ମୁମ୍ବାଇ ୨୩/୦୫: ମହାରାଷ୍ଟ୍ର ଥାନେରେ ଅଘଟଣ । କେମିକାଲ ଫ୍ୟାକ୍ଟ୍ରିରେ ବିସ୍ଫୋରଣ ପରେ ନିଆଁ ଲାଗି ୫ ଜୀବନ୍ତ ଦଗ୍ଧ, ୨୫ରୁ ଅଧିକ ଗୁରୁତର । ଆହୁରି ଅନେକ ଲୋକ ଫସିରହିଥିବାରୁ ମୃତାହତଙ୍କ ସଂଖ୍ୟା ବଢିବା ଆଶଙ୍କା କରାଯାଉଛି । ଅପରାହ୍ନ ପ୍ରାୟ ଗୋଟାଏ ସମୟରେ ଫ୍ୟାକ୍ଟ୍ରିର ଏକ ବଏଲରରେ ବିସ୍ଫୋରଣ ପରେ ନିଆଁ ଲାଗିଯାଇଥିଲା ।
ପାର୍କିଂରେ ଥିବା ଗାଡିଗୁଡିକ ଜଳିବାକୁ ଲାଗିଥିଲା । ଏଥିସହିତ ଆଖପାଖର ୩ଟି କୋଠାକୁ ନିଆଁ ବ୍ୟାପୀ ଯାଇଥିଲା । ସେଥିରୁ ଗୋଟିଏ କୋଠା କାର ସୋ’ ରୁମର ଥିବାରୁ ପ୍ରାୟ ୧୨ଟି ଗାଡି ପୋଡିଯାଇଛି । ବିସ୍ଫୋରଣର ତୀବ୍ରତା ଏତେ ଥିଲା ଯେ ଆଖପାଖ ଅଞ୍ଚଳର ଥିବା କିଛି ଘରର କାଚ ଭାଙ୍ଗିଯାଇଛି ।
ଖବର ପାଇ ଘଟଣାସ୍ଥଳରେ ପହଞ୍ଚିଥିଲା ଅଗ୍ନିଶମ ବିଭାଗ । ୧୫ଟି ଦମକଳ ଗାଡି ନିଆଁ ଲିଭା କାର୍ଯ୍ୟରେ ନିୟୋଜିତ ହୋଇଥିଲେ । ପ୍ରାୟ ୩ ଘଣ୍ଟାର ପରିଶ୍ରମ ପରେ ନିଆଁ ଆୟତ୍ତ ହୋଇଥିଲା । ଦୁର୍ଘଟଣା ପାଇଁ ୮ ଜଣକୁ ସସ୍ପେଣ୍ଡ କରାଯାଇଛି ।