ଅହମଦାବାଦ ୨୦/୬ : ଅହମଦାବାଦ ପୋଷ ଅନ୍ତର୍ଗତ ନବରଂଗପୁରା ସିଜି ରୋଡ଼ରେ ଥିବା ଏକ ପିଜି (ଲେଡ଼ିଜ ହଷ୍ଟେଲ)ରେ ରାତିରେ ଏକ ଅଜଣା ଯୁବକ ପଶିଯାଇଥିଲା । ହଷ୍ଟେଲ ଭିତରକୁ ପଶି ହଲରେ ଶୋଇଥିବା ଯୁବତୀଙ୍କ ସହ ଯୁବକ ଅଶ୍ଳୀଳ ବ୍ୟବହାର କରିଥିଲା । ହଲରେ ସିସିଟିଭି କ୍ୟାମେରା ଲାଗିଥିଲା । ଯୁବକର ସମସ୍ତ ଅଶ୍ଳୀଳ ବ୍ୟବହାର କ୍ୟାମେରାରେ କଏଦ ହୋଇଛି ।

ଘଟଣା ଜୁନ ୧୪ତାରିଖ ରାତି ଗୋଟାଏ ବେଳେ ଘଟିଥିଲା । କିନ୍ତୁ ଲୋକଲଜ୍ଜା ଡରରେ ଯୁବତୀମାନେ ପୋଲିସରେ ଅଭିଯୋଗ ନକରି ଚୁପ ରହିଥିଲେ । କିନ୍ତୁ ଘଟଣାର ସିସିଟିଭି ଭାଇରାଲ ହୋଇଯାଇଥିଲା । ଭିଡିଓ ଭାଇରାଲ ହେବାପରେ ଗୁଜରାଟ ମହିଳା ଆୟୋଗ ତଦନ୍ତ ନିର୍ଦେଶ ଦେଇଛନ୍ତି । ଗୁଜରାଟ ମହିଳା ଆୟୋଗ ଅହମଦାବାଦ କମିଶନରଙ୍କୁ ଏହି ମାମଲାର ରିପୋର୍ଟ ମାଗିଛନ୍ତି । ସିସିଟିଭି ଫୁଟେଜ ଭାଇରାଲ ହେବାପରେ ପୋଲିସ ନିଜ ଆଡୁ ଏକ ମାମଲା ରୁଜ୍ଜୁ କରି ତଦନ୍ତ ଆରମ୍ଭ କରିଛି । 

ଘଟଣାପରେ ପିଜିରେ ରହୁଥିବା ଯୁବତୀମାନେ ଭୟଭୀତ ଅଛନ୍ତି । ପିଜିଟି ୪ମହଲା ବିଶିଷ୍ଟ । ତଳ ମହଲାରେ କିଛି ଲୋକ ନିଜ ପରିବାର ସହ ଭଡାରେ ରୁହନ୍ତି । ଉପର ମହଲାରେ ଯୁବତୀମାନେ ରୁହନ୍ତି । ପିଜିରେ ୧୯ଜଣ ଯୁବତୀ ରୁହନ୍ତି ।

ଯେଉଁ ମହିଳା ବାହାରେ ଶୋଇଥିଲେ ସେ କେୟାର ଟେକର । କିନ୍ତୁ ତାଙ୍କ ସ୍ୱାସ୍ଥ୍ୟବସ୍ଥା ଭଲ ନଥିବାରୁ ସେ ଔଷଧ କହି ଶୋଇପଡ଼ିଥିଲେ । ଯେଉଁଥିପାଇଁ ଯୁବକ ପିଜି ଭିତରକୁ ଆସିବା ସେ ଜାଣିପାରିନଥିଲେ । ଆଉ ଜଣେ ଯୁବତୀ ହଠାତ ଉଠି ଦେଖିଲେ ଯୁବକ ହଲ ଭିତରେ ଅଶ୍ଳୀଳ ବ୍ୟବହାର କରୁଛି । କିନ୍ତୁ ଯୁବତୀଙ୍କୁ ଦେଖୁ ଅଭିଯୁକ୍ତ ଯୁବକ ସେଠାରୁ ପଳାଇଥିଲା । 

ପିଜିର ମାଲିକ ସନ୍ନି ସିଂହଙ୍କ କହିବାନୁଯାୟୀ, ସେଠାରେ ଜଣେ ସିକ୍ୟୁରିଟି ଗାର୍ଡ ନିୟୋଜିତ କରାଯାଇଛି > କିନ୍ତୁ ଘଟଣା ଦିନ ସେ ଛୁଟି ନେଇ ନିଜ ଘରକୁ ଯାଇଥିଲେ । କିନ୍ତୁ ୧୪ ତାରିଖ ଘଟିଥିବା ଘଟଣା ପରେ ସେଠାରେ ଦୁଇଜଣ ସିକ୍ୟୁରିଟି ଗାର୍ଡ ନିୟୋଜିତ କରାଯାଇଛି ।

ପୋଲିସ ନିଜ ଆଡୁ ଏକ ମାମଲା ରୁଜ୍ଜୁ କରି ତଦନ୍ତ କରୁଛି । ଉକ୍ତ ୪ ମହଲା ବିଶିଷ୍ଟ କୋଠାକୁ ଦିନକୁ କେତେ ଲୋକ ଯିବା ଆସିବା କରନ୍ତି ସେନେଇ ପୋଲିସ ତଦନ୍ତ କରୁଛି । ପୋଲିସ ଆଖପାଖ ଅଂଚଳର ସିସିଟିଭି ମଧ୍ୟ ଯାଞ୍ଚ କରୁଛି ।