ବ୍ରହ୍ମପୁର ୨୧।୮: ବ୍ରହ୍ମପୁର ଏସପିଙ୍କ କାର୍ଯ୍ୟାଳୟ ସମ୍ମୁଖରେ ଜଣେ ଯୁବକଙ୍କ ଆତ୍ମହତ୍ୟା ଉଦ୍ୟମ । ନିଜ ଉପରେ କିରୋସିନି ଢାଳି ଆତ୍ମହତ୍ୟା ଉଦ୍ୟମ ବେଳେ ସୁରକ୍ଷିତ ଭାବେ ଉଦ୍ଧାର କଲା ପୋଲିସ । ଆତ୍ମହତ୍ୟା ଉଦ୍ୟମ କରୁଥିବା ଯୁବକ ଜଣକ ହେଲେ ଆଙ୍କୁଲି ଅଞ୍ଚଳର ପ୍ରଶାନ୍ତ ସେଠୀ ।

ସୂଚନାଯୋଗ୍ୟ ଯେ, ଗତ ୨୦୨୧ ମସିହାରେ ସଦର ଥାନା ଅନ୍ତର୍ଗତ ଝାଡାଙ୍କୁଲିରେ ତାଙ୍କ ବାପା କୋରା ସେଠୀଙ୍କୁ କିଛି ଦୁବୃର୍ତ୍ତ ହତ୍ୟା କରିଥିଲେ । ଏହି ହତ୍ୟା ଘଟଣାରେ ପୋଲିସ ୫ ଜଣ ଅଭିଯୁକ୍ତଙ୍କୁ ଗିରଫ କରିଥିଲା । ଏହି ମାମଲାର ଚାର୍ଜସିଟ୍ କୋର୍ଟରେ ପୋଲିସ ପକ୍ଷରୁ ଦାଖଲ ହୋଇଥିବା ବେଳେ ମାମଲାର ବିଚାରଣା ଜିଲ୍ଲା କୋର୍ଟରେ ଜାରି ରହିଛି । କୋରା ସେଠୀଙ୍କୁ ହତ୍ୟା ଘଟଣାରେ ଗିରଫ ହୋଇଥିବା ୫ ଜଣଙ୍କ ମଧ୍ୟରୁ ଦୁଇ ଜଣ ହାଇକୋର୍ଟରୁ ବେଲ୍ ପାଇ ଜେଲରୁ ବାହାରି ସାରିଛନ୍ତି । କେବଳ ଏହି ୫ ଜଣ ନୁହେଁ ବରଂ ଆଉ ଦୁଇ ଜଣ ଯୁବକ ମଧ୍ୟ ଏହି ଘଟଣାରେ ସଂଶ୍ଳିଷ୍ଟ ଅଛନ୍ତି । ତେଣୁ ସେମାନଙ୍କୁ ମଧ୍ୟ ଗିରଫ କରାଯାଉ ବୋଲି ପ୍ରଶାନ୍ତ ଦାବି କରି ଆସୁଥିଲେ । ଏନେଇ ତାଙ୍କୁ କାଉନସେଲିଂ ମଧ୍ୟ କରାଯାଉଥିଲା । କିନ୍ତୁ ହଠାତ ଆଜି ଏସପିଙ୍କ କାର୍ଯ୍ୟାଳୟ ନିକଟରେ ଆତ୍ମହତ୍ୟା ଉଦ୍ୟମ କରିଥିବା ବେଳେ ପୋଲିସ କର୍ମଚାରୀ ତାଙ୍କୁ ସୁରକ୍ଷିତ ଉଦ୍ଧାର କରିଛନ୍ତି । ଉଦ୍ଧାର ହେବା ପରେ ବର୍ତ୍ତମାନ ବୈଦ୍ୟନାଥପୁର ଥାନାରେ ପ୍ରଶାନ୍ତଙ୍କୁ ଅଟକ ରଖାଯାଇଛି ‌। ପ୍ରଶାନ୍ତ ନାମରେ ସହରର ବିଭିନ୍ନ ଥାନାରେ ହତ୍ୟା, ଡକାୟତି, ରାହାଜାନୀ ଭଳି ୯ଟି ମାମଲା ରହିଥିବା ବ୍ରହ୍ମପୁର ଏସପି ସୂଚନା ଦେଇଛନ୍ତି । ଆତ୍ମହତ୍ୟା ଉଦ୍ୟମ କରିବା ଭଳି ଘଟଣାରେ ସମ୍ପୃକ୍ତ ଯୁବକଙ୍କ ବିରୁଦ୍ଧରେ ମାମଲା ରୁଜୁ କରିବାକୁ ନିର୍ଦ୍ଦେଶ ଦେଇଥିବା ଏସ.ପି. କହିଛନ୍ତି ।

You Can Read :