ଘଟଗାଁ ୨୪/୧୦: କେନ୍ଦୁଝର ଜିଲ୍ଲା ହରିଚନ୍ଦନପୁର୍ ବ୍ଲକ୍ ପିଟାପିଟି ଗାଁରେ ଅଘଟଣ । ମଞ୍ଚାରୁ ପଡି ଚାଲିଗଲା ମହିଳାଙ୍କ ଜୀବନ । ଗାଁର ଜୟନ୍ତି କିସାନ ମଞ୍ଚାରୁ ପଡି ପ୍ରାଣ ହରାଇଛନ୍ତି ।
ମିଳିଥିବା ସୁଚନା ଅନୁସାରେ, ବିଗତ କିଛିଦିନ ହେବ ପିଟାପିଟି ଅଞ୍ଚଳରେ ଜଙ୍ଗଲି ଜନ୍ତୁ ଉପଦ୍ରବ ବଢିବାରେ ଲାଗିଛି । ଜଙ୍ଗଲି ଜନ୍ତୁମାନେ ଧାନଫସଲ ନଷ୍ଟ କରୁଥିବାରୁ ପିଟାପିଟି ଗାଁ ଲୋକେ ଧାନଫସଲକୁ ଜଗିବା ପାଇଁ ଜମି ପାଖରେ ମଞ୍ଚା ନିର୍ମାଣ କରି ଫସଲ ଜଗିଥାନ୍ତି । ଶନିବାର ମଧ୍ୟ ଜୟନ୍ତି ରାତିରେ ଧାନଫସଲ ଜଗିବା ପାଇଁ ମଞ୍ଚା ପାଖକୁ ଯାଇଥିଲେ । ମଞ୍ଚାକୁ ଚଢୁ ଚଢୁ ଦୁର୍ଭାଗ୍ୟବଶତଃ ସେ ଖସି ପଡିଥିଲେ ।
ଅନ୍ୟମାନେ ତାଙ୍କୁ ପଡିଯିବାର ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବିଭାଗ ଘଟଣାସ୍ଥଳରେ ପହଁଚି ଗୁରୁତୁର ଅବସ୍ଥାରେ ହରିଚନ୍ଦନପୁର୍ ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରକୁ ଆଣୁଥିବା ସମୟରେ ଅଧାବାଟରେ ତାଙ୍କର ମୃତ୍ୟୁ ଘଟିଥିଲା । ତେବେ ରବିବାର ସକାଳୁ ହରିଚନ୍ଦନପୁର ପୋଲିସ ଘଟଣାସ୍ଥଳରେ ପହଁଚି ମୃତଦେହଟିକୁ ଜବଦ କରିବା ସହିତ ବ୍ୟବଚ୍ଛେଦ ପାଇଁ ପଠାଇଛି । ଅନ୍ୟପକ୍ଷରେ ତଦନ୍ତ ମଧ୍ୟ ଚଳାଇଛି ।