ଭୁବନେଶ୍ବର, ୦୮/୦୨: ବଢ଼ିଚାଲିଛି ସାଇବର ଲୁଟେରାଙ୍କ ଆତଙ୍କ। ବିଭିନ୍ନ ଆଳ ଦେଖାଇ ତ’ ପୁଣି କେତେବେଳେ ଅନ୍ୟ କୌଣସି ବାହାନା କରି ଲୁଟୁଛନ୍ତି ଲୋକଙ୍କ କଷ୍ଟ ଅର୍ଜିତ ଧନ। ଆଉ ଏହି ସାଇବର ଲୁଟେରାଙ୍କ ଜାଲରେ ପଡ଼ୁଛନ୍ତି ଲୋକେ। ଆଉ ଏବେ ପୁଣି ଏହି ସାଇବର ଲୁଟେରାଙ୍କ ଆତଙ୍କ ବଢ଼ିଛି ରାଜଧାନୀ ଭୁବନେଶ୍ବରରେ। ଏଥର ନୂଆ ଉପାୟରେ ଲୁଟିଛନ୍ତି ଲୁଟେରା। ରାଜଧାନୀରେ ଚାକିରୀ ନାଁରେ ମହିଳାଙ୍କଠାରୁ ଲକ୍ଷାଧିକ ଠକିଛନ୍ତି ଏହି ସାଇବର ଲୁଟେରା। ଅନଲାଇନରେ ଚାକରୀ ଖୋଜି ମହିଳା ହୋଇଛନ୍ତି ଠକେଇର ଶିକାର।
ସୂଚନା ଅନୁଯାୟୀ, ଜଣେ ମହିଳା ଚାକିରୀ ସନ୍ଧାନରେ Naukri.com ୱେବସାଇଟକୁ ସର୍ଚ୍ଚ କରିଥିଲେ । କିନ୍ତୁ ପ୍ରକୃତ ବଦଳରେ ନକଲି ୱେବ୍ସାଇଟ୍ ଓ ଯୋଗାଯୋଗ ନମ୍ବର ଗୁଗଲରୁ ପାଇଥିଲେ । ସେହି ନମ୍ବରରେ WhatsApp କରିବା ପରେ ତାଙ୍କୁ ଏକ ନିର୍ଦ୍ଧିଷ୍ଟ ସପିଂ ସାଇଟର ପ୍ରଡକ୍ଟ କିଣି ପରେ ତାକୁ ଅନଲାଇନରେ ବିକ୍ରି କରିବାକୁ ତାଙ୍କୁ କୁହାଯାଇଥିଲା। ଆଉ ପ୍ରଡକ୍ଟ ବିକ୍ରି ହେଲେ ତାଙ୍କୁ କମିଶନ ମିଳିବ ବୋଲି କୁହାଯାଇଥିଲା। ଲାଭ ପାଇବା ପୂର୍ବରୁ ମହିଳା ଜଣଙ୍କ ଠକେଇ ସଂସ୍ଥାରେ ୧୨ ଲକ୍ଷ ବିନିଯୋଗ କରିସାରିଥିଲେ । ଲାଭ ଟଙ୍କା ପାଇବା ପାଇଁ ଡକ୍ୟୁମେଣ୍ଟ ଭେରିଫିକେସନ ଓ ଜିଏସଟି ଫି ନାମରେ ଆଉ ୧୩ ଲକ୍ଷ, ସମୁଦାୟ ୨୫ ଲକ୍ଷ ଟଙ୍କା ଠକି ନେଇଥିଲେ ସାଇବର ଠକ।
ତେବେ ଲୁଟର ଶିକାର ହୋଇଥିବା ଜାଣିବା ପରେ ଏ ନେଇ ସାଇବର ଥାନାର ଦ୍ୱାରସ୍ଥ ହୋଇଥିଲେ ମହିଳା ଜଣଙ୍କ । ଅଭିଯୋଗ ପାଇବା ମାତ୍ରେ ଆକ୍ସନ ମୋଡ଼କୁ ଆସିଥିଲା ସାଇବର ପୋଲିସ। ଘଟଣାରେ ପଶ୍ଚିମ ବଙ୍ଗରେରେ କ୍ୟାମ୍ପ ପକାଇବା ସହ ଦୁଇ ଅଭିଯୁକ୍ତ ସୌକତ ପଲ ଓ ଆନନ୍ଦ ରୋହିତ ଦାସଙ୍କୁ ବାନ୍ଧିଛି ପୋଲିସ। ୪ ଲକ୍ଷ ଟଙ୍କା ଥିବା ଗୋଟିଏ ଆକାଉଣ୍ଟକୁ ଫ୍ରିଜ୍ କରିବା ସହ ମିଛ ୱେବ୍ସାଇଟ୍ ତିଆରିରେ ବ୍ୟବହୃତ ଇଲେକ୍ଟ୍ରୋନିକ ସାମଗ୍ରୀ ଜବତ କରାଯାଇଛି । କେବଳ ଓଡିଶା ନୁହେଁ, ଅନ୍ୟ ରାଜ୍ୟ ମାନଙ୍କରେ ମଧ୍ୟ ଏମାନଙ୍କ ନେଟୱର୍କ ସମ୍ପର୍କରେ ଅଧିକ ଖୋଳତାଡ଼ ପାଇଁ ଦୁଇ ଅଭିଯୁକ୍ତ ଙ୍କୁ ଖୁବଶୀଘ୍ର ରିମାଣ୍ଡରେ ନେବ ପୋଲିସ ।
wp:embed {"url":"https://youtu.be/2EPEHQObgj8","type":"video","providerNameSlug":"youtube","responsive":true,"className":"wp-embed-aspect-16-9 wp-has-aspect-ratio"}
