ଭୁବନେଶ୍ବର: ଜାରି ରହିଛି ଗ୍ରୀଷ୍ମପ୍ରବାହ। ତତଲା କଡ଼େଇରେ ଭାଜି ହେଉଛନ୍ତି ରାଜ୍ୟବାସୀ। ଶୁକ୍ରବାର ମଧ୍ୟ ରାଜ୍ୟର ୨୬ ସହରରେ ତାତି ୪୦ ଡିଗ୍ରୀ ଉପରେ । ଆଉ ୪୪.୬ ଡିଗ୍ରୀ ସହ ବୌଦ୍ଧ ସବୁଠୁ ଉତ୍ତପ୍ତ ସହର ହୋଇଛି।
ସୂଚନା ଅନୁଯାୟୀ, ଶୁକ୍ରବାର ବୌଦ୍ଧରେ ୪୪.୬, ଟିଟିଲାଗଡ଼ ୪୪.୦, ନୂଆପଡ଼ା ୪୩.୯, ବଲାଙ୍ଗିର ୪୩.୪, ମାଲକାନଗିରି ୪୩.୩, ପାରଳାଖେମୁଣ୍ଡି ୪୩.୩, ଭବାନୀପାଟଣା ୪୩.୦, ବାରିପଦା ଓ ସମ୍ବଲପୁରରେ ୪୨.୮, ଅନୁଗୁଳ ୪୨.୭, ହୀରାକୁଦ ୪୨.୩, ତାଳଚେର ୪୨.୨, ଝାରସୁଗୁଡ଼ା ଏବଂ ସୋନପୁର ୪୨.୧ ଓ ଭୁବନେଶ୍ବର ୪୧.୬ ଡିଗ୍ରୀ ତାପମାତ୍ରା ରେକର୍ଡ ହୋଇଛି।
ସେପଟେ ପାଣିପାଗ ବିଭାଗର ଅନୁମାନ କରିଛି, ଆସନ୍ତା ୪ରୁ ଉପକୂଳ ଓଡ଼ିଶାରେ ଆଉ ହିଟ୍ୱେଭ ରହିବନି । ତାତିରେ ମଧ୍ୟ ହ୍ରାସ ହେବ। ୬ ତାରିଖରୁ ପୂରା ରାଜ୍ୟରେ ଗ୍ରୀଷ୍ମପ୍ରବାହରେ ବ୍ରେକ୍ ଲାଗିବ । ଆସନ୍ତା ତିନି ଦିନ ଯାଏ ଦିନ ତାପମାତ୍ରାରେ ବିଶେଷ ପରିବର୍ତ୍ତନ ହେବନି । ପରେ ତାତି ୩ରୁ ୪ ଡିଗ୍ରୀ ଖସିଯିବ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ବୈଜ୍ଞାନିକ ଉମାଶଙ୍କର ଦାସ ସୂଚନା ଦେଇଛନ୍ତି ।
୪ରେ ଆଭ୍ୟନ୍ତରୀଣ ଓଡ଼ିଶାର ଅଳ୍ପ କିଛି ସ୍ଥାନରେ କାଳବୈଶାଖୀ ପ୍ରଭାବରେ ବର୍ଷା ହେବ । ରାଜଧାନୀରେ ତାପମାତ୍ରା ୪୦ଡିଗ୍ରୀ ବା ଏହାଠାରୁ ସାମାନ୍ୟ ଅଧିକ ରହିପାରେ । ୬ରେ ବାଲେଶ୍ୱର ଓ ମୟୂରଭଭଞ୍ଜରେ ଘନ ମେଘ ଖଣ୍ଡ ସୃଷ୍ଟି ହେବ । ଉପରବେଳା କାଳବୈଶାଖୀ ବର୍ଷା ହେବ । ପରେ ଖୋର୍ଦ୍ଧା, ପୁରୀ, କଟକ, ନୟାଗଡ଼, ଗଞ୍ଜାମ, ଗଜପତି, ରାୟଗଡ଼ା ଓ ନବରଙ୍ଗପୁରରେ କିଛି ବର୍ଷା ହୋଇପାରେ ।
