ବର୍ଷା ପାଇଁ ଯଜ୍ଞ, ଏକ ପୁରୁଣା କଥା ହୋଇପାରେ ।କିନ୍ତୁ ସରକାରୀ ପଇସାରେ ହେବ ଏପରି ଯଜ୍ଞ । ଗୁଜୁରାଟର ବିଜୟ ରୂପାନୀ ନେତୃତ୍ୱାଧୀନ ବିଜେପି ସରକାର ଭଲ ବର୍ଷା ପାଇଁ ରାଜ୍ୟର ୩୩ ଜିଲ୍ଲାରେ ଯଜ୍ଞ କରିବେ । ପ୍ରଜାୟଁ ଯଜ୍ଞ ନାମରେ ୪୧ ଟି ସ୍ଥାନରେ ଏପରି ହୋମଯଜ୍ଞ କରାଯିବ । ପ୍ରବଳ ଖରା ରେ ଜଳଉତ୍ସ ହ୍ରାସ ପାଉଥିବାରୁ ଇଶ୍ୱରଙ୍କ କୃପା ପାଇଁ ଏପରି କରିବାକୁ ନିଷ୍ପତ୍ତି ନେଇଛନ୍ତି ରୂପାନୀ ସରକାର । ଆସନ୍ତା ୩୧ ତାରିଖରେ ହିଁ ହେବ ଏହି ପ୍ରଜାୟଁ ଯଜ୍ଞ । ୩୩ ଟି ଜିଲ୍ଲା ସହ ୮ଟି ପ୍ରମୂଖ ସହରରେ ଯଜ୍ଞ ହେବ । ରାଜ୍ୟରେ ଭଲ ମୋସୁମୀ ବର୍ଷା ଲାଗି ଆହୂତି ଦିଆଯିବ । ଏହି ଯଜ୍ଞ ପରେ ପ୍ରସାଦ ବଣ୍ଟନ କରାଯିବ । ଏବଂ ସବୁଠୁ ବଡ କଥାଟି ହେଲା ଯଜ୍ଞରେ ମୁଖ୍ୟମନ୍ତ୍ରୀ, ଅନ୍ୟାନ୍ୟ ମନ୍ତ୍ରୀଙ୍କ ସହ ରାଜ୍ୟ ସରକାରଙ୍କ ଅଫିସର ମାନେ ବି ଯୋଗ ଦେବେ । ଗୁଜୁରାଟ ଏବେ ଜଳ ସଂକଟର ସମ୍ମୁଖୀନ ହୋଇଛି । ରାଜ୍ୟର ବିଭିନ୍ନ ସ୍ଥାନରେ ଥିବା ୨୦୪ଟି ବିଭିନ୍ନ ନଦୀବନ୍ଧ ଏବଂ ଜଳ ସଂରକ୍ଷଣ ବନ୍ଧ ଆଦିରେ ୨୯ ପ୍ରତିଶତ ପାଣି ଥିବାରୁ ଆଗକୁ ସଂକଟ ବଢିବା ଆଶା କରାଯାଉଛି । ୨୦୧୯ ଲୋକସଭା ନିର୍ବାଚନରେ କୃଷି ଏବଂ ଜଳସେଚ୍ଚନ ବଡ ପ୍ରସଙ୍ଗ ହେବା ଆଶଙ୍କାରେ ରୂପାନୀ ସରକାର ଏବେ ଠୁ ପ୍ରସ୍ତୁତି ଆରମ୍ଭ କରିଥିବା ବେଳେ ଇଶ୍ବରଙ୍କ କୃପା ପ୍ରାର୍ଥନା ବି କରିଲେଣି ।