ନୂଆଦିଲ୍ଲୀ 10/08 : ଦ୍ୱାଦଶ ଶତାବ୍ଦୀରେ ତାମିଲନାଡୁରୁ ଏକ ଦୁର୍ଲଭ ଦେବୀମୂର୍ତ୍ତି ଚୋରି ହୋଇଥିଲା । ପ୍ରାୟ ୫୧ ବର୍ଷ ପରେ ଏବେ ଏହା ଆମେରିକାର ନ୍ୟୁୟର୍କ ସହରରେ ଠାବ ହୋଇଛି । ଦ୍ୱାଦଶ ଶତାବ୍ଦୀର ଏହି ମୂର୍ତ୍ତି ମାଆ ପାର୍ବତୀଙ୍କର । ୧୯୭୧ରେ ଚୋରି ହୋଇଥିବା ଏହି ମୂର୍ତ୍ତି ବୋନହାମ୍ସ ଅକ୍ସନ୍ ହାଉସ୍ରେ ଚିହ୍ନଟ କରାଯାଇଛି । ବୋନହାମ୍ସ ହେଉଛି ଏକ ଅନ୍ତର୍ଜାତୀୟ ନିଲାମ ପରିଚାଳନାକାରୀ ଘରୋଇ ସଂସ୍ଥା, ଯାହାର ମୁଖ୍ୟକାର୍ଯ୍ୟାଳୟ ଲଣ୍ଡନରେ ରହିଛି । ଜଣେ ବରିଷ୍ଠ ପୁଲିସ ଅଧିକାରୀଙ୍କ ମୁତାବକ, ଏହି ମୂର୍ତ୍ତି ୧୯୭୧ରେ ନନ୍ଦନପୁରେଶ୍ୱରର ଶିବ ମନ୍ଦିରରୁ ଚୋରି ହୋଇଥିଲା । ସେତେବେଳେ ବହୁ ଖୋଜାଖୋଜି ପରେ ବି ସନ୍ଧାନ ମିଳି ନଥିଲା । ବର୍ତ୍ତମାନ ଏହାକୁ ନ୍ୟୁୟର୍କରେ ଠାବ କରାଯିବା ପରେ ଏଥିସଂକ୍ରାନ୍ତ ଦସ୍ତାବିଜ ପ୍ରସ୍ତୁତ କରାଯାଉଛି । ମୂର୍ତ୍ତିକୁ ଖୁବଶୀଘ୍ର ଭାରତ ଫେରାଇ ଅଣାଯିବ । ଉଲ୍ଲେଖଯୋଗ୍ୟ, କିଛି ବର୍ଷ ହେଲା ଭାରତ ଏହାର ପୁରୁଣା ତଥା ଦୁର୍ଲଭ ମୂର୍ତ୍ତି ଓ କଳାକୃତି ଉଦ୍ଧାର ପାଇଁ ଉଦ୍ୟମ ଆରମ୍ଭ କରିଛି । ମନ୍ଦିରଗୁଡ଼ିକରୁ ଚୋରିଯାଇଥିବା କଳାକୃତିକୁ ଫେରି ପାଇବା ପାଇଁ ଚେଷ୍ଟା କରାଯାଉଛି ।
୨୦୧୪ ପରଠାରୁ ଭାରତକୁ ସଫଳତାପୂର୍ବକ ୨୦୦ରୁ ଅଧିକ ମୂଲ୍ୟବାନ ମୂର୍ତ୍ତି ଫେରାଇ ଅଣାଯାଇଥିବା ଚଳିତବର୍ଷ ଫେବ୍ରୁଆରୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ । ୨୦୨୦ରେ ବ୍ରିଟେନ୍ ୩ଟି କାଂସ୍ୟ ମୂର୍ତ୍ତି ଭାରତ ସରକାରଙ୍କୁ ଫେରାଇଥିଲା। ଯାହାକୁ ୪୦ ବର୍ଷ ପୂର୍ବେ ତାମିଲନାଡୁର ଏକ ମନ୍ଦିରରୁ ଚୋରାଇ ନିଆଯାଇଥିଲା । ଗତ କିଛି ବର୍ଷ ମଧ୍ୟରେ ଭାରତ ଫେରିଥିବା ମୂର୍ତ୍ତି ମଧ୍ୟରେ ଥିଲା ଏକ କାଂସ୍ୟ ନଟରାଜ ମୂର୍ତ୍ତି, ଯେଉଁଥିରେ ହିନ୍ଦୁ ଦେବତା ଶିବ ନୃତ୍ୟଶୈଳୀରେ ଥିଲେ । ୯୦୦ ବର୍ଷ ପୁରୁଣା ଏହି ମୂର୍ତ୍ତିକୁ ୨୦୦୮ରେ ନ୍ୟାସନାଲ ଗ୍ୟାଲେରି ଅଫ୍ ଅଷ୍ଟ୍ରେଲିଆ କିଣିଥିଲା । ତାମିଲନାଡୁରେ ୧୯୭୧ରେ ନଦନାପୁରେଶ୍ୱର ଶିବନ୍ ମନ୍ଦିରରୁ ୫ଟି ମୂର୍ତ୍ତି ଚୋରି ହୋଇଥିଲା । ଏଥିରେ ପାର୍ବତୀଙ୍କ ମୂର୍ତ୍ତି ଥିଲା । ୨୦୧୯ରେ ମନ୍ଦିରର ଜଣେ ଟ୍ରଷ୍ଟି ଅଭିଯୋଗ କରିବା ପରେ ତଦନ୍ତ ଆରମ୍ଭ ହୋଇଥିଲା। ଆଉ ସଫଳତା ବି ମିଳିଲା। ତେବେ ସେହି ମୂର୍ତ୍ତିର ଉଚ୍ଚତା ୫୨ ସେଣ୍ଟିମିଟର ଏବଂ ଏହାର ମୂଲ୍ୟ ୨,୧୨,୫୭୫ ଡଲାର ବୋଲି ପୁଲିସ ଆଇଡଲ ୱିଙ୍ଗ୍ କହିଛନ୍ତି ।
ସେ ଆହୁରି କହିଛନ୍ତି ଯେ, ଏହି ପ୍ରତିମୂର୍ତ୍ତିର ମାଲିକାନା ଦାବି କରିବାକୁ ଆମର ଅଧିକାର ରହିଛି। କାହିଁକିନା ୟୁନେସ୍କୋର ବିଶ୍ୱ ଐତିହ୍ୟ ସମ୍ମିଳନୀର 1972ରୁ ଭାରତ ବି ଏହାର ଏକ ଅଂଶ।