ଝାରସୁଗୁଡ଼ା,୧୩/୧୨: ଝାରସୁଗୁଡା ଜିଲ୍ଲାରେ ଆଇନ୍ ବିଶୃଙ୍ଖଳା ପରିସ୍ଥିତି ସୃଷ୍ଟି କରୁଥିବା ଲୋକଙ୍କୁ ପୋଲିସ କ୍ଷମା ଦେବନି । ଏଭଳି ସ୍ପଷ୍ଟ ବାର୍ତ୍ତା ଦେଇଛନ୍ତି ଏସପି ରାହୁଲ ଜୈନ। ଗତ ୪ ତାରିଖ ବିଳମ୍ବିତ ରାତିରେ ହୋଟେଲ କଳିଙ୍ଗ ବାରରେ ହୋଇଥିବା ଗୁଳିକାଣ୍ଡ ଘଟଣାରେ ବାପ ପୁଅ ସମେତ ୪ ଜଣଙ୍କୁ ଗିରଫ କରାଯାଇଛି । ଏନେଇ ଏକ ସାମ୍ବାଦିକ ସମ୍ମିଳନୀରେ ଏସପି ପୋଲିସର କାର୍ଯ୍ୟାନୁଷ୍ଠାନ ସମ୍ପର୍କରେ ସଚେତନ କରାଇ ଦେଇଛନ୍ତି ।
ଝାରସୁଗୁଡା ପୋଲିସ ୪ ତାରିଖ ଗୁଳିକାଣ୍ଡ ଘଟଣାରେ ମୁଖ୍ୟ ଅଭିଯୁକ୍ତ ଦୀପକ ସାହୁ ଓ ତାଙ୍କ ପୁଅ ଅର୍ଜୁନ ସାହୁ ସମେତ ଗୁଡୁ ଖାନ ଓ ମୁନକୁ ପାଣ୍ଡେକୁ ଗିରଫ କରିଛି । ସେମାନଙ୍କ ନିକଟରୁ ଦୁଇଟି ଦେଶୀ ବନ୍ଧୁକ ସହ ୪ଟି ଜୀବନ୍ତ ଗୁଳି, ୫ଟି ଫୁଟିଥିବା ଗୁଳିର ଖୋକା, ଗୋଟିଏ ସ୍କରପିଓ କାର ଓ ମୋବାଇଲ ଜବତ କରିଛି । ଏହି ଅପରାଧିମାନେ ଗୁଳିକାଣ୍ଡ ଘଟାଇ ଅନ୍ୟ ରାଜ୍ୟକୁ ଫେରାର ହୋଇଥିଲା ବେଳେ ପୋଲିସ ସେମାନଙ୍କୁ ସାଇବର ପୋଲିସ ସହାୟତାରେ ଗିରଫ କରି କୋର୍ଟ ଚାଲାଣ କରିଛି।
