ଭୁବନେଶ୍ୱର, ୦୬।୧୨: ରାଜଧାନୀରେ ଜମି ଦେବାକୁ କହି ଠକେଇ । ୨୦୧୦ରୁ ଜମି ଦେବା ନାଁରେ ଟଙ୍କା ନେଇଥିଲେ ମଧ୍ୟ ଦେଉନଥିଲେ ଜମି । ଏପରିକି ଜମି କାଗଜପତ୍ରରେ ଜାଲିଆତି କରିଥିଲେ । ଏହି ଘଟଣାରେ ପୋଲିସ ଜଣେ କଂଗ୍ରେସ ନେତାଙ୍କୁ ଅଟକ ରଖିଛି । ପୋଲିସ ତାଙ୍କୁ ଭୁବନେଶ୍ୱର ମାଷ୍ଟର କ୍ୟାଣ୍ଟିନ ଛକ ନିକଟରୁ ଧରିଛି ।
ସୂଚନାନୁସାରେ, ଜୟକୃଷ୍ଣ ପଟ୍ଟନାୟକ ଓରଫ ଜୟ ପଟ୍ଟନାୟକ ନାମରେ ପୁରୀ ଜିଲ୍ଲାର ଜଣେ କଂଗ୍ରେସ ନେତା ୨୦୧୦ରେ ଶିଳ୍ପପତି ଅମୀୟ ଦାସଙ୍କୁ ଜମି ଦେବେ ବୋଲି କହିଥିଲେ । ଜୟକୃଷ୍ଣ ଓ ତାଙ୍କର ୨ ସହଯୋଗୀ ଅମୀୟ ଦାସଙ୍କଠୁ ୮୨ ଲକ୍ଷ ଟଙ୍କା ନେଇଥିଲେ । ଭୁବନେଶ୍ୱର ପାତ୍ରପଡାରେ ସେମାନେ ଜମି ଦେବାକୁ କହିଥିଲେ । କିନ୍ତୁ ଜମି ଦେବାରେ ଜାଲିଆତି କରିଥିଲେ । ଏନେଇ ପ୍ରଥମେ ଇଓଡବ୍ଲୁରେ ମାମଲା ହୋଇଥିଲା । ୨୦୧୯ରେ ଅମୀୟ ଦାସ ପୋଲିସରେ ଏନେଇ ଅଭିଯୋଗ କରିଥିଲେ । ପୂର୍ବରୁ ଇଓଡବ୍ଲୁରେ ମଧ୍ୟ ମାମଲା ହୋଇଥିଲା । ଜୟକୃଷ୍ଣ କିନ୍ତୁ ପୋଲିସ କିମ୍ବା ଇଓଡବ୍ଲୁକୁ ଧରାଛୁଆଁ ଦେଉନଥିଲେ । ତେବେ ତାଙ୍କର ୨ ସହଯୋଗୀଙ୍କୁ ପୋଲିସ ଧରିବା ପରେ ସେମାନେ ୪୦ ଲକ୍ଷ ଟଙ୍କା ଫେରାଇଥିଲେ । ହେଲେ ଜୟକୃଷ୍ଣ ବାରମ୍ବାର ଖସି ଯାଉଥିଲେ । ଏପରିକି ଓଲଟା ଧମକଚମକ ଦେଉଥିଲେ ।
ରବିବାର ଜୟକୃଷ୍ଣ ଭୁବନେଶ୍ୱରରେ ଜଣେ ଜାତୀୟ ଦଳର କେନ୍ଦ୍ରୀୟ ନେତାଙ୍କୁ ଦେଖା କରିବାକୁ ଆସିବା ବେଳେ ପୋଲିସ ତାଙ୍କୁ ଧରିଥିଲା । ଅଟକ ଥିବା ଜୟକୃଷ୍ଣ ପୁରୀ ବିଧାନସଭା ଆସନରୁ ପ୍ରାର୍ଥୀ ହେବେ ବୋଲି ମଧ୍ୟ ଆଶା ରଖିଥିଲେ। ପୋଲିସ ତାଙ୍କୁ ଅଟକ ରଖି ଅଧିକ ତଦନ୍ତ ଜାରି ରଖିଛି ।