ଭୁବନେଶ୍ବର ୧୬।୩: ଡ୍ରାଇଭର ଆନ୍ଦୋଳନକୁ ନେଇ ଗୃହରେ ହଟ୍ଟଗୋଳ । କଂଗ୍ରେସ ଓ ବିଜେପି ବିଧାୟକଙ୍କ ହଙ୍ଗାମା । ଗୃହ ମଧ୍ୟଭାଗକୁ ଆସି ହଟ୍ଟଗୋଳ କଲେ ବିରୋଧୀ ।

ଶୂନ୍ୟକାଳରେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଡ୍ରାଇଭର ଆନ୍ଦୋଳନ ପ୍ରସଙ୍ଗ ଉଠାଇ କହିଥିଲେ, ସରକାର ସେମାନଙ୍କୁ ସାହାଯ୍ୟ କରିବା ପରିବର୍ତ୍ତେ ଆଉ ଗୋଟିଏ ଗ୍ରୁପକୁ ଉସୁକାଇ ଆନ୍ଦୋଳନକୁ ଭଣ୍ଡୁର କରିବାକୁ ଚାହୁଁଛନ୍ତି । ପରିବହନ ସେବା ଠପ୍ ହୋଇପଡିଛି । ଗୃହରେ ଆଲୋଚନା ହେଲା ବେଳେ ଅଫିସର ରହୁନାହାନ୍ତି । ଆମେ ବାଧ୍ୟ ହୋଇ ଗୃହ ମଧ୍ୟଭାଗକୁ ଯାଉଛୁ । ବିଜେପି ବିଧାୟକମାନେ ମଧ୍ୟ ଗୃହ ମଧ୍ୟଭାଗକୁ ଆସି ହଟ୍ଟଗୋଳ କରିଥିଲେ ।

ଡ୍ରାଇଭରମାନେ ନିଜର ହକ୍ ପାଇଁ ଦିନ ରାତି ଏକ କରି ବୁଧବାରଠାରୁ ରାଜରାସ୍ତାକୁ ଆସିଛନ୍ତି । ସରକାର କିନ୍ତୁ ଚୁପ୍ । ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଗୃହରେ ଉଦବେଗ ରହିବ । ଆଉ କାଳ ବିଳମ୍ବ ନକରି ବିଭାଗୀୟ ମନ୍ତ୍ରୀ ଗୃହରେ ଉତ୍ତର ରଖିବା ସହ ତାଙ୍କ ସମସ୍ୟାର ସମାଧାନ କରନ୍ତୁ ବୋଲି ବିରୋଧୀ ଦଳ ନେତା ଜୟନାରାୟଣ ମିଶ୍ର ଦାବି କରିଛନ୍ତି । ପରେ ଗୃହ ସୁପରିଚାଳନା ଲାଗି ବାଚସ୍ପତି ସର୍ବଦଳୀୟ ବୈଠକ ଡାକିଥିଲେ ।