ଭଦ୍ରକ ୨୭।୦୮: ଲଗାଣ ବର୍ଷାରେ ଭଦ୍ରକ ସ୍ଥିତି ବେହାଲ  । ଲଗାଣ ବର୍ଷାରେ ଜିଲ୍ଲାର ବିଭିନ୍ନ ଅଞ୍ଚଳରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଭଦ୍ରକ ଆଖୁଆପଦା ନିକଟରେ ବୈତରଣୀ ନଦୀ ବିପଦ ସଙ୍କେତ ଟପିଛି । ଆଖୁଆପଦା ଆନିକଟଠାରେ ବିପଦ ସଂକେତ ୧୭.୮୩ ଥିବା ବେଳେ ବର୍ତ୍ତମାନ ଜଳସ୍ଥର ରହିଛି ୧୯ .୫୦ ରହିଛି ।

ସେହିପରି  କଣ୍ଟିଘାଇ , ଵାଲିପୋଖରୀ ଏସ୍‌କେପ୍‌ ଦେଇ ଜନବସତିକୁ ବନ୍ୟା ଜଳ ପ୍ରବାହିତ ହେଉଛି । ଭଣ୍ଡାରିପୋଖରୀ ବ୍ଲକର ରାମଚନ୍ଦ୍ରପୁର , ଭୁତିଆ ଆଦି ଅଞ୍ଚଳରେ ଥିବା ଗାଁ ଗୁଡିକ ଜଳବନ୍ଦୀ ହୋଇରହିଛି । ଭଣ୍ଡାରିପୋଖରୀ ଓ ଯାଜପୁରକୁ ଯୋଗାଯୋଗ ବିଚ୍ଛିନ୍ନ ହୋଇଛି । ମାଳଦା ନିକଟ ସରତା ପୋଲ ଉପରେ ୪ ଫୁଟରୁ ଅଧିକ ବନ୍ୟା ଜଳ ପ୍ରବାହିତ ହେଉଛି । କଣ୍ଟିଘାଇ ନିକଟରେ ୨ ମିଟର ଉଚ୍ଚରେ ବନ୍ୟା ଜଳ ପ୍ରବାହିତ ହେଉଛି । 

ଭଣ୍ଡାରିପୋଖରୀ ବ୍ଲକର ମାଳଦା , ସୋଳମପୁର , ରାହାଣିଆ , ନପଙ୍ଗ , ଵାଲୀପୋଖରୀ , କୁରିଗାଁ , ଝୁରୁଣା , ବନ୍ଧାଳମଢ଼ିଆଳି ପଞ୍ଚାୟତ ଜଳମଗ୍ନ ହୋଇଛି । ଗାଁ ଗୁଡିକ ବାହ୍ୟ ଜଗତରୁ ବିଛିନ୍ନ ହୋଇଛି ।  ଧାମନଗରରୁ ଫଳପୁର ରାସ୍ତାରେ ବନ୍ୟା ଜଳ ପ୍ରବାହିତ ହେଉଛି । ସେହିପରି ଧାମନଗର ବ୍ଲକର ପଧାନୀ , ଦଳାଙ୍ଗ , ସୋହାଡ଼ା ଆଦି ଗାଁରେ ବନ୍ୟା ଜଳ ପ୍ରବେଶ କରିଛି । ଯାହାଫଳରେ ଲୋକ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି ।