ନୂଆଦିଲ୍ଲୀ: ଟି-୨୦ ବିଶ୍ୱ କପ ୨୦୨୨ର ସୁପର ୧୨ର ଏକ ଗୁରୁତ୍ୱପୂର୍ଣ୍ଣ ମୁକାବିଲାରେ ପାକିସ୍ତାକୁ ଏକ ରନରେ ପରାସ୍ତ କରିଛି ଜିମ୍ୱାୱେ । ପ୍ରଥମେ ବ୍ୟାଟିଂ କରି ଜିମ୍ୱାୱେ ନିର୍ଦ୍ଧାରିତ ୨୦ ଓଭରରେ ୮ ୱିକେଟ୍ ହରାଇ ୧୩୦ ରନ କରିଥିଲେ । ଏହାର ଜବାବରେ ପାକିସ୍ତାନ ଟିମ ୨୦ ଓଭରରେ ୮ ୱିକେଟ ହରାଇ ୧୨୯ ରନ କରିଥିଲା ।
୧୩୧ ରନର ବିଜୟ ଲକ୍ଷ୍ୟକୁ ନେଇ ପଡିଆକୁ ଓହ୍ଲାଇଥିବା ପାକିସ୍ତାନ ଟିମର ବ୍ୟାଟର ସମ୍ପୂର୍ଣ୍ଣ ରୂପେ ନୈରାସ୍ୟଜନକ ପ୍ରଦର୍ଶନ କରିଥିଲେ । ଜିମ୍ୱାୱେ ଠାରୁ ମିଳିଥିବା ଏହି ପରାଜୟ ପାକିସ୍ତାନର ଦୁର୍ବଳ ବ୍ୟାଟିଂକୁ ସାମନାକୁ ଆଣିଛି । ଆଜମ ଏବଂ ରିଜୱାନ ଶୀଘ୍ର ଆଉଟ ହେବା ପରେ ପାକିସ୍ତାନ ଟିମ ନିଜକୁ ସମ୍ଭାଳିପାରି ନଥିଲା । ଏହାପରେ ଗୋଟିଏ ପରେ ଗୋଟିଏ ୱିକେଟ ଯିବା ଆରମ୍ଭ ହୋଇଥିଲା । ଟୁର୍ଣ୍ଣାମେଣ୍ଟରେ ଲଗାତାର ଦ୍ୱିତୀୟ ପରାଜୟ ସହ ପାକିସ୍ତାନର ବିଶ୍ୱ କପରୁ ବାହାର ହେବାର ସମ୍ଭାବନା ଅଧିକ ହୋଇଛି।
ପାକିସ୍ତାନୀ ବୋଲରଙ୍କ ଶାଣିତ ବୋଲିଂରେ ଜିମ୍ୱାୱେ ଟି-୨୦ ବିଶ୍ୱ କପ ମ୍ୟାଚରେ ୮ ୱିକେଟ ହରାଇ ୧୩୦ ରନ କରିବାରେ ସଫଳ ହୋଇଥିଲା । ପାକିସ୍ତାନ ପକ୍ଷରୁ ମହମ୍ମଦ ୱାସୀମ ସବୁଠୁ ସଫଳ ବୋଲର ଭାବେ ଚାରି ଓଭରରେ ୨୪ ରନ ଦେଇ ଚାରୋଟି ୱିକେଟ ନେଇଥିଲେ । ସେହିପରି ଶଦାବ ଖାନ ଚାରି ଓଭରରେ ୨୩ ରନ ଦେଇ ତିନି ଖେଳାଳିଙ୍କୁ ଆଉଟ୍ କରିଥିଲେ । ଜିମ୍ୱାୱେ ପକ୍ଷରୁ ସୀନ ୱିଲିୟମ୍ସ ୩୧ ରନ କରିଥିଲେ । ପାକିସ୍ତାନ ପାଇଁ ଶାନ ମସୁଦ ୩୮ ବଲରେ ୪୪ ରନ କରିଥିଲେ, କିନ୍ତୁ ଅନ୍ୟ କୌଣସି ବ୍ୟାଟର ରନ ଚେଜରେ ତାଙ୍କୁ ସହଯୋଗ କରି ନଥିଲେ।
