ଶୁଣିଲେ ଆପଣଙ୍କ ଲୋମ ଟାଙ୍କୁରି ଉଠିବ। ଯେତେବେଳେ ଦର୍ଶକ ‘ବନ୍ଦେ ମାତରମ’ ଗାନ କଲେ ପୂରା ଷ୍ଟାଡିୟମ ପ୍ରକମ୍ଫିତ ହୋଇ ଉଠିଥିଲା । ସେ ସମୟର ଦୃଶ୍ୟ ବେଶ ଉପଭୋଗ୍ୟ ଏବଂ ଆକର୍ଷଣୀୟ ରହିଥିଲା । ହଜାର ହଜାର ଦର୍ଶକ ଏକ ସଙ୍ଗେ ଏଆର ରେହମାନଙ୍କ ସଂଯୋଜିତ ପ୍ରସିଦ୍ଧ ଗୀତ ‘ବନ୍ଦେ ମାତରମ’ ଗାନ କରି ଖେଳର ପରିବେଶକୁ ଆହୁରି ରୋମାଞ୍ଚତି କରିଥିଲେ । ଏହାର ଭିଡିଓ ସାମାଜିକ ଗଣମାଧ୍ୟମରେ ଖୁବ୍ ଭାଇରାଲ୍ ହୋଇଛି ।
ପୁଣି ଥରେ ୨୦୧୧ ବିଶ୍ୱ କପ୍ ଫାଇନାଲର ସେହି ସମୟ ମନରେ ସତେଜ ହୋଇ ଉଠିଲା ଯେତେବେଳେ ଭାରତ ବିଜୟ ଆଡକୁ ଅଗ୍ରସର ହେଉଥିଲା, ଆଉ ସେହି ସମୟରେ ଦର୍ଶକଙ୍କ ‘ବନ୍ଦେ ମାତରମ’ ଗୀତରେ ୱାଙ୍ଖେଡା ଷ୍ଟାଡିୟମ ଗୁଞ୍ଜରିତ ହୋଇ ଉଠିଥିଲା । ସେହି ସମୟକୁ ମନେ ପକାଇଲେ ଆଜି ମଧ୍ୟ ଭାରତୀୟ ଖେଳାଳିଙ୍କ ଲୋମ ଟାଙ୍କୁରି ଉଠେ । ଏହି ଦୃଶ୍ୟ ପୁଣି ଥରେ ଗତକାଲି ବାରବାଟୀ ଷ୍ଟାଡିୟମରେ ଦେଖିବାକୁ ମିଳିଛି । ରବିବାର ରାତି କଟକର ଏହି ଐତିହାସିକ ଷ୍ଟାଡିୟମ ‘ବନ୍ଦେ ମାତରମ’ରେ ଝୁମି ଉଠିଛି । ଭାରତ ବ୍ୟାଟିଂ ଆରମ୍ଭ କରିବାର କିଛି ସମୟ ପରେ ଏହି ଦୃଶ୍ୟ ଦେଖିବାକୁ ମିଳିଥିଲା ।
wp:html/wp:html'Vande Maataram' from the Cuttack crowd in the 2nd T20i between India and South Africa. pic.twitter.com/yr4HoQWdOI
— Mufaddal Vohra (@mufaddal_vohra) June 12, 2022
ତେବେ ଦ୍ୱିତୀୟ ଟି-୨୦ରେ ଭାରତ ଭ୍ରମଣକାରୀ ଦକ୍ଷିଣ ଆଫ୍ରିକାଠୁ ୪ ୱିକେଟରେ ପରାଜିତ ହୋଇଛି । ଏହି ବିଜୟ ସହ ଦକ୍ଷିଣ ଆଫ୍ରିକା ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜରେ ୨-୦ରେ ଅଗ୍ରଣୀ ହାସଲ କରିଛି । ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତ ୬ ୱିକେଟ୍ ହରାଇ ୧୪୮ ରନ କରିଥିଲା । ଦଳ ପକ୍ଷରୁ ଶ୍ରେୟସ ଆୟର ୪୦ ରନ ଏବଂ ଇଶାନ କିଷନ ୩୪ ରନ କରିଥିବା ବେଳେ ଦିନେଶ କାର୍ତ୍ତିକଙ୍କ ୩୦ ରନ ବଳରେ ଭାରତ ନିଜର ସମ୍ମାନ ରକ୍ଷା କରିପାରିଥିଲା । ଜବାବରେ ହେନରିକ କ୍ଲାସେନଙ୍କ ବିସ୍ଫୋରକ ୮୧ ରନ ଇନିଂସ ବଳରେ ଦକ୍ଷିଣ ଆଫ୍ରିକା ଭାରତକୁ ୪ ୱିକେଟରେ ହରାଇବାରେ ସଫଳ ହୋଇଛି ।
