ଲମତାପୁଟ,୧୯/୦୬: ଗଞ୍ଜେଇ ଚୋରା ଚାଲାଣ ବେଳେ ମାଡି ବସିଲା ମାଛକୁଣ୍ଡ ପୋଲିସ । ଆନ୍ଧ୍ର ସୀମାନ୍ତ ଜଲାପୁଟ, ଅଞ୍ଚଳରୁ ଚୋରା ଚାଲଣ ବେଳେ ମାଛକୁଣ୍ଡ ପୋଲିସ ବିପୁଳ ପରିମାଣରେ ଗଞ୍ଜେଇ ଜବତ କରିଛି ।
ବିଶେଷ ସୂତ୍ରରୁ ଖବର ପାଇ କୋରାପୁଟ ଏସପିଙ୍କ ନିର୍ଦେଶ କ୍ରମେ ନନ୍ଦପୁର ଏସ. ଡ଼ି. ପିଓ.ଙ୍କ ନେତୃତ୍ଵରେ ମାଛକୁଣ୍ଡ ପୋଲିସ ସାନଶଗର ଗ୍ରାମ ନିକଟରେ ନାକାବନ୍ଦୀ କରିଥିଲା । ଜଲାପୁଟ ଅଞ୍ଚଳରୁ ଦ୍ରୁତ ଗତିରେ ଆସୁଥିବା ପିକଅପ୍ ଭ୍ୟାନକୁ ଅଟକାଇ ଥିଲା ପୋଲିସ । ଗାଡି ଚାଳକକୁ କାବୁ କରିବା ପରେ ଭ୍ୟାନକୁ ଯାଞ୍ଚ କରିବାରୁ ଭ୍ୟାନ ଡାଲାରେ ୧୫ଟି ବସ୍ତାରେ ପ୍ରାୟ ଅଢେଇ କୁଇଣ୍ଟାଲ ଗଞ୍ଜେଇ ଥିବା ଜଣାପଡିଥିଲା । ଏହାର ମୂଲ୍ୟ ପ୍ରାୟ ୨୫ ଲକ୍ଷ ଟଙ୍କା ହେବ ବୋଲି ସୂଚନା ମିଳିଛି ।
ଗିରଫ ଯୁବକ ଜଣଙ୍କ ହେଲେ ଜଲାପୁଟ ଗ୍ରାମର ଦେବାଶୀଷ ଆଚାର୍ଯ୍ୟ । ତାଙ୍କୁ ପଚରା ଉଚରା ପରେ ଜଣା ପଡିଥିଲା ଯେ, ସମ୍ପୃକ୍ତ ଯୁବକ ଏହି ଗଞ୍ଜେଇ ଆନ୍ଧ୍ରପ୍ରଦେଶର ମୁଚିମପୁଟରୁ ସିମିଳିଗୁଡା ନେଇ ଯାଇଥାନ୍ତେ । ସେଠାରୁ ବିହାରରୁ ଆସିଥିବା ଗଞ୍ଜେଇ ମାଫିଆଙ୍କୁ ଏହା ଦେବାର ଯୋଜନା ଥିଲା । ଯୁବକ ଜାଲ୍ ଗାଡି ନମ୍ବର ବ୍ୟଭହାର କରିବା ସହ ପିକଅପ୍ ଭ୍ୟାନର ଇଞ୍ଜିନ ନମ୍ବର ଏବଂ ଚେସିସ ନମ୍ବର ଲିଭାଇ ବେଧଡକ ଗଞ୍ଜେଇ ଚୋରା ଚାଳଣ କରୁଥିବା ପୋଲିସ କହିଛି । ଏହି ଘଟଣାର ତଦନ୍ତ ପୋଲିସ ଜାରି ରଖିଛି ।
ସୂଚନାଯୋଗ୍ୟ, ଚଳିତ ବର୍ଷ ମାଛକୁଣ୍ଡ ପୋଲିସ ଆଜି ପର୍ଯ୍ୟନ୍ତ ଗଞ୍ଜେଇ ଚୋରାଚାଳାଣ ବେଳେ ୨୧ ଥର ଧରିଥିବା ବେଳେ ୩୨ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି । ସମୁଦାୟ ୫ ଟନ୍ ୩୦୭ କେଜି ଗଞ୍ଜେଇ ଜବତ ହେବା ସହ ୧୭ ଟି ଗାଡି ଜବତ ମଧ୍ୟ କରାଯାଇଛି ।
