ନୀଳଗିରି ୨୦।୯: ତିନି ମାସର ଶିଶୁ କନ୍ୟା ଓ ତାଙ୍କ ବାପାଙ୍କୁ ଅତି ଅମାନୁଷିକ ଭାବେ ହାଣି ପଙ୍ଗୁ କରିଦେଇଥିବା ମାମଲାରେ ଆକ୍ରମଣକାରୀ ଦୋଷୀ ସାବ୍ୟସ୍ତ । ନୀଳଗିରି ସହକାରୀ ଦୈରାଜଜ୍ ମଧୁସ୍ମିତା ଜେନା ବର୍ଷେ ତଳେ ଘଟିଥିବା ଘଟଣାରେ ରାୟ ଶୁଣାଇ ଅଭିଯୁକ୍ତ ଗଣେଶ ନାଇକିକୁ ଦୋଷୀ ଘୋଷଣା କରିବା ସହ ୭ ବର୍ଷ ଜେଲ୍ ଏବଂ ୧୦ ହଜାର ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି ।
ମାମଲାର ସୂଚନା ଅନୁଯାୟୀ ୨୦୨୦ ମସିହା ଅଗଷ୍ଟ ମାସ ୧୧ତାରିଖରେ ନୀଳଗିରି ଅନ୍ତର୍ଗତ ଔପଦା ଥାନା ଅଧିନ ପାଇକପଡା ଗାଁରେ ଏହି ଲୋମହର୍ଷଣକାରୀ ଘଟଣାଟି ଘଟିଥିଲା । ପାଇକପଡା ଗାଁରେ ପଙ୍କଜ ନାଇକି ତାଙ୍କ ୩ ମାସର ଶିଶୁ କନ୍ୟାକୁ କାଖେଇ ଘରେ ଥିବାବେଳେ ସେହି ଗ୍ରାମର ଗଣେଶ ଏକ ଧାରୁଆ ଅସ୍ତ୍ରରେ ଆତର୍କିତ ଭାବେ ଉଭୟଙ୍କୁ ଆକ୍ରମଣ କରିଥିଲା । ଫଳରେ ଶିଶୁ କନ୍ୟାର ଶରୀରରୁ ହାତ ଛିଣ୍ଡି ଯାଇଥିଲା ଏବଂ ତାର ପଙ୍କଜ ନାଇକିଙ୍କ ହାତରେ ଗଭୀର କ୍ଷତ ଲାଗିଥିଲା। ଉଭୟ ବିକଳାଙ୍ଗ ହୋଇଥିବା ସୂଚନା ମିଳିଛି। ପାରିବାରିକ ଶତ୍ରୁତାକୁ ନେଇ ଗଣେଶ ଏଭଳି ଆକ୍ରମଣ କରିଥିଲା ବୋଲି ଜଣାପଡିଥିଲା ।
ଏହି ମାମଲାର ଚୂଡ଼ାନ୍ତ ଶୁଣାଣି କରି ନୀଳଗିରି ସହକାରୀ ଦୈରାଜଜ୍ ମଧୁସ୍ମିତା ଜେନା ଅଭିଯୁକ୍ତ ଗଣେଶ ନାଇକିଙ୍କୁ ୭ ବର୍ଷ ସଶ୍ରମ କାରାଦଣ୍ଡ ଓ ୧୦ ହଜାର ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି । ଜରିମାନା ଅନାଦେୟ ଦୋଷୀକୁ ୩ ମାସ ଅଧିକ ଜେଲ ଦଣ୍ଡ ଭୋଗିବାକୁ ହେବ ବୋଲି ନୀଳଗିରି ସହକାରୀ ଦୌରାଜଜ ନିର୍ଦ୍ଦେଶରେ ଦର୍ଶାଇଛନ୍ତି । ୧୧ ଜଣ ସାକ୍ଷ୍ୟ ଆଧାରରେ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରି ସହକାରୀ ଦୈରା ଜଜ୍ ଦଣ୍ଡିତ କରିଥିବା ସୂଚନା ମିଳିଛି। ଏହି କେଶକୁ ସରକାରୀ ଓକିଲ ଅମରେନ୍ଦ୍ର ପଟ୍ଟନାୟକ ପରିଚାଳନା କରୁଥିଲେ।
